Woba Lesibindi

1. Sizaxoxa ngani esahlukweni lesi?

EBHUKWINI leli sixoxe ngezibonelo ezinengi zabantu abatshengisa ukuthi balesibindi. Sabona lokuthi singabalingisela njani. Kodwa kusesekunengi esingakufunda eBhayibhilini mayelana lesibindi. Phela banengi abantu okukhulunywa ngabo eBhayibhilini abatshengisa ukuthi balesibindi esingazange sixoxe ngabo ebhukwini leli. Esahlukweni lesi sizaxoxa ngokunye okuqakathekileyo okuzasinceda ukuthi sibe lesibindi.

2. Yiziphi ezinye izinceku zikaNkulunkulu ezazithembekile ezatshengisa ukuthi zilesibindi?

² Bakhona yini obaziyo ababa lesibindi okukhulunywa ngabo eBhayibhilini, abangazange baqanjwe ebhukwini leli? Kungenzeka ucabanga ngabaphrofethi abanjengo-Isaya, uJeremiya, uHezekheli, uJona loMalakhi. Kumele ukuthi umphostoli uPhawuli wayebhala ngabanye babo ngesikhathi esithi: “Abanye babelingwa ngokwenziwa inhlekisa langokubhaxabulwa, abanye benziwa okwedlula lapho, babotshwa ngamaketane njalo baphoselwa emajele.” Waphinda wathi, ‘Abanye babeswela, behlupheka futhi bephethwe kubi.’ Abanye baze babulawa lokubulawa. (Heb. 11:​36, 37) Lanxa kunjalo baba lesibindi baqhubeka bekhonza uJehova uNkulunkulu.

3-4. Abesifazana ababili abangaqanjwa ngamabizo bayincedisa njani iNkosi uDavida ngesikhathi isebunzimeni?

³ IBhayibhili alibaqambi ngamabizo bonke ababelesibindi. Cabanga ngesibonelo sabesifazana ababili abaphila ngezinsuku zeNkosi uDavida. Abesifazana laba batshengisa ukuthi balesibindi bafaka ukuphila kwabo engozini ngesikhathi uDavida ebalekela umntanakhe u-Abhisalomu. U-Abhisalomu wayeziphakamisa futhi elolunya. Wayefuna ukuthathela uyise ubukhosi yikho uDavida wabaleka eJerusalema. UDavida wacela umphristi uZadokhi ukuthi abuyele eJerusalema ukwenzela ukuthi abe emtshela amacebo ayekhandwa ngu-Abhisalomu. UZadokhi wathi esezwe elinye icebo lika-Abhisalomu wathuma “enye incekukazi” engaqanjwa ngebizo ukuthi iyetshela abangane bakaDavida. Incekukazi le yaba lesibindi yahamba lanxa lokhu kwakungayibulalisa. Abangane bakaDavida bathi sebesiyatshela uDavida babonwa lijaha elahle lagijima layatshela u-Abhisalomu. Babaleka bayacatsha komunye umuzi phakathi komgodi wamanzi. Omunye owesifazana laye ongaqanjwanga ngebizo owayeyinkosikazi yendoda eyayingumnikazi walowo mgodi wendlala ilembu phezu komgodi wasethela amabele acholiweyo phezulu. Izinceku zika-Abhisalomu zathi zifika zimbuza ukuthi amadoda kaDavida amabili ayengaphi, owesifazana lo wazilayela indlela engayisiyo. Abesifazana laba ababili baba lesibindi sokuvikela inkosi eyayikhethwe ngoJehova.—2 Sam. 15:​23-37; 17:​8-22.

⁴ EBhayibhilini kulezibonelo ezinengi zamadoda labesifazana abatshengisa ukuthi balesibindi. Abanye baqanjwa ngamabizo, abanye abaqanjwanga. Abanye babenothile, abanye bangabayanga. Abanye belezikhundla emphakathini, abanye bengabantukazana. Kodwa bonke baba lesibindi bathokozisa uNkulunkulu futhi singafunda okunengi kubo.

Ukuqakatheka Komthandazo

5-7. Kuyini okwanceda uPhawuli waba lesibindi ngesikhathi ehlukuluzwa?

⁵ Ungenzani ukuze ube lesibindi njengabantu okukhulunywa ngabo eBhayibhilini? Kumele ukhumbule ukuthi abantu labo abazalwanga belaso isibindi njalo abazange baphumelele ukukwenza lokhu ngamandla abo. Kukhona abakwenzayo okwabanceda baba lesibindi. Benzani?

⁶ Cabanga ngesibonelo somphostoli uPhawuli. Wathi eseFiliphi eloSila bahlaselwa, badatshulelwa izigqoko zabo futhi batshaywa ngemiqwayi basebephoselwa esitokisini esimnyama tshu, inyawo zabo zibotshelwe emaplankeni amakhulu. (Imiseb. 16:​12, 19-24) Wathi esekhululiwe, kambe wayengesabi yini? Kumele ukuthi wayesesaba, phela laye wayengumuntu njengathi. UJehova wayemnike lomsebenzi wokuthi ayetshumayela eThesalonika. Manje wasithatha ngaphi isibindi sokuthi aqhubeke etshumayela?

⁷ Wabhala wathi: “Lanxa saqala sahlupheka njalo saphathwa kubi eFiliphi njengoba likwazi, uNkulunkulu wethu wasincedisa ukuthi siqunge isibindi ukuze silitshele izindaba ezinhle eziphathelane laye lanxa sasiphikiswa kakhulu.” (1 Thes. 2:2) Wayekwazi ukuthi kumele abe lesibindi ukuze enze lokhu ayekutshelwe nguJehova. Pho wasithatha ngaphi isibindi? Kambe ukuthi isibindi leso wayezelwe elaso yini? Ngitsho, kwakumele athembele kuNkulunkulu ukuze amncedise ukuthi abe laso. Yikho wathandaza kuJehova emcela futhi wawuphendula umthandazo wakhe.

