“Ngaqalisa ukucabangisisa ngempilo yami”

KUDALA KWAMI:

Ngakhulela eWarialda endaweni esemakhaya eNew South Wales. Endaweni le kuyalinywa futhi abantu bafuya izimvu lenkomo. Lidolobho elihlanzekileyo elilobugebenga obulutshwana.

Ngekhaya sazalwa sabangu-10, mina ngilizibulo. Ngaqalisa ukusebenza ngileminyaka engu-13 ukuze ngithole imali yokuncedisa ngekhaya. Ngangisebenza emaplazini ngoba angizange ngifunde kakhulu esikolo. Ngathi sengileminyaka engu-15 umsebenzi engasengiwenza kakhulu wawungowokunakelela izifuyo lokuthambisa amabhiza.

Ngangiwukholisa umsebenzi lo njalo kwakumnandi ukuba sendaweni le. Ebusuku ngangihlala emlilweni ngikhangele inyanga lezinkanyezi ngapha ngibethwa ngumoya omnandi. Ngiyakhumbula ngicabanga kwelinye ilanga ngisithi kufanele ukuthi kulomuntu owadala izinto zonke lezi ezinhle. Ukusebenza emaplazini kwanginceda kodwa indawo le yaphinda yangiphambanisa ngoba yangifundisa imikhuba emibi. Ngangijayele ukuzwa inhlamba futhi legwayi lalitholakala lula. Lokhu kwenza ngaqalisa ukubhema lokukhuluma inhlamba.

Ngathi sengileminyaka engu-18 ngathutha ngayahlala eSydney. Ngazama ukujoyina isisotsha kodwa angiphumelelanga ngoba ngangingafundanga okuyangaphi. Ngacina ngiwutholile omunye umsebenzi futhi ngahlala eSydney okomnyaka owodwa. Ngomnyaka wonalowo ngahlangana laboFakazi bakaJehova. Banginxusa emhlanganweni wabo futhi ngahamba komunye wakhona, yikho engabona khona ukuthi bafundisa iqiniso.

Ngemva kwesikhathi ngathutha ngabuyela futhi emakhaya. Ngahamba eGoondiwindi, eQueensland. Ngafika ngathola umsebenzi khonale futhi ngatshada. Kodwa okudanisayo yikuthi ngabuyelela ukunatha utshwala.

Mina lomkami saba labantwana ababili abangabafana. Sesilabantwana ngaqalisa ukucabangisisa ngempilo yami. Ngakhumbula engangikuzwe emhlanganweni waboFakazi ngiseSydney, yikho ngabona ukuthi kumele ngenze okuthile.

Ngathola iNqabayokulinda yakudala eyayilekheli yewofisi yegatsha yaboFakazi bakaJehova e-Australia. Ngabhalela khona ngicela uncedo. Kwasekubuya omunye uFakazi owayelomusa ezosivakatshela. Waqalisa ukufunda lami iBhayibhili.

INDLELA IBHAYIBHILI ELAKUTSHINTSHA NGAYO UKUPHILA KWAMI:

Ngathi sengifunda iBhayibhili ngaqalisa ukunanzelela ukuthi kulezinto okwakumele ngizitshintshe empilweni yami. Ivesi eyatshaya kwathophela enhliziyweni ngeka-​2 Khorinte 7:1. Ivesi le isikhuthaza ukuthi ‘sizihlambulule ezintweni zonke ezingcolisa umzimba.’

Yikho ngabona kungcono ukuthi ngitshiye ukubhema lokunatha kakhulu. Kwakunzima sibili ngoba izinto lezi zasezisegazini. Kodwa ngangizimisele ukwenza izinto ezithokozisa uNkulunkulu. Okwanginceda kakhulu yikwenza okutshiwo kuRoma 12:2 othi: “Yekelani ukubunjwa ngumumo lo wezinto, kodwa guqulwani litshintshe indlela elicabanga ngayo.” Ngabona ukuthi ukuze ngitshiye imikhuba engangiyenza, kumele ngitshintshe indlela engicabanga ngayo ukuze ihambelane lendlela uNkulunkulu acabanga ngayo. UNkulunkulu wangincedisa ngatshiya ukubhema lokunatha kakhulu.

Ngathwala nzima kakhulu ukukwekela ukukhuluma inhlamba. Ngangikwazi okutshiwo liBhayibhili ku-Efesu 4:29 othi, “Akungaphumi ilizwi elibolileyo emilonyeni yenu.” Lanxa kunjalo angizange ngenelise ukutshintsha. Okunye okwangincedayo yikucabangisisa ngamazwi aku-Isaya 40:26. Ivesi le ithi: “Phakamisani amehlo enu likhangele phezulu. Ngubani odale izinto zonke lezi? Ngulowo okhokhela ibutho lazo, abale yinye ngayinye, azibize zonke ngamabizo azo. Ngenxa yamandla akhe amakhulu, lamandla akhe amangalisayo, akula leyodwa engekhoyo.” Ngacabanga ukuthi nxa uNkulunkulu elamandla okudala zonke izinto engizithandayo ezisemhlabeni, angehlulwa yini ukungipha amandla okuthi ngitshintshe ngenze izinto azifunayo. Ukuthandaza lokuzimisela kwanginceda ngenelisa ukutshiya amazwi abolileyo.

INDLELA ENGISIZAKALE NGAYO:

Angizange ngithole ithuba lokuxoxa labantu abanengi emaplazini engangisebenza khona ngoba ngangihlala ngikhangele izifuyo. Imihlangano yaboFakazi bakaJehova isingifundise okunengi ukuze ngenelise ukuwabeka kuhle amazwi nxa ngixoxa labanye. Okunye esengisenelisa ukukwenza yikutshela abanye izindaba ezinhle zoMbuso kaNkulunkulu.—UMathewu 6:9, 10; 24:14.

Sengileminyaka ngikholisa ukuba ngumdala ebandleni. Ukuncedisa abafowethu labodadewethu engikhonza labo yisibusiso sibili kimi. Kodwa ngingathi isibusiso esikhulu kimi yikhonza uJehova ndawonye lomkami ongithandayo kanye labantwabethu.

Ngimbonga ngingaqedi uJehova ukuthi wangikhetha ngingumuntu ongafundanga okuyangaphi wasengifundisa. (U-Isaya 54:13) Ngivumelana lawo sibili amazwi akuZaga 10:22 athi: “Isibusiso sikaJehova senza umuntu anothe.” Mina lemuli yami sikhangelele phambili ekufundeni okunengi ngoJehova futhi sihlale simkhonza kuze kube nini lanini.