Ngazithanda impendulo ezicacileyo eziseBhayibhilini

KUDALA KWAMI:

Ngazalelwa edolobheni lakudala leHungary okuthiwa yiSzékesfehérvár. Ngisawukhumbula umonakalo omkhulu owabangelwa yiMpi Yomhlaba Yesibili edolobheni lelo.

Ngakhuliswa ngugogo lokhulu abazala umama. Ngisazikhumbula insuku leziyana ngizikholisela labo futhi engangimthanda kakhulu ngugogo wami u-Elisabeth. Wangifundisa ukuthi ngibe lokholo oluqinileyo kuNkulunkulu. Kusukela ngileminyaka emithathu, sasijayele ukuphinda uMthandazo WeNkosi nsuku zonke ntambama. Kodwa ngaze ngawuzwisisa sengileminyaka ekubo 30.

Ngangigcinwa ngugogo lokhulu ngoba abazali bami babengahlali phansi besebenza ubusuku lemini befuna ukuthola imali yokuthenga indlu enhle. Kabili ngenyanga sonke sasihlangana siyimuli sidle ndawonye. Ngangizikholisa insuku lezo.

Ngo-1958, iphupho labazali bami lagcwaliseka, benelisa ukuthenga indlu. Ngathokoza kakhulu ngoba ngahle ngahamba ngayahlala labo. Kodwa ngemva kwenyanga ezingu-6 nje kuphela kwenzakala into eyangizwisa ubuhlungu. Ubaba wabulawa yimvukazane.

Ngadana kakhulu. Ngiyakhumbula ngithandaza ngisithi: “Nkulunkulu, ngakucela ukuthi usilise ubabami ngoba ngiyamthanda. Yindaba ungayiphendulanga imithandazo yami?” Ngangikufuna sibili ukwazi ukuthi ubabami ungaphi. Ngangizibuza ukuthi: ‘Kambe angabe eye ezulwini yini? Pho ngizaphinda ngimbone yini?’ Ngangibahawukela abanye abantwana ababelaboyise.

Okweminyaka eminengi ngangisiya emangcwabeni phose nsuku zonke. Ngangifika ngiguqe ethuneni likababa besengithandaza ngisithi: “Ngiyacela Nkulunkulu, ngicela ungitshele ukuthi ubabami ungaphi.” Ngangithandaza ngicela lokuthi angincedise ngizwisise ukuthi siphilelani.

Ngathi sengileminyaka engu-13, ngafundela isiGerman. Ngangizitshela ukuthi njengoba kulamabhuku amanengi abhalwe ngobunono awolimi lolu mhlawumbe ngingathola izimpendulo zemibuzo engangilayo. Ngo-1967, ngaqalisa ukufunda edolobheni leJena, ngalesosikhathi elaliyingxenye ye-East Germany. Ngangibala amabhuku amanengi ayebhalwa ngamafilosofi amaGerman, ayekhuluma kakhulu ngokuphila kwabantu. Ngakukholisa engakufunda emabhukwini lawo kodwa angizange ngithole izimpendulo zemibuzo yami. Yikho ngaqhubeka ngidinga.

INDLELA IBHAYIBHILI ELANGITSHINTSHA NGAYO:

Ngo-1970 ngabuyela eHungary lapho engahlangana khona lentombi eyacina isingumkami uRose. Ngalesosikhathi eHungary kwakubusa amaKhomanisi. Ngesikhatshana satshada sahle sathutha saya e-Austria. Esasikufuna yikuthi size siyefika eSydney, eAustralia, lapho okwakuhlala khona umalume.

Kungakayingaphi ngathola umsebenzi e-Austria. Ngelinye ilanga omunye engangisebenza laye wangitshela ukuthi ngingathola izimpendulo zemibuzo engangilayo eBhayibhilini. Wanginika amabhuku amanengana ayechasisa okuseBhayibhilini. Ngawabala ngawaqeda ngesikhatshana futhi ngasala ngifuna ukufunda okunengi. Yikho ngabhalela oFakazi bakaJehova ngicela amanye amabhuku ngoba yibo ababedinde lawana engawabalayo.

Ngelanga lapho esasisenza khona i-anivesari yethu yokuqala, savakatshelwa ngelinye ijaha elinguFakazi. Wayengiphathele amabhuku engangiwacelile wasengicela ukuthi angifundise iBhayibhili ngahle ngavuma. Njengoba ngangikufunile ukufunda okunengi sasifunda kabili ngeviki. Sonke isikhathi nxa sasifunda sasiqeda amahora angaba ngu-4.

Ngangikuthanda kakhulu lokho engangikufundiswa ngoFakazi okwakusekelwe eBhayibhilini. Ngasala ngibambe owangaphansi baze bangitshengise ibizo likaNkulunkulu elithi Jehova eBhayibhilini lami lesiHungary. Okweminyaka yonke le engu-27 ngisiya esontweni ngangingakaze ngizwe kukhulunywa ngebizo likaNkulunkulu ngitsho langelanga elilodwa. Ngamangala ngibona ukuthi iBhayibhili licacile futhi lokho elikutshoyo kulengqondo sibili. Layiphendula yonke imibuzo yami. Ngokwesibonelo, ngafunda ukuthi abafileyo abazi lutho, kungathi nje balele obukabhuka. (UmTshumayeli 9:5, 10; UJohane 11:11-15) Ngafunda lokuthi iBhayibhili lisithembisa ukuthi kuzaba lomhlaba omutsha lapho ‘ukufa okungasoze kuphinde kube khona.’ (ISambulo 21:3, 4) Ngilethemba lokuthi ngizaphinda ngimbone ubaba ngoba emhlabeni omutsha “abafileyo bazavuswa.”—ImiSebenzi 24:15.

URose waqalisa ufunda iBhayibhili futhi wakwenza ngenhliziyo yakhe yonke ngingazange ngimbambe ngamandla. Ngenyanga ezimbili nje saliqeda ibhuku ngoba sasikuwomele ukufunda iqiniso. Sasiyingena yonke imihlangano yebandla. OFakazi bakaJehova babethandana, bemanyene futhi bencedisana. Lokhu kwasithinta kakhulu.—UJohane 13:34, 35.

Ngo-1976, mina loRose savunyelwa ukuthi singene e-Australia. Masinyane nje sahle sabadinga oFakazi bakaJehova khonale. OFakazi basenza sazizwa sisekhaya sibili. Ngo-1978 lathi sabhabhathizwa saba ngoFakazi.

INDLELA ENGISIZAKALE NGAYO:

Ngacina ngizitholile izimpendulo zemibuzo eyayingikhathaze okwesikhathi eside. Ngokusondela kuJehova uNkulunkulu sengithole uBaba obedlula bonke. (UJakhobe 4:8) Kuyangiduduza lokuthi ngizaphinda ngimbone ubaba emhlabeni omutsha.—UJohane 5:28, 29.

Ngo-1989, mina lomkami sabona kungcono ukuthi sibuyele eHungary ukuze siyetshela izihlobo labangane ngitsho labanye, ngalokho esasesikufunde eBhayibhilini. Sibe lesibusiso sokuncedisa abantu abanengi ukuthi bafunde ngoJehova. Abedlula 70 bakhona labo sebekhonza uJehova kugoqele lomama ongizalayo.

Ngathandaza okweminyaka engu-17 ukuthi ngithole izimpendulo zemibuzo engangilayo. Khathesi sekwedlule eminye iminyaka engu-39 futhi lokhe ngithandaza. Kodwa khathesi ngithi: “Ngiyabonga Baba wami osezulwini engimthandayo ngokuphendula imithandazo yami engayenza ngisakhula.”