8. Ungenzani ukuze ube lesibindi njengoPhawuli?

⁸ Lawe ungalingisela uPhawuli. Ungakhathazeki ngokuthi mdabuko wakho awulaso isibindi. Ungathandaza kuJehova uNkulunkulu umcele ukuthi akuncedise ube lesibindi.—Imiseb. 4:29.

9. Kungani kuqakathekile ukuthi sicele uJehova asiphe ukholo oluqinileyo?

⁹ Ungamcela uJehova ukuthi akunike umoya ongcwele ukuze ube lokholo oluqinileyo. (Gal. 5:​22, 23) Ukholo luzakunceda wenelise ukumelana loSathane futhi luzakuvikela uhlale uthembekile kuJehova. (Efe. 6:16) Ukholo lulamandla yikho iBhayibhili lisithi ‘lunqoba umhlaba.’ (1 Joh. 5:4) Ukuba lokholo kuJehova yikho okwenza sibe lesibindi. Nxa umthemba ukuthi uzakuncedisa, uyaba laso isibindi sokumelana laloba yibuphi ubunzima ohlangana labo. Yikho wonke amaKhristu kuqakathekile ukuthi enze lokho okwenziwa ngabaphostoli bakaJesu. Simcele uJehova ukuthi ‘asincedise sibe lokholo oluqinileyo.’—Luk. 17:5.

“Wobani Lesibindi!”

10-11. Yindaba uPhawuli watshela amaKhristu angamaHebheru ukuthi abe lesibindi?

¹⁰ UJesu wayetshilo ukuthi iJerusalema lalizabhujiswa. Sekusele iminyaka emilutshwana ukuthi lokhu kwenzakale, uPhawuli wabhalela amaKhristu angamaHebheru ayehlala eJerusalema lamanye ayehlala eduze khonapho ukuthi alungele izenzakalo lezo ezazinzima, ezaziseduze ukuthi zenzakale. (Luk. 19:​41-44; 21:​20-24) Manje uPhawuli wawakhuthaza njani ukuthi abe lesibindi? Asikhangeleni amazwi akhe atholakala esethulweni sebhuku leli. Wakhuluma ngesithembiso sikaJehova esithi: “Angisoze ngikutshiye loba sekutheni, angisoze ngikulahle loba sekutheni. Lokhu kwenza sibe lesibindi sokuthi: ‘UJehova ungumsizi wami, angisoze ngesabe. Umuntu angangenzani?’”—Heb. 13:​5, 6.

¹¹ IBhayibhili alisitsheli ukuthi kwenzakalani ngo-70 C.E., ngesikhathi iJerusalema libhujiswa. Kodwa esikwaziyo yikuthi amaKhristu ayethembekile alalela amazwi kaPhawuli. Aqunga isibindi, enza akutshelwa nguJesu ‘abalekela ezintabeni’ ngesikhathi esifaneleyo.—Luk. 21:​20, 21.

12. (a) Yisiphi isithembiso esizakunceda nxa usebunzimeni? (b) Kuyini okwenziwa ngabanye abazalwane okutshengisa ukuthi babe lesibindi futhi wena uzimisele ukwenzani? (Khangela ibhokisi elithi “Lingisela Isibindi Ababelaso.”)

¹² UJehova uzakunika isibindi esizakuncedisa khathesi lasesikhathini esizayo. (Hez. 38:​1, 2, 10-12; Mat. 24:21) Hlala ukhumbula ukuthi uJehova uthembisa ukuthi uzakuvikela. (Hez. 38:​19-23; 2 Thes. 3:3) Kasoze abatshiye bonke abamthandayo futhi abalokholo kuye. Lokho uJehova akutshela uJoshuwa kungakunceda lawe lamuhla. Wathi: “Qina ube lesibindi.” (Jos. 1:​7, 9, 18) Ungawakhohlwa lamazwi uJesu awatshelwa abafundi bakhe athi: “Wobani lesibindi!” UJesu uthembisa ukuthi uzakunika umoya ongcwele ovela kuYise futhi lokhu asikuthandabuzi. Umoya ongcwele uzakunceda ube lesibindi sokuthi uhlale uthembekile kuJehova kungelani lobunzima ohlangana labo. (Joh. 14:26; 15:​26, 27; 16:33) Ungaba laso sibili isibindi.

13. Kuyini okuzakunceda ukuthi ube lesibindi khathesi?

¹³ Akucabange ukuthi kuzabe sekumnandi njani ukuphila emhlabeni sekulokuthula. Cabanga lokuthi uzathokoza njani ususamukela bonke abayabe sebevuswe nguJehova. Uzabona amanye amadoda labesifazana obale ngabo ebhukwini leli labanye abatshengisa ukuthi balokholo. Kambe bazazisola yini ngokuthi bakhonza uJehova bethembekile emhlabeni lo omubi? Ngitsho. Wena-ke uzazisola yini ngesikhathi usebenza labo, lisenza umhlaba lo usiba lipharadayisi? Asithandabuzi ukuthi awusoze uzisole ngitsho lakancane ngokuthi watshengisa ukuthi ulesibindi lokuthi uyamthanda uJehova. Qhubeka uzimisele ukukhonza uJehova ulesibindi ngoba awusoze uzisole okwempilo yakho yonke.