Thai Liang Lim/E+ via Getty Images
HLALA ULINDILE!
Ezokuxhumana Ziyabaphambanisa Abasakhulayo
Ngomnyaka ka-2025 ohulumende abatshiyeneyo bebekhathazekile ngendlela ezokuxhumana eseziphambanisa ngayo abasakhulayo. Kubikwa ukuthi elinye ilizwe likuvalile ukuthi abasakhulayo abangaphansi kweminyaka engu-16 basebenzise ezokuxhumana futhi lamanye amazwe lawo acabanga ukwenza njalo.
Labanye abasakhulayo bayakubona sibili ukuthi ezokuxhumana zingabaphambanisa. Ngo-April 2025 enye inhlanganiso ebona ngezokuchwayisisa e-United States yabika ukuthi phose ingxenye yabasakhulayo (48%) bayavuma ukuthi ezokuxhumana ziyabaphambanisa kakhulu abanye babo.
Ababona ngezempilakahle labo sebeke baxwayisa abantu ngokuthi ezokuxhumana zingenza ukuthi abasakhulayo bahlale bekhathazekile kumbe bedanile. Ngomnyaka odlulileyo omunye udokotela we-United States oyingcitshi kwezempilakahle wathi: “Abasakhulayo abanengi lamuhla sebehlala bekhathazekile njalo indlela abacabanga ngayo isiphambanisekile. Esinye isizatho esikhulu esibangela uhlupho lolu ngezokuxhumana.”
Manje abazali bangabavikela njani abantwababo ukuze bangaphanjaniswa ngezokuxhumana? IBhayibhili lilamacebo angabanceda.
Okungenziwa ngabazali
Nanko okunye okutshiwo liBhayibhili.
“Okhaliphileyo uyacabangisisa ngawo wonke amanyathelo akhe.”—IZaga 14:15.
Njengoba sesibonile ukuthi ezokuxhumana zingaba yingozi kwabasakhulayo, ungaboni angathi uyabe uphambanisa nxa usalisa umntanakho ukuthi azisebenzise. Ungakamvumeli ukuthi asebenzise ezokuxhumana, woba leqiniso lokuthi uzakwenelisa ukulandela isikhathi oyabe umtshele ukuthi asisebenzise kwezokuxhumana, lokuthi uzasithola yini isikhathi sokuthi ake abe labangane bakhe bebonana kanye lokuthi kasoze acine ebukela izinto ezingayisizo.
Ukuze uthole okunengi, bala isihloko esithi “Ngimvumele Yini Umntanami Ukuthi Asebenzise Ezokuxhumana?” lesithi “Teaching Your Teenager Social Media Safety.”
“Lisisebenzise kuhle isikhathi senu.”—Kwabase-Efesu 5:16.
Nxa uzavumela umntanakho ukuthi asebenzise ezokuxhumana, kumele umnike imithetho yokuthi azisebenzise njani uphinde umchasisele lokuthi imithetho leyo izamvikela njani. Woba lelihlo elibukhali unanzelele ukuthi katshintshi yini indlela asesenza ngayo ngoba lokho kungatshengisa ukuthi sekumele anciphise isikhathi asiqeda kwezokuxhumana.
Bukelisa umntanakho ividiyo yemidwebo yabopopayi ethi Sebenzisa kuhle ezempucuko ukuze umncede azwisise ukuthi kungani limfakela imingcele ekusebenziseni ezokuxhumana.
Ukuze uthole okunye okungakunceda okuseBhayibhilini, bala isihloko esithi “Isiphathamandla Sezempilakahle Sithi Ezokuxhumana Zingabalimaza Abasakhulayo—IBhayibhili Lithini?”
Thola okunengi
IBhayibhili lithi siphila ‘ezikhathini ezinzima, okunzima ukuphila kuzo.’ (2 KuThimothi 3:1-5) Kodwa liphinda lisitshengise lokho okumele sikwenze ezikhathini lezo. Esihlokweni esithi “Ukukhathazeka Kwabasakhulayo—IBhayibhili Lithini?” kulamavidiyo lezihloko ezisekelwe eBhayibhilini ezedlula 20 ezinganceda abazali labantwana.