6. Umsebenzi Wokutshumayela Owenziwa Emhlabeni Wonke
“Lezizindaba ezinhle zoMbuso zizatshunyayelwa emhlabeni wonke.”—UMATHEWU 24:14.
● UVaiatea uhlala endaweni ekhatshana esesihlengeni sePacific eTuamotu Archipelago. Lanxa eTuamotu kulezindawo ezinengi eziqheleleneyo, kuhlala abantu abangaba ngu-16 000 kuphela. Kodwa uVaiatea labomakhelwane bakhe sebeke bavakatshelwa ngoFakazi bakaJehova. Kuyini okwenza oFakazi bayefika endaweni le? Yikuthi bafuna ukutshela bonke abantu izindaba ezinhle zoMbuso kaNkulunkulu kungelani lokuthi bahlala ngaphi.
UBUFAKAZI BUTSHENGISANI? Izindaba ezinhle zoMbuso sezitshunyayelwe ezindaweni ezinengi kakhulu emhlabeni. Ngo-2010, oFakazi bakaJehova batshumayele okwamahola adlula 1,6 bhiliyoni emazweni angu-236. Lokhu kutsho ukuthi usuku ngalunye uFakazi oyedwa utshumayele imizuzu engaba ngu-30. Eminyakeni elitshumi esanda kwedlula oFakazi banike abantu amabhuku akhuluma ngeBhayibhili adlula 20 bhiliyoni.
OKUJAYELE UKUKHULUNYWA NGABANGAVUMELANI LESIPHROFETHO LESI. Sekulezinkulungwane zeminyaka abantu betshumayela.
ABAKUTSHOYO KULIQINISO YINI? Kuliqiniso ukuthi kulabanengi asebeke batshumayela, kodwa bebekwenza okwesikhathi esincane njalo bebetshumayela lasezindaweni ezilutshwana. OFakazi bakaJehova batshumayela ngendlela ehlelekileyo futhi umsebenzi lo bawenza ezindaweni ezinengi ukuze benelise ukutshumayeza abantu abanengi kakhulu. Lanxa oFakazi bebehlukuluzwa ngendlela ebuhlungu, abazange bayekele ukutshumayela.a (UMakho 13:13) OFakazi bakaJehova basebenzisa isikhathi sabo ukuze batshumayele njalo banika abantu amabhuku mahala, akulamali abayiphiwayo ukuze benze umsebenzi lo. Imali yokuqhuba umsebenzi wabo ivela eminikelweni ekhitshwa ngabantu ngokuthanda kwabo.
UCABANGANI? ‘Izindaba ezinhle zoMbuso’ zitshunyayelwa emhlabeni wonke yini? Ukugcwaliseka kwesiphrofetho lesi kutsho ukuthi kukhona yini okungcono okuzayo?
[Amabala angaphansi]
a Ukuze uthole okunengi bukela amavidiyo aboFakazi bakaJehova alandelayo: Faithful Under Trials, Purple Triangles lethi Jehovah’s Witnesses Stand Firm Against Nazi Assault.
[Umfanekiso osekhasini 9]
“Sizaqhubeka sitshumayela izindaba ezinhle zoMbuso ngamandla ethu wonke njalo sisebenzisa zonke izindlela ukuze sitshumayeze abantu abanengi, uJehova aze athi sekwanele.”—2010 YEARBOOK OF JEHOVAH’S WITNESSES.