Ibhayibhili Liyamtshintsha Umuntu

“Khathesi sengiyindoda engcono.”—ILANDISWA NGURIGOBERT HOUETO

• UMNYAKA WOKUZALWA: 1941

• ILIZWE AZALELWA KULO: BENIN

• IMBALI: WAYETHETHE ISITHEMBO FUTHI EBAZONDA OFAKAZI BAKAJEHOVA

KUDALA KWAMI:

Ngazalelwa eCotonou, idolobho elikhulu eliseBenin. Ngakhula ngisonta iRoma kodwa ngangihamba gqo esontweni. Endaweni engangihlala kuyo amadoda amanengi angamaRoma ayelabafazi abanengi ngoba isithembo sasisemthethweni ngalesosikhathi. Lami ngacina ngizithathela abafazi abane.

Ngabo-1970 kwaba leqembu labantu elalifuna utshintsho kwezombusazwe futhi ngangicabanga ukuthi lokhu kwakuzalinceda ilizwe lethu. Ngalisekela kakhulu iqembu lelo, lami ngacina sengingene kwezombusazwe. Ababekhalela utshintsho babebazonda oFakazi bakaJehova ngoba oFakazi babengangeneli kwezombusazwe. Lami ngangingomunye walabo ababehlukuluza oFakazi. Ngesikhathi abanali abangoFakazi bexotshwa elizweni lethu ngo-1976, ngangiqiniseka ukuthi abasoze baphinde baphenduke.

INDLELA IBHAYIBHILI ELANGITSHINTSHA NGAYO:

Iziphithiphithi kwezombusazwe zaphela ngo-1990. Ngamangala ngibona abanali abangoFakazi sebephendukile. Ngaqalisa ukucabanga ukuthi mhlawumbe uNkulunkulu wayebasekela abantu laba. Ngalezonsuku ngatshintsha lapho engangisebenzela khona. Omunye engangisebenza laye wayenguFakazi futhi wayengakudondeli ukukhuluma ngalokho ayekukholwa. Wangitshengisa amavesi eBhayibhilini ayechaza uJehova njengoNkulunkulu olothando lokulunga. (UDutheronomi 32:4; U-1 Johane 4:8) Ubuntu bukaNkulunkulu lobo bangikhanga. Ngasengifuna ukufunda okunengi ngoJehova yikho ngaqalisa ukufunda iBhayibhili.

Kungakayi ngaphi ngasengiqalisile ukungena imihlangano yaboFakazi bakaJehova. Ngamangaliswa yindlela ababethandana ngayo, babengabandlululani ngemihlobo kumbe kusiya ngokuthi umuntu ungumyanga loba unothile. Njengoba ngangiqhubeka ngingena imihlangano yaboFakazi, kwangicacela ukuthi yibo abalandeli bakaJesu beqiniso.—UJohane 13:35.

Ngananzelela ukuthi nxa ngangifuna ukukhonza uJehova kwakumele ngivalelise esontweni yeRoma. Ukuvalelisa kwakungalula ngoba ngangisesaba ukuthi abanye babezakuthini. Ngemva kwesikhathi uJehova wangincedisa ngaqunga isibindi ngasengitshiya isonto yeRoma.

Kwakulolunye futhi utshintsho okwakumele ngilwenze. Njengoba ngangiqhubeka ngifunda iBhayibhili ngananzelela ukuthi uJehova uyasizonda isithembo. (UGenesisi 2:18-24; UMathewu 19:4-6) Yikho ngakhetha ukutshada lomkami wokuqala ngasengisehlukana labanye laba abathathu, kodwa ngangilokhu ngibanakekela. Ngokuhamba kwesikhathi ababili babo bacina sebengoFakazi bakaJehova.

INDLELA IBHAYIBHILI ELANGITSHINTSHA NGAYO:

Lanxa umkami elokhu engumRoma kaphikisani lesinqumo sami sokukhonza uJehova. Sobabili siyakunanzelela ukuthi sengibe yindoda engcono kakhulu.

