Abril

Ikinon moneki matikneltokakan ye topatka omotemakak para matechpaleui icuerpo uan ieso (Efes. 1:7). Jesús okijto “oksekimej ichkamej” amo moneki kikuaskej pan nion koniskej vino ijkuak sejse xiuitl kilnamikij iCena toTeko (Juan 10:16). Pero noijki techpaleuia tlen okichi Jesús maski amo tikkuaj pan nion tikonij vino. Sapanoua techpaleuia porque tikneltokaj Jesús topatka omotemakak (Juan 6:53). Akinmej kikuaj pan uan konij vino kiteititiaj pouij itech yankuik acuerdo uan tlanauatiskej iuan Jesús ompa iluikak. Techpaleuia maski titlapejpenalmej noso tipouij inuan oksekimej ichkamej. Non techmachtia nochipa tiyoltoskej tla tikneltokaj Jesús topatka omotemakak. w24.12 13 párrs. 14, 16

Ijkuak Jesús okichi iCena, okinmakak iapóstoles pan tlen amo okipiaya