Iziphrofetho Ezimayelana LoMesiya Zagcwaliseka Yini KuJesu?

Impendulo yeBhayibhili

Ye, zagcwaliseka. Ngesikhathi uJesu elapha emhlabeni, wagcwalisa iziphrofetho ezinengi ezimayelana ‘loMesiya uMkhokheli,’ lowo owayezakuba “ngumsindisi womhlaba.” (UDanyeli 9:25; 1 UJohane 4:14) Langemva kokufa kwakhe, uJesu waqhubeka egcwalisa iziphrofetho ezimayelana loMesiya.—IHubo 110:1; ImiSebenzi 2:34-36.

Kutshoni ukuthi “Mesiya”?

Ibala lesiHebheru elithi Ma·shiʹach (uMesiya) lelinye elesiGrikhi elifanana lalo elithi Khri·stos (uKhristu) wonke atsho “Ogcotshiweyo.” Yikho-ke, ukuthi “uJesu Khristu” kutsho ukuthi “uJesu Ogcotshiweyo,” kumbe “uJesu uMesiya.”

Ezikhathini zeBhayibhili, umuntu wayegcotshwa ukuthi abe sesikhundleni esiphezulu ngokuthelwa amafutha ekhanda lakhe. (ULevi 8:12; 1 USamuyeli 16:13) UJesu wabekwa nguNkulunkulu esikhundleni esiphezulu kakhulu sokuba nguMesiya. (ImiSebenzi 2:36) UNkulunkulu kazange amgcobe ngamafutha uJesu kodwa wamgcoba ngomoya ongcwele.—UMathewu 3:16.

Kwakudingeka abantu abanengi yini ukuthi bagcwalise iziphrofetho ezimayelana loMesiya?

Hatshi. Iziphrofetho ezimayelana loMesiya ziveza ukuthi kwakuzakuba loMesiya loba uKhristu oyedwa. Kodwa iBhayibhili lisixwayisa lisithi “kuzakuba laboKhristu bamanga labaphrofethi bamanga futhi bazakwenza izimanga lezibonakaliso ezinkulu ukuze bayenge ngitsho labakhethiweyo nxa kungenzeka.”—UMathewu 24:24.

Sizambona yini uMesiya esikhathini esizayo?

Hatshi. IBhayibhili lathi uMesiya wayezavela kusendo lweNkosi uDavida yako-Israyeli. (IHubo 89:3, 4) Kodwa umlando wosendo lwakoJuda osukela kuDavida walahleka ngesikhathi amaRoma enqoba iJerusalema ngo-70 C.E.a Kusukela lapho, akulamuntu ongazithi yena ngowendlu kaDavida yesikhosini. Kodwa umlando lo wawukhona ngesikhathi sikaJesu, ngitsho lezitha zakhe zazingakuphiki ukuthi wayengowosendo lukaDavida.—UMathewu 22:41-46.

Kuleziphrofetho ezingaki eziseBhayibhilini ezimayelana loMesiya?

Kunzima ukutsho inani eliqondileyo. Ngokwesibonelo indlela abantu abangabala ngayo indima ezimayelana leziphrofetho zikaMesiya ingatshiyana. Indima yombhalo eku-Isaya 53:2-7 iqamba izinto ezinengi ngeziphrofetho ezimayelana loMesiya. Omunye engakhetha ukuqamula indima ekhuluma ngesiphrofetho sikaMesiya ibe yiziphrofetho ezinengi.

Ezinye iziphrofetho ezimayelana loMesiya ezagcwaliswa nguJesu

Isiphrofetho	Lapho Esitholakala Khona	Ukugcwaliseka Kwaso
Inzalo ka-Abrahama	UGenesisi 22:17, 18	UMathewu 1:1
Isizukulwane sika-Isaka indodana ka-Abrahama	UGenesisi 17:19	UMathewu 1:2
Wayezazalwa esizweni sakoJuda	UGenesisi 49:10	UMathewu 1:1, 3
Wayezavela kusendo lweNkosi uDavida	U-Isaya 9:7	UMathewu 1:1
Wayezazalwa yintombi egcweleyo	U-Isaya 7:14	UMathewu 1:18, 22, 23
Wayezazalelwa eBhethilehema	UMikha 5:2	UMathewu 2:1, 5, 6
Wayezabizwa ngokuthi ngu-Imanuwelib	U-Isaya 7:14	UMathewu 1:21-23
Wayengasoze abe ngumuntu omangalisayo	U-Isaya 53:2	ULukha 2:7
Ngemva kokuzalwa kwakhe kwabulawa abantwana abangabafana	UJeremiya 31:15	UMathewu 2:16-18
Kwathiwa kaphume eGibhithe	UHosiya 11:1	UMathewu 2:13-15
Wayezabizwa ngokuthi ngumNazarethac	U-Isaya 11:1	UMathewu 2:23
Wavulelwa indlela yisithunywa	UMalakhi 3:1	UMathewu 11:7-10
Wagcotshwa ukuba nguMesiya ngo-29 C.E.d	UDanyeli 9:25	UMathewu 3:13-17
UNkulunkulu wathi uyiNdodana yakhe	IHubo 2:7	ImiSebenzi 13:33, 34
Wayetshisekela indlu kaNkulunkulu	IHubo 69:9	UJohane 2:13-17
Wayengummemezeli wezindaba ezinhle	U-Isaya 61:1	ULukha 4:16-21
Intshumayelo yaseGalile yavula izingqondo zabanengi	U-Isaya 9:1, 2	UMathewu 4:13-16
Wenza izimangaliso njengoMosi	UDutheronomi 18:15	ImiSebenzi 2:22
Wakhuluma imicabango kaNkulunkulu njengoMosi	UDutheronomi 18:18, 19	UJohane 12:49
Welapha abantu abanengi abagulayo	U-Isaya 53:4	UMathewu 8:16, 17
Kazange afune ukudunyiswa	U-Isaya 42:2	UMathewu 12:17, 19
Waba lozwelo kwabahluphekayo	U-Isaya 42:3	UMathewu 12:9-20; UMakho 6:34
Watshengisa ukulunga kukaNkulunkulu	U-Isaya 42:1, 4	UMathewu 12:17-20
Waba nguMeluleki Omangalisayo	U-Isaya 9:6, 7	UJohane 6:68
Wamemezela ibizo likaJehova	IHubo 22:22	UJohane 17:6
Wakhuluma esebenzisa imizekeliso	IHubo 78:2	UMathewu 13:34, 35
Waba nguMkhokheli	UDanyeli 9:25	UMathewu 23:10
Abanengi babengamkholwa	U-Isaya 53:1	UJohane 12:37, 38
Waba lilitshe elikhubayo	U-Isaya 8:14, 15	UMathewu 21:42-44
Waphikwa ngabantu	IHubo 118:22, 23	ImiSebenzi 4:10, 11
Wazondwa engonanga lutho	IHubo 69:4	UJohane 15:24, 25
Wangena eJerusalema egade ubabhemi	UZakhariya 9:9	UMathewu 21:4-9
Wadunyiswa ngabantwana	IHubo 8:2	UMathewu 21:15, 16
Weza ngebizo likaJehova	IHubo 118:26	UJohane 12:12, 13
Wathengiswa ngumngane wakhe	IHubo 41:9	UJohane 13:18
Wathengiswa ngenhlamvu zesiliva ezingu-30e	UZakhariya 11:12, 13	UMathewu 26:14-16; 27:3-10
Abangane bakhe bamtshiya	UZakhariya 13:7	UMathewu 26:31, 56
Abantu bafakaza amanga ngaye	IHubo 35:11	UMathewu 26:59-61
Kazange aphendule ngesikhathi bemmangalela	U-Isaya 53:7	UMathewu 27:12-14
Bamkhafulela	U-Isaya 50:6	UMathewu 26:67; 27:27, 30
Bamtshaya ekhanda	UMikha 5:1	UMakho 15:19
Bambhaxabula	U-Isaya 50:6	UJohane 19:1
Wavuma ukutshaywa	U-Isaya 50:6	UJohane 18:22, 23
Iziphathamandla zabuthana ukuze zilwe laye	IHubo 2:2	ULukha 23:10-12
Babethela inyawo lezandla zakhe esigodweni	IHubo 22:16	UMathewu 27:35; UJohane 20:25
Abantu benza inkatho ngezembatho zakhe	IHubo 22:18	UJohane 19:23, 24
Wabalwa ndawonye lezoni	U-Isaya 53:12	UMathewu 27:38
Bamyeyisa njalo bamthethisa	IHubo 22:7, 8	UMathewu 27:39-43
Wafela izoni	U-Isaya 53:5, 6	1 UPhetro 2:23-25
Kwasekungathi uNkulunkulu semtshiyile	IHubo 22:1	UMakho 15:34
Waphiwa iviniga lomhluzi obabayo ukuthi anathe	IHubo 69:21	UMathewu 27:34
Woma kakhulu ngesikhathi esezakufa	IHubo 22:15	UJohane 19:28, 29
Wabeka impilo yakhe ezandleni zikaNkulunkulu	IHubo 31:5	ULukha 23:46
Wanikela ngempilo yakhe	U-Isaya 53:12	UMakho 15:37
Waba yinhlawulo ukuze esule isono	U-Isaya 53:12	UMathewu 20:28
Amathambo akhe awazange ephulwe	IHubo 34:20	UJohane 19:31-33, 36
Bamgwaza	UZakhariya 12:10	UJohane 19:33-35, 37
Wangcwatshwa lezinothi	U-Isaya 53:9	UMathewu 27:57-60
Wavuswa kwabafileyo	IHubo 16:10	ImiSebenzi 2:29-31
Isikhundla somthengisi sathathwa	IHubo 109:8	ImiSebenzi 1:15-20
Uhlezi esandleni sokudla sikaNkulunkulu	IHubo 110:1	ImiSebenzi 2:34-36

a Ibhuku elithi McClintock and Strong’s Cyclopedia lithi: “Ubufakazi butshengisa ukuthi amabhuku osendo lwamaJuda atshabalala ngesikhathi kubhujiswa iJerusalema.”

b Ibizo lesiHebheru elithi Imanuweli elitsho ukuthi “UNkulunkulu ulathi,” futhi lichasisa kuhle umsebenzi kaJesu wokuba nguMesiya. Ukubuya kwakhe emhlabeni lalokhu akwenzayo kutshengisa ukuthi uJehova ngeke abalahle abantu bakhe abamkhonzayo.—ULukha 2:27-32; 7:12-16

c Ibala elithi “Nazaretha” livela ebaleni lesiHebheru elithi neʹtser, elitsho “ihlumela.”

d Ukuze uthole okunengi mayelana lezenzakalo ezikhomba ku-29 C.E., njengomnyaka wokubonakala kukaMesiya, khangela isihloko esithi “Isiphrofetho SikaDanyeli Sathini Ngokufika KukaMesiya.”

e Isiphrofetho lesi sisebhukwini likaZakhariya, kodwa umlobi uMathewu uthi amazwi la “akhulunywa nguNkulunkulu esebenzisa umphrofethi uJeremiya.” (UMathewu 27:9) Kukhanya angani ibhuku likaJeremiya kwezinye izikhathi lalifakwa kuqala engxenyeni yeMibhalo ebizwa ngokuthi ‘abaPhrofethi.’ (ULukha 24:44) UMathewu yena wasebenzisa “uJeremiya” ngesikhathi ekhuluma ngohlu lonke lwamabhuku eziphrofetho ayehlanganisa lebhuku likaZakhariya.