Ngangicabanga ukuthi nxa ngingangena kwezombusazwe ngangingathuthukisa indawo yakithi, kodwa imizamo yonke nje yayingancedi lutho. Khathesi sengibona ukuthi uMbuso kaNkulunkulu yiwo kuphela ongaqeda inhlupho zabantu. (UMathewu 6:9, 10) Ngimbonga ngingaqedi uJehova ngoba wangitshengisa ukuthi ngingayithola njani intokozo empilweni.

“Kwakunzima ukutshintsha.”—ILANDISWA NGU-ALEX LEMOS SILVA

• UMNYAKA WOKUZALWA: 1977

• ILIZWE AZALELWA KULO: BRAZIL

• IMBALI: UMFUNDISI WESONTO YEPENTECOSTAL

KUDALA KWAMI:

Ngakhulela endaweni okuthiwa yi-Itu, esedolobheni laseSão Paulo State. Indawo le yayidume ngobugebenga.

Ngangilodlakela futhi ngingaziphathanga. Ngasengixhwale kakhulu okokuthi ngasengingenisa ama-drugs ngokungekho emthethweni. Ngananzelela ukuthi impilo engasengiyiphila yayiyingozi okokuthi ngangingacina ngibotshiwe kumbe ngife ngendlela ebuhlungu, yikho ngatshiyana layo. Ngajoyina isonto yePentecostal futhi ngemva kwesikhathi ngaba ngumfundisi.

Ngangibona angani intshumayelo engangiyenza esontweni yayizabanceda abantu. Ngasengisenza intshumayelo leyo kuhlelo lwerediyo olwalujayele ukulalelwa ngabantu okwenza ngaba ngumuntu odumileyo endaweni leyo. Kancane kancane ngaqalisa ukunanzelela ukuthi abantu bonke nje esontweni leyo babengelandaba labanye futhi babengamhloniphi uNkulunkulu. Bona babezifunela ukwenza imali kuphela. Yikho ngavalelisa esontweni leyo.

INDLELA IBHAYIBHILI ELANGITSHINTSHA NGAYO:

Ngathi ngiqala nje ukufunda iBhayibhili laboFakazi bakaJehova ngahle ngazibonela ukuthi babetshiyene lezinye inkolo. Kulezinto ezimbili ezangikhangayo. Okokuqala, oFakazi bakaJehova batshengisa ngezenzo ukuthi bayamthanda uJehova labomakhelwane, abaphongukhuluma nje kuphela. Okwesibili, abangeneli kwezombusazwe lasempini. (U-Isaya 2:4) Kokubili lokhu kwangiqinisekisa ukuthi ngasengiyitholile inkolo yeqiniso, indlela encane eyisa ekuphileni.—UMathewu 7:13, 14.

Ngananzelela ukuthi nxa ngangifuna ukuthokozisa uJehova kwakumele ngenze utshintsho empilweni yami. Kwasekumele ngibe lesikhathi esinengi lemuli yami futhi ngibe ngumuntu othobekileyo. Kwakungalula ukwenza utshintsho lolo kodwa okwenza ngaphumelela yikuthi uJehova wangincedisa. Umkami kwamthokozisa ukuthi ngasengitshintshile. Lanxa wangiqalela ukufunda iBhayibhili kodwa wathuthuka masinya ngemva kokubona ukuthi ngasengenze utshintsho. Esasesikufuna sobabili yikuba ngoFakazi bakaJehova, yikho sabhabhathizwa ngelanga elilodwa.

INDLELA ENGINCEDAKALE NGAYO:

Mina lomkami sibe lentokozo yokuncedisa abantwabethu abathathu ukuthi babe ngabangane bakaJehova. Sesiyimuli ethokozayo sibili. Ngiyambonga uJehova ngokungifundisa iqiniso eliseLizwini lakhe iBhayibhili. Lona liyamtshintsha sibili umuntu! Lokho ngingakufakazela.

