Umhlatshelo KaJesu Ungakunceda Njani?

Kanye ngomnyaka oFakazi bakaJehova bayahlangana ukuze bananze iSikhumbuzo sokufa kukaJesu ndawonye labantu abanengi ababavakatshelayo. Nxa bekwenza lokhu bayabe belandela lokho uJesu abatshela ukuthi bakwenze. (ULukha 22:19) Umbuthano lo usinceda sibone ukuthi kuqakatheke ngani lokho okwenziwa nguJesu, njengoba wanikela ukuphila kwakhe ngenxa yabantu. Uphinda usincede sizwisise ukuthi umhlatshelo wakhe ungasinceda njani khathesi lasesikhathini esizayo.—UJohane 3:16.

Kungelani lokuthi usingenile yini iSikhumbuzo lonyaka kumbe hatshi, ungenzani ukuze umhlatshelo kaJesu ukuncede? Kulezinto ezimbili eziqakathekileyo uJesu athi sizenze. Yilezi ezilandelayo:

1. 1. Funda ngoNkulunkulu langoJesu. UJesu wathandaza kuYise wathi: “Ukuze bathole ukuphila okungapheliyo kumele bakwazi wena onguwe wedwa uNkulunkulu weqiniso lalowo omthumileyo, uJesu Khristu.”—UJohane 17:3.

2. 2. Kwenze lokho okufundayo. UJesu wagcizelela ukuthi kumele sikwenze lokho asifundisa khona. Ngokwesibonelo, waphetha intshumayelo yakhe yasentabeni ngokuncoma loba ngubani ‘ozwa amazwi akhe abesewenza.’ (ULukha 6:46-48) Waphinda wathi: “Nxa lizazi izinto lezi lizathokoza lingazenza.”—UJohane 13:17.

Uyafuna yini ukufunda okunengi ngoNkulunkulu langoJesu? Uyawafuna yini amacebo angakunceda ukuthi wenelise ukukwenza lokho okufundayo? Nanzi ezinye izinto ezingakunceda:

Isifundo seBhayibhili

Izifundo zeBhayibhili zamahala esizenza labantu sezincede abanengi ukuthi bahlole okufundiswa liBhayibhili futhi bakulandele.

• Yana kuwebhusayithi yethu ukuze uthole okunengi mayelana lezifundo zeBhayibhili ezenziwa ngaboFakazi bakaJehova.

• Bukela ividiyo ethi Siyakwamukela Esifundweni Sakho SeBhayibhili ukuze ubone ukuthi isifundo seBhayibhili senziwa njani.

Imihlangano YaboFakazi BakaJehova

OFakazi bakaJehova bayahlangana kabili ngeviki endaweni abakhonzela kuzo okuthiwa ngamaWolu oMbuso. Emihlanganweni le sixoxa ngeBhayibhili lokuthi singakusebenzisa njani lokho esikufunda kulo.

Loba ngubani ukhululekile ukuzongena imihlangano yethu lanxa lowomuntu engasoFakazi kaJehova. Kusiya ngezimo, imihlangano yethu ungayingenela eWolu yethu kumbe uyingene ngezempucuko.

• Bukela ividiyo ethi Kuyini Okwenzakala EWolu YoMbuso? ukuze ubone ukuthi kwenzakalani emihlanganweni yethu.

• Hlaba lapho okubhalwe ukuthi Imihlangano Yebandla YaboFakazi BakaJehova ukuze uthole indawo okungenelwa khona imihlangano yethu eduze lawe.

Izihloko lamavidiyo akuwebhusayithi yethu

Amavidiyo kanye lezihloko ezikuwebhusayithi yethu kungakunceda ukuthi ufunde okunengi ngalokho okwafundiswa nguJesu lokuthi umhlatshelo wakhe uqakatheke ngani.

Ngokwesibonelo, ukuze uthole okunengi ngokuthi ukufa komuntu oyedwa kungabanceda njani abantu abanengi, bala isihloko esithi “UJesu Usisindisa Njani?” lesithi “Kungani UJesu Wahlupheka Futhi Wafa?” kumbe ubukele ividiyo ethi Kungani UJesu Wafa?