Imibuzo YeBhayibhili Iyaphendulwa / Ukuthokozisa UNkulunkulu / IBhayibhili Lithini Ngama-tattoo?
Impendulo yeBhayibhili
Ama-tattoo kukhulunywa ngawo kanye nje kuphela eBhayibhilini kuLevi 19:28. Ithi: “Akumelanga lizidwebadwebe emizimbeni yenu.” UNkulunkulu wapha ama-Israyeli umthetho lo ukuze abehlukanise lezinye izizwe ezazingomakhelwane. Abantu bakhona babezidwebadweba emizimbeni yabo befaka amabizo lezimpawu zabonkulunkulu babo. (UDutheronomi 14:2) Lanxa amaKhristu engasekho ngaphansi koMthetho kaMosi, kuqakathekile ukuthi acabangisise ngesimiso okusekelwe kuso umthetho lo wokuzidwebadweba emizimbeni kumbe ukufaka ama-tattoo.
Kuqondile yini ukuthi umKhristu afake i-tattoo kumbe omunye nje umdwebo emzimbeni?
Amavesi alandelayo azakunceda ucabangisise ngendaba le:
‘Abesifazana kumele bangadlulisi amalawulo.’ (1 KuThimothi 2:9) Isimiso lesi siyasebenza lasemadodeni. Kumele sihloniphe indlela abanye abaphatheka ngayo ngezinto ezithile njalo singenzi izinto ezisidonsela amehlo.
Okwenza abanye bafake ama-tatoo yikuthi bafuna ukuveza lokho abayikho khona kumbe abakukholwayo, besekusithi abanye bayabe befuna ukutshengisa ukuthi balamandla okwenza loba yini emizimbeni yabo. Kodwa iBhayibhili likhuthaza amaKhristu lisithi: “Linikele imizimba yenu ibe yimihlatshelo ephilayo, engcwele njalo eyamukelwa nguNkulunkulu, inkonzo engcwele eliyenza ngezingqondo zenu.” (KwabaseRoma 12:1) Yikho sebenzisa ingqondo yakho kumbe amandla akho okucabanga ukuze uzihlole, ubone ukuthi kuyini okwenza ufune ukufaka i-tattoo. Nxa kuyikuthi ufuna ukulandela okwenziwa ngabanengi kumbe ufuna ukutshengisa ukuthi ulilunga leqembu elithile, khumbula ukuthi indlela ozwa ngayo khathesi ingatshintsha kodwa i-tattoo ungavele ulifake kuyabe sekunzima ukulikhipha. Ukucabangisisa ngokuthi kungani ufuna ukufaka i-tattoo kungakunceda ukuthi wenze isinqumo esihle.—IZaga 4:7.
“Amacebo abakhutheleyo azabenza baphumelele sibili, kodwa bonke abalamawala bacina bengabayanga.” (IZaga 21:5) Abafaka ama-tattoo bajayele ukwenza isinqumo leso ngesiphangephange bengacabangisisanga, kodwa ama-tattoo angaphambanisa ubudlelwano babo labanye kanye lamathuba okuthola umsebenzi wokuziphilisa. Okunye yikuthi ama-tattoo ayadula kakhulu ukuwakhipha njalo ukuwakhipha kubuhlungu. Ukuphumelela kwalabo abenza amabhizinesi okukhipha ama-tattoo kanye lokuchwayisisa okwenziweyo kutshengisa ukuthi abantu abanengi abafaka ama-tattoo bacina befisa ukuthi ngabe kabazange bawafake vele.