“Khathesi sengikukholisa ukuphila.”—ILANDISWA NGUVICTORIA TONG

• UMNYAKA WOKUZALWA: 1957

• ILIZWE AZALELWA KULO: AUSTRALIA

• IMBALI: WAKHULISWA NGENDLELA EBUHLUNGU

KUDALA KWAMI:

Ngakhulela edolobheni leNewcastle, eliseNew South Wales. Ngekhaya kulabantwana abayisikhombisa, mina ngilizibulo. Ubaba wayelesihluku, eyisidakwa futhi umama laye wayelesihluku. Umama wayehlala engitshaya futhi engitshela amazwi abuhlungu. Wayejayele ukungitshela ukuthi ngizatshiswa esihogweni ngoba ngangingezwa. Amazwi la ayengethusa.

Umama wayengitshaya ngisale ngilamanxeba okwakusenza ukuthi ngihlale isikhathi eside ngingayi esikolo. Sengileminyaka engu-11 ngehlukaniswa labazali bami ngayagcinwa nguhulumende, ngasengitshintshwa ngayagcinwa yisonto. Sengileminyaka engu-14 ngabaleka endaweni leyo. Into engangingayifuni yikubuyela ngekhaya, yikho ngaqalisa ukuhlala emigwaqweni edolobheni laseSydney endaweni okuthiwa yiKings Cross.

Ngesikhathi ngihlala emigwagweni ngasengisebenzisa amadrugs, ngidakwa futhi ngiziphath kubi kwezemacansini, Ngokuhamba kwesikhathi ngayahlala eflethini lomuntu owayengumnikazi weyinye i-nightclub. Ngobunye ubusuku kwenzakala into eyangethusayo. Kwafika amadoda amabili ezombona, yena wasesithi ngiye endlini yokulala kodwa ngangisizwa konke ababekukhuluma. Umnikazi we-club wayefuna ukungithengisa emadodeni la. Icebo labo lalingelokuthi bangifihle esikepeni esithwala impahla, besebengihambisa eJapan ukuze ngiyesebenza ebhawa. Ngethuka ngahle ngeqa ngacela ezinyaweni ngayadinga usizo ebantwini.

Ngahlangana leyinye indoda eyayivakatshele eSydney ngasengiyitshela uhlupho lwami ngicabanga ukuthi izanginika imali. Kodwa yona yathi sihambe sonke endlini yayo ukuze ngiyegeza futhi ngithole okuya ethunjini. Angisaphindanga ngasuka lapho saze satshada ngemva komnyaka.

INDLELA IBHAYIBHILI ELANGITSHINTSHA NGAYO:

Ukufunda iBhayibhili laboFakazi bakaJehova kwangithinta kwakhulu. Ngathi ngifunda ukuthi uSathane nguye obangela izinto ezimbi ngadana ngoba ngangihlala ngitshelwa ukuthi uNkulunkulu nguye obangela ukuthi sihlupheke. Ngezwa ngihlaliseka ngesikhathi ngifunda ukuthi uNkulunkulu katshisi abantu esihogweni, ngoba imfundiso le yangethusa kusukela ngisesemncane.

Ngakhangwa yindlela oFakazi ababesebenzisa ngayo iBhayibhili ukuze benze izinqumo ezinhle. Indlela abaphila ngayo ihambisana lalokho abakufunda eBhayibhilini. OFakazi bakaJehova babengihlonipha futhi bengiphatha ngothando lanxa kwezinye izikhathi ngangikhuluma futhi ngenze izinto ababengazizwisisi.

Ngilwisana lemizwa yokuzizwa ngingelancedo. Ngangingazithandi futhi imizwa leyi yaqhubeka ikhona lanxa ngasenginguFakazi kaJehova. Ngangimthanda sibili uJehova kodwa ngangibona angani yena wayengeke athande umuntu onjengami.

Izinto zatshintsha ngemva kweminyaka engaba ngu-15 ngibhabhathiziwe. Ngisakhumbula eyinye inkulumo eyangithintayo eyakhulunywa ngomunye umzalwane eWolu yoMbuso yaboFakazi bakaJehova. Umzalwane lo wakhuluma ngombhalo kaJakhobe 1:23, 24. Amavesi la afanisa iLizwi likaNkulunkulu lesibuko esenza senelise ukuzibona ngendlela uJehova asibona ngayo. Ngaqalisa ukuzibuza ukuthi mina ngangizibona ngendlela uJehova ayengibona ngayo yini. Kwakusala ukuthi ngivume ukuthi uJehova angangithanda sibili ngoba ngangicabanga ukuthi lokho ngeke kwenzakale.

Ngemva kwensukwana ngabala ivesi eyatshintsha impilo yami. Kwakungumbhalo ka-Isaya 1:18, okutholakala kuwo amazwi kaJehova athi: “Wozani khathesi nje, sibonisane sikanye. . . . Lanxa izono zenu zibomvu gebhu, zizakuba mhlophe nke njengongqoqwane.” Ngezwa angani uJehova wayekhuluma lami sibili esithi: “Awu Vicky, woza sibonisane. Ngikwazi mhlophe, izono zakho ngiyazazi, lenhliziyo yakho ngiyayazi futhi ngiyakuthanda.”

Angizange ngibuquthe ngalobobusuku. Ngangingakholwa ukuthi uJehova angangithanda sibili kodwa ngaqalisa ukucabanga ngenhlawulo kaJesu. Kwahle kwathi dlwe kimi ukuthi uJehova ubengibekezelela isikhathi sonke lesi, ezama ukungitshengisa ngendlela ezinengi ukuthi uyangithanda. Kodwa mina kwakungani ngithi kuye: “Ngeke uthande umuntu onjengami, Ienhlawulo yendodana yakho ngeke isebenze kimi.” Kwakungathi ngangilokhu ngisifuqela khatshana isipho senhlawulo uJehova ayengiphe sona. Ukucabangisisa ngesipho senhlawulo kwenza ngangathandabuzi ukuthi uJehova uyangithanda sibili.

INDLELA ENGINCEDAKALE NGAYO:

Khathesi sengikukholisa ukuphila futhi sengilomzwangedwa ohlanzekileyo. Ngiyathokoza emtshadweni wami futhi kuyangithokozisa ukuncedisa abanye ukuthi baphile ngendlela ethokozisa uJehova. Khathesi sengikuzwa sibili ukuthi ngiseduze loJehova.

“Umthandazo wami waphendulwa.”—ILANDISWA NGUSERGEY BOTANKIN

• UMNYAKA WOKUZALWA: 1974

• ILIZWE AZALELWA KULO: RUSSIA

• IMBALI: WAYETHANDA UMCULO WE-ROCK

KUDALA KWAMI:

Ngazalelwa eVotkinsk, indawo okwazalelwa khona umhlabeleli odumileyo uPyotr Ilich Tchaikovsky. Ngekhaya sasingabayanga. Ubaba wayelobuntu obuhle lanxa wayeyisidakwa, khonokho kwakusenza wonke umuntu nje endlini azizwe engakhululekanga.

Ngangingakhaliphanga njengabanye abantwana esikolo futhi ngokuhamba kwesikhathi ngaqalisa ukuzikhangelelela phansi. Ngacina ngingasathembi muntu. Ngangingasakukholisi ukuya esikolo futhi ngangilenhloni zokukhuluma phambi kwabanye abantwana okokuthi ngangisehluleka lokukhuluma into engiyaziyo. Ngikhumbula eyinye i-report yami yesikolo eyabuya isithi angenelisi ukuveza imicabango yami. Amazwi la angilimaza kakhulu futhi angitshiya ngizizwa ngingumuntu ongelancedo. Ngaqalisa ukuzibuza ukuthi kanti ngiphilelani.

Ngathi sengikhulakhulile ngaqalisa ukunatha. Ngangikukholisa sibili ukunatha ngoba kwakungenza ngizibone ngingumuntu kuzwa. Kodwa ngangisithi nginganatha kakhulu umzwangedwa wami ungithonisise. Ngangingakwazi lokuthi ngiphilelani. Ngadana kakhulu ngacina sengihlulukelwe futhi ngezinye izikhathi ngangitshona ngizivalele endlini. Ngasengicabanga lokuzibulala.

Sengileminyaka engu-20 ngathola umculo owawuzangilibazisa okwesikhatshana. Umculo lo wawungenza ngibe lamadlabuzane futhi ngathola labangane ababewuthanda umculo lo. Ngaba lenwele ezinde, ngabhoboza indlebe njalo ngasengigqoka njengabanye abahlabeleli engangibathanda. Kancane kancane ngaqalisa ukuba lolaka, sengithanda ukulwa futhi sengihlala ngiphikisana labanye ngekhaya. Ngasengisenza loba yini vele ngingaselandaba.

Ngangicabanga ukuthi ukulalela ingoma lezi kwakuzangenza ngithokoze, kodwa lokho akwenzakalanga. Ingoma lezi zangitshintsha sibili. Ngesikhathi ngisizwa ngezinto ezimbi ezazisenziwa ngabahlabeleli engangibathanda ngadana kakhulu.

Ngaqalisa futhi ukucabangisisa ngokuzibulala. Okwenza ngacina ngingasazibulali yikucabanga indlela umama ayengithanda ngayo lezinto ezinengi ayengenzele zona kanye lobuhlungu ayezabuzwa nxa ngangingazibulala. Ngangikhathazekile, ngingasakufuni ukuphila kodwa kwakungavumi ukuthi ngizibulale.

Ngaqalisa ukubala amabhuku olimi lwesiRussia ayelezindatshana ukuze ngikhiphe umcabango wokuzibulala. Ngabala indaba eyayikhuluma ngelinye iqhawe elaselingena eyinye isonto. Ngemva kokubala indatshana leyo ngahle ngaba lesifiso sokukhonza uNkulunkulu lokunceda abantu. Ngathandaza kuNkulunkulu ngimtshela konke okusenhliziyweni yami, into engangingakaze ngiziphuphe ngiyenza. Ngacela uNkulunkulu ukuthi angincedise ngibone ukuthi ngiphilelani. Ngathi ngithandaza ngahle ngazizwa sengihlalisekile. Ngemva kwamahora amabili nje kuphela kwafika omunye uFakazi kaJehova wacela ukuthi afunde lami iBhayibhili. Lokhu kwangimangalisa sibili. Ngahle ngazibonela ukuthi umthandazo wami wawusuphenduliwe. Yikho lapho engaqalisela khona ukuphila impilo ethokozisayo.

INDLELA IBHAYIBHILI ELANGITSHINTSHA NGAYO:

Ngahle ngalahla konke engangikusebenzisa ukutshaya umculo we-rock lanxa kwakungalula ukwenza njalo. Kodwa kwathatha isikhathi ukuthi umculo lo uphume engqondweni yami. Ngezinye izikhathi ngangisithi ngizihambela nje ngizwe kutshaywa ingoma engangizithanda. Khonokho kwakungikhumbuza kudala kwami. Ngangingafuni ukuthi izinto ezibuhlungu ezazenzakele kudala empilweni yami ziphambanise imicabango emihle engasengilayo. Ngacina ngingasayi kulezondawo. Sonke isikhathi nxa ngangifikelwa yimicabango yakudala ngangithandaza ngokusuka enhliziyweni. Lokhu kwanginceda ngaba “lokuthula kukaNkulunkulu okwedlula konke ukuzwisisa.”—KwabaseFiliphi 4:7.

Ngathi ngifunda iBhayibhili ngabona ukuthi amaKhristu kwakumele atshele abanye ngalokho ayekukholwa. (UMathewu 28:19, 20) Mina ngangibona angani ngeke ngenelise ukukwenza lokho kodwa izinto ezintsha engangizifunda zangenza ngathokoza futhi ngahlaliseka. Ngangikwazi ukuthi labanye kwakumele bakufunde lokho engasengikufundile. Yikho ngaqalisa ukutshela abanye lokho engangikufunda, lanxa ngangisesaba. Okwangimangalisayo yikuthi ukutshela abanye ngalokho engangikufunda kwangenza ngaba lesibindi futhi kwaqinisa ukholo lwami ezintweni ezintsha engangizifunda.

INDLELA ENGINCEDAKALE NGAYO:

Sengithokoza kakhulu emtshadweni wami njalo sengincedise abantu abanengi ukuthi bafunde iBhayibhili, kuhlanganisa udadewethu lomama. Ukukhonza uJehova lokuncedisa abanye ukuthi bafunde ngaye kungenze ngaphila impilo engcono kakhulu.