UJesu Wayekhangeleka Njani?
Impendulo yeBhayibhili
Akula ngitsho loyedwa ongatsho sibisibili ukuthi uJesu wayekhangeleka njani njengoba iBhayibhili lingasitsheli ukuthi ubuso bakhe babunjani kumbe ukuthi umzimba wakhe wawunjani. Lokhu kuhle kwenze kucace ukuthi indlela uJesu ayekhangeleka ngayo ayiqakathekanga. Lanxa kunjalo iBhayibhili alisitshiyi sisemnyameni ukuthi angabe wayekhangeleka njani.
Ukukhangeleka: UJesu wayengumJuda futhi kungenzakala ukuthi wayefuze unina ngezinye indlela. (KumaHebheru 7:14) Kungenzeka lokuthi wayengatshiyananga kakhulu lamanye amaJuda ayephila ngalesosikhathi. Phela ngesinye isikhathi wenelisa ‘ukuhamba ngudlu engabonwa ngabantu’ esuka eGalile esiya eJerusalema. (UJohane 7:10, 11) Kumele ukuthi wayezifananela nje labafundi bakhe ngoba uJudasi Iskariyothi kwadingeka ukuthi atshengise ixuku elalizobopha uJesu ukuthi nguphi phakathi kwabafundi bakhe.—UMathewu 26:47-49.
Ubude benwele: Kungenzakala ukuthi wayengelanwele ezinde ngoba iBhayibhili lithi “kulihlazo ukuthi indoda ibe lenwele ezinde.”—1 KwabaseKhorinte 11:14.
Indevu: UJesu wayelendevu. Phela wayelandela umthetho wamaJuda owawusithi amadoda akumelanga ‘agele imikhawulo yendevu zawo.’ (ULevi 19:27; KwabaseGalathiya 4:4) Kanti njalo iBhayibhili lakhuluma ngendevu zikaJesu esiphrofethweni esasikhuluma ngokuhlukuluzwa kwakhe.—U-Isaya 50:6.
Umzimba: UJesu wayeqine saka! Ngesikhathi esenza inkonzo yakhe, wayehamba immango emide. (UMathewu 9:35) Wahlambulula ithempeli kabili, egenqula amatafula ababetshintsha imali, njalo wake waxotshela phandle izimvu lenkomo esebenzisa umchilo. (ULukha 19:45, 46; UJohane 2:14, 15) Ibhuku likaMcClintock loStrong elichasisa iBhayibhili lithi: “Ukulandisa kwamavangeli kutshengisa ukuthi [uJesu] wayeziphilele kuhle emzimbeni njalo eqinile.”—Volume IV, ikhasi 884.
Ubuso: UJesu wayelomusa njalo elozwelo, futhi asithandabuzi ukuthi lokhu kwakukhanya ebusweni bakhe. (UMathewu 11:28, 29) Abantu abayimihlobo etshiyeneyo babemdinga ukuze abaduduze futhi abancede. (ULukha 5:12, 13; 7:37, 38) Ngitsho labantwana babekhululekile ukuba seduze laye.—UMathewu 19:13-15; UMakho 9:35-37.
Imibono engaqondanga mayelana lokukhangeleka kukaJesu
Okungaqondanga: Abanye bacabanga ukuthi uJesu wayedabuka e-Africa ngoba incwadi yeSambulo iqathanisa inwele zakhe lewulu njalo inyawo zakhe ‘lekhopha elohlonzi.’—ISambulo 1:14, 15.
Okuqondileyo: Incwadi yeSambulo yethulwa ‘kusetshenziswa izibonakaliso.’ (ISambulo 1:1) Nxa kukhulunywa ngenwele lenyawo zikaJesu kusetshenziswe amazwi okufanekisa ukuze kuchasiswe ukuthi wayenjani ngesikhathi esevusiwe, hatshi ukuthi wayekhangeleka njani ngesikhathi esasemhlabeni. Nxa iSambulo 1:14 sisithi: “Ikhanda lenwele zakhe kwakumhlophe angathi yiwulu emhlophe, kumhlophe njengongqwaqwane,” sikhuluma ngombala wenwele, hatshi uhlobo lwenwele. Ubuhlophe benwele zakhe bumela inhlakanipho yakhe njengoba kunguye owadalwa nguNkulunkulu kuqala okutsho ukuthi seleminyaka eminengi ephila. (ISambulo 3:14) Ivesi le itshengisa ukuthi inwele zikaJesu zifaniswa longqwaqwane.
Umbhalo uthi inyawo zikaJesu zazingathi ‘yikhopha elohlonzi ecazimulayo ephakathi kwesithando somlilo.’ (ISambulo 1:15) Kanti njalo “ubuso bakhe babungathi lilanga likhanya ngenkazimulo yalo yonke.” (ISambulo 1:16) Njengoba kungelamhlobo wabantu olesikhumba esihambelana lokukhulunywa emavesini la, kufanele ukuthi amavesi la achasisa uJesu esevusiwe ‘njengohlala ekukhanyeni okungeke kusondelwe kukho.’—1 KuThimothi 6:16.
Okungaqondanga: UJesu wayengelasibindi futhi engelamandla.
Okuqondileyo: UJesu wayelesibindi njalo eyindoda emadodeni. Ngokwesibonelo ngesikhathi bezombopha kazange azifihle kodwa wabaqonda wabatshela ukuthi nguye abamdingayo. (UJohane 18:4-8) Kufanele lokuthi wayelamandla ngoba phela wayengumbazi futhi wayesebenzisa amathuluzi ezandla ekubazeni.—UMakho 6:3.
Pho yindaba wadinga uncedo ekuthwaleni isigodo sakhe sokuhlutshwa, njalo kungani wafa masinyane waqalela amadoda amabili ayebethelwe eceleni kwakhe? (ULukha 23:26; UJohane 19:31-33) UJesu wahlukuluzeka kakhulu ngesikhathi engakabulawa. Kazange alale ubusuku bonke, njalo esinye isizatho salokho yikuthi wayekhathazeke kakhulu. (ULukha 22:42-44) Ngobusuku ezavuka ebulawa, amaJuda amphatha kubi futhi ekuseni amaRoma amhlukuluza. (UMathewu 26:67, 68; UJohane 19:1-3) Kungenzeka konke lokhu yikho okwenza wafa masinyane.
Okungaqondanga: UJesu wayehlala engumuntu odanileyo kumbe ohlulukelweyo.
Okuqondileyo: UJesu wayelobuntu obunjengobukaYise uJehova futhi iBhayibhili lithi uJehova ‘nguNkulunkulu othokozayo.’ (1 KuThimothi 1:11; UJohane 14:9) UJesu waphinda wafundisa labanye ukuthi bangenzani ukuze bathokoze. (UMathewu 5:3-9; ULukha 11:28) Konke lokhu kutshengisa ukuthi izikhathi ezinengi kwakukhanya ebusweni bukaJesu ukuthi ngumuntu othokozayo.