IBhayibhili Lisitshelani Ngomnyaka Ka-1914?
Impendulo yeBhayibhili
IBhayibhili litshengisa ukuthi uMbuso kaNkulunkulu waqalisa ukubusa ezulwini ngo-1914. Esiphrofethweni esikuDanyeli isahluko 4 sithola ubufakazi obutshengisa ukuthi uMbuso lo waqalisa ukubusa ngalowomnyaka.
Okwatshiwo yisiphrofetho. UNkulunkulu wenza ukuthi iNkosi uNebhukhadinezari yaseBhabhiloni iphuphe iphupho eliyisiphrofetho. Ephutsheni lelo yabona isihlahla esikhulu esaganyulwayo, isidindi saso sabotshwa ngebhanti ukuze singakhuli kuze kudlule “izikhathi eziyisikhombisa” besekusithi ngemva kwalokho siqalise futhi ukukhula.—UDanyeli 4:1, 10-16.
Ukugcwaliseka kwaso kwakuqala. Isihlahla esikhulu sasimela iNkosi uNebhukhadinezari. (UDanyeli 4:20-22) ‘Ukuganyulwa’ kwaso kwakusitsho ukuthi uNebhukhadinezari uzahlanya abesesima ukubusa okweminyaka eyisikhombisa. (UDanyeli 4:25) UNkulunkulu wenza ukuthi ingqondo zenkosi le ziqalise ukusebenza kuhle yasibuyiselwa esihlalweni sayo sobukhosi. Ngemva kwalokho yavuma ukuthi uNkulunkulu nguye uMbusi omkhulu.—UDanyeli 4:34-36.
Ubufakazi bokuthi isiphrofetho lesi sasizagcwaliseka okwesibili. Isiphrofetho lesi sasingesokuthi “abantu abaphilayo bakwazi ukuthi oPhezukonke ulamandla phezu kwemibuso yabantu lokuthi umbuso uwunika loba ngubani afuna ukumnika, ngitsho lomuntukazana okhangelelwa phansi uyambeka phezu kwawo.” (UDanyeli 4:17) UNebhukhadinezari nguye yini uNkulunkulu ayefuna ukumnika ubukhosi yena wayezigqaja kangako? Hatshi ayisuye ngoba uNkulunkulu wamenza waphupha iphupho elaliyisiphrofetho. Ephutsheni lelo wazibonela ukuthi yena loba abanye ababusi babengeke bawuphiwe umbuso lo. UNkulunkulu ngokwakhe ‘wayezabeka umbuso ongasoze utshabalaliswe.’—UDanyeli 2:31-44.
Kulesikhathi lapho uNkulunkulu akhetha khona isizwe sako-Israyeli ukuthi kube yiso esilamakhosi amela umbuso wakhe. UNkulunkulu wavumela ukuthi umbuso wako-Israyeli ‘uchithwe’ ngenxa yokuthi ababusi bawo babengasathembekanga, kodwa wasesithi uzawupha “lowo olelungelo lokuwuthola.” (UHezekheli 21:25-27) IBhayibhili lithi uJesu Khristu nguye olelungelo lokuphiwa umbuso lo ozahlala kuze kube nini lanini. (ULukha 1:30-33) UJesu ‘uthobekile enhliziyweni’ njengoba nje isiphrofetho sasitshilo, kafanani ngitsho loNebhukhadinezari.—UMathewu 11:29.
Isihlahla esikuDanyeli isahluko 4 simelani? Kwezinye izikhathi iBhayibhili nxa likhuluma ngesihlahla liyabe lisitsho ubukhosi. (UHezekheli 17:22-24; 31:2-5) Ekugcwalisekeni kwesibili kukaDanyeli isahluko 4, isihlahla esikhulu simela ubukhosi bukaNkulunkulu.
Ukuganyulwa kwesihlahla kutshoni? Ukuganyulwa kwesihlahla kwakumela ukuphanjaniswa kokubusa kukaNebhukhadinezari futhi ekugcwalisekeni kwesibili kwakumela ukuphanjaniswa kokubusa kukaNkulunkulu lapha emhlabeni. Lokhu kwenzakala ngesikhathi uNebhukhadinezari ebhubhisa iJerusalema, lapho amakhosi ako-Israyeli ayehlezi khona “esihlalweni sobukhosi sikaJehova” emele ukubusa kwakhe.—1 ImiLando 29:23.
“Izikhathi eziyisikhombisa” zimelani? Zimela isikhathi lapho uNkulunkulu avumela khona abezizweni ukuthi babuse abantu engazange angenele. “Izikhathi eziyisikhombisa” zaqalisa ngo-October 607 B.C.E., ngesikhathi iJerusalema ibhujiswa yiBhabhiloni.a—2 AmaKhosi 25:1, 8-10.
“Izikhathi eziyisikhombisa” zaba yisikhathi esinganani? Azizange zibe yiminyaka eyisikhombisa njengalokho okwenzakala kuNebhukhadinezari. Impendulo siyithola emazwini kaJesu athi “iJerusalema [emela ubukhosi bukaNkulunkulu] izanyathenyathelwa yizizwe kuze kuphele izikhathi ezibekiweyo zabezizwe.” (ULukha 21:24) “Izikhathi eziyisikhombisa” okukhulunywa ngazo kuDanyeli isahluko 4 ziyafanana ‘lezikhathi ezibekiweyo zabezizwe’ ngoba yikho lapho uNkulunkulu avumela khona ukuthi ukubusa kwakhe ‘kunyathenyathelwe ngabezizwe.’ Lokhu kutsho ukuthi “izikhathi eziyisikhombisa” zazingakapheli ngesikhathi uJesu esemhlabeni.
Nxa singahlolisisa okutshiwo liBhayibhili sisala sesikwazi ukuthi “izikhathi eziyisikhombisa” yisikhathi esinganani. Lithi izikhathi ezintathu lengxenye zilingana lamalanga angu-1 260, yikho “izikhathi eziyisikhombisa” ziyabe seziphindwe kabili, okutsho ukuthi ziyabe zingamalanga angu-2 520. (ISambulo 12:6, 14) Nxa singasebenzisa umthetho wokuthi “ilanga elilodwa limela umnyaka owodwa,” amalanga angu-2 520 aba yiminyaka engu-2 520. Yikho “izikhathi eziyisikhombisa” kumbe iminyaka engu-2 520 yaphela ngo-October 1914.—AmaNani 14:34; UHezekheli 4:6.
a Ukuze uthole okunengi mayelana lomnyaka ka-607 B.C.E, bala isihloko esithi “Labhujiswa Nini IJerusalema Lasendulo?—Ingxenye Yokuqala,” esiku-Nqabayokulinda ka-October 1, 2011, amakhasi 26-31; lesithi “Labhujiswa Nini IJerusalema Lasendulo?—Ingxenye Yesibili,” esiku-Nqabayokulinda ka-November 1, 2011, amakhasi 22-28.