Impilo Engcono Isiseduze!

“Kuseyisikhatshana nje, ababi bazabe bengasekho . . . Kodwa abathobekileyo bazakudla ilifa lelizwe bakholise ukuthula okukhulu.”—IHUBO 37:10, 11.

UYAFISA yini ukubakhona ngesikhathi kusenzakala lokhu? Akuthandabuzwa ukuthi uyafisa. Kulezizatho ezingakwenza ukholwe ukuthi sekuseduze ukuthi isiphrofetho lesi sigcwaliseke.

Ezihlokweni ezidlulileyo sixoxe ngezinye iziphrofetho eziseBhayibhilini ezitshengisa ukuthi siphila “ezinsukwini zokucina.” (2 KuThimothi 3:1-5) UNkulunkulu waphefumulela abantu ababhala iBhayibhili ukuthi basitshele izinto lezo ukuze sibe lethemba. (KwabaseRoma 15:4) Ukugcwaliseka kweziphrofetho lezo kutshengisa ukuthi sekuseduze ukuthi inhlupho esilazo ziphele.

Kuzakwenzakalani nxa izinsuku zokucina zingaphela? UMbuso kaNkulunkulu uzabusa bonke abantu. (UMathewu 6:9) Zwana ukuthi iBhayibhili lithi impilo izabe isinjani ngalesosikhathi:

● Indlala izaphela du. “Akuthi amabele ande elizweni lonke; azunguze eziqongweni zamaqaqa.”—IHubo 72:16.

● Imikhuhlane izaphela. ‘Akulamuntu ozakuthi, “Mina ngiyagula.”’—U-Isaya 33:24.

● Umhlaba uzatshintshwa ube muhle. ‘Inkangala lelizwe elomileyo kuzathokoza; inkangala izajabula iqhakaze.’—U-Isaya 35:1.

Lezi ngezinye nje iziphrofetho ezilutshwana osekuseduze ukuthi zigcwaliseke. Nxa ufuna ungaxoxa laboFakazi bakaJehova uzwe ukuthi kuyini okwenza bangathandabuzi ukuthi impilo engcono isiseduze.