Kuyini Okutshengisa Ukuthi ‘Sisensukwini Zokucina’ Kumbe Ekupheleni Kwesikhathi?
Impendulo yeBhayibhili
IBhayibhili lisitshela ngezinto ezizakwenzakala ezitshengisa ukuthi sesisekucineni ‘komumo lo wezinto’ lokuthi abantu bazabe benjani ngalesosikhathi. (UMathewu 24:3) Libiza isikhathi lesi ngokuthi ‘zinsuku zokucina’ langokuthi ‘yisikhathi sokucina.’—2 KuThimothi 3:1; UDanyeli 8:19.
Yiziphi iziphrofetho eziseBhayibhilini ezimayelana ‘lensuku zokucina’?
IBhayibhili lisitshela ngezinto ezinengi ezazizakuba ‘yisibonakaliso’ sokuthi sisensukwini zokucina. (ULukha 21:7) Nanzi ezinye zakhona:
Izimpi endaweni ezinengi. UJesu wathi: “Isizwe sizavukela isizwe, lombuso uvukele umbuso.” (UMathewu 24:7) USambulo 6:4 ukhuluma ngomuntu ogade ibhiza elimela izimpi futhi ‘osusa ukuthula emhlabeni.’
Indlala. UJesu wathi: “Kuzakuba lokuswelakala kokudla.” (UMathewu 24:7) Ibhuku leSambulo liphinda lisitshele ngomunye umuntu ogade ibhiza owayezaletha indlala emhlabeni.—ISambulo 6:5, 6.
Ukuzamazama komhlaba okwesabekayo. UJesu wathi kuzakuba “lokuzamazama komhlaba ezindaweni ezehlukeneyo.” (UMathewu 24:7; ULukha 21:11) Lokhu kwakuzakwenza abantu bahlupheke njalo kufe abanengi kakhulu.
Imikhuhlane. UJesu waphinda wathi kuzakuba lezifo ezinengi, kumbe ‘imikhuhlane emibi’ ememethekayo.—ULukha 21:11.
Ubugebenga. Lanxa ubugebenga baqala kudala, uJesu wathi ezinsukwini zokucina kuzakuba ‘lokwanda kobubi.’—UMathewu 24:12.
Ukonakaliswa komhlaba. KuSambulo 11:18 iBhayibhili lavele latsho ukuthi kwakuzaba labantu ‘abazawonakalisa umhlaba.’ Babezakwenza izinto ezimbi ezitshiyeneyo baphinde bonakalise umhlaba.
Abantu babezakuba njani ensukwini zokucina? Ku-2 Thimothi 3:1-4 iBhayibhili lithi abantu babezakuba ‘ngabangabongiyo, labangathembekanga, labangafuni isivumelwano, labanyundiselayo, labangazikhuziyo, labalolaka, labangakuthandiyo okuhle, labangabathengisi, labalenkani, labazikhukhumezayo.’ Indlela abantu ababezakwenza ngayo yayizakwenza impilo ibe nzima okokuthi isikhathi leso sasizabizwa ngokuthi yisikhathi ‘okunzima ukuphila kuso.’
Ukungazwanani ezimulini. Ku-2 Thimothi 3:2, 3, iBhayibhili lathi abantu abanengi babezakuba ‘ngabangathandi abanye’ njalo lokhu kwakuzabangela ukuthi bangazwanani ezimulini zabo. Laphinda lathi abantwana babezabe ‘bengalaleli abazali.’
Kuzakuba labantu abanengi abangamthandiyo uNkulunkulu. UJesu wathi: “Lothando lwabanengi luzaphola.” (UMathewu 24:12) UJesu wayesitsho ukuthi kuzakuba labantu abanengi abangamthandiyo uNkulunkulu. Laku-2 Thimothi 3:4 iBhayibhili lisitshela ukuthi ezinsukwini lezi zokucina abantu laba bazabe ‘bethanda injabulo kulokuthanda uNkulunkulu.’
Kuzakuba labantu abenza angani bakhonza uNkulunkulu kodwa besenza okubi. Ku-2 Thimothi 3:5 iBhayibhili lathi kuzakuba labantu abazitshaya angathi bayamkhonza uNkulunkulu kodwa bengafuni ukulandela imithetho yakhe.
Ukuzwisisa iziphrofetho eziseBhayibhilini. Ibhuku likaDanyeli lathi ‘esikhathini sokucina’ abantu abanengi babezaqhubeka belizwisisa kuhle iqiniso eliseBhayibhilini okugoqela leziphrofetho ezikulo.—UDanyeli 12:4.
Izindaba ezinhle zizatshunyayelwa emhlabeni wonke. UJesu wathi: “Lezizindaba ezinhle zoMbuso zizatshunyayelwa emhlabeni wonke.”—UMathewu 24:14.
Ukungabi lendaba lokuthi ukuphela sekuseduze. UJesu wathi abantu babezabubona sibili ubufakazi bokuthi ukuphela sekuseduze kodwa bangabi lendaba. (UMathewu 24:37-39) Kanti njalo u-2 Phetro 3:3, 4 usitshela ukuthi abanye babezakweyisa ubufakazi obutshengisa ukuthi ukuphela sekusemnyango.
Ukugcwaliseka kweziphrofetho. UJesu wathi insuku zokucina zizakhanya ngokugcwaliseka kweziphrofetho zonke lezi, hatshi ezilutshwane zakhona.—UMathewu 24:33.
Siphila “ezinsukwini zokucina” yini?
Ye. Okwenzakala emhlabeni kanye lokwatshiwo liBhayibhili mayelana lokuthi izinto lezi zazizakwenzakala nini kutshengisa ukuthi insuku zokucina zaqalisa ngo-1914, umnyaka okwaqala ngawo impi yomhlaba yokuqala. Ukuze ubone ukuthi okwenzakala emhlabeni kutshengisa njani ukuthi siphila ensukwini zokucina, bukela ividiyo elandelayo:
UMbuso kaNkulunkulu waqalisa ukubusa ezulwini ngo-1914 futhi okokuqala owakwenzayo yikuxotsha uSathane lamadimoni akhe ukuze bangaqhubeki besona ezulwini. (ISambulo 12:7-12) Indlela abantu abenza ngayo labacabanga ngayo itshengisa ukuthi batshotshozelwa nguSathane futhi benza insuku zokucina zibe ‘nzima ukuphila kuzo.’—2 KuThimothi 3:1.
Abanengi bakhathazwa yizinto ezenzakalayo ezikhathini lezi ezinzima. Kuyabahlupha ukuthi abantu abasenelisi ukuhlalisana kuhle. Abanye besaba lokuthi abantu bazabulalana kusale kungaselabantu emhlabeni.
Kodwa kulabanye abalethemba lanxa labo bekhathazwa yizinto ezenzakalayo emhlabeni. Bayakwazi ukuthi sekuseduze ukuthi uMbuso kaNkulunkulu uqede zonke inhlupho esilazo. (UDanyeli 2:44; ISambulo 21:3, 4) Bayabekezela belindele ukuthi uNkulunkulu agcwalise izithembiso zakhe futhi baduduzwa ngamazwi kaJesu athi: “Lowo oqinisela kuze kube sekucineni nguye ozasindiswa.”—UMathewu 24:13; UMikha 7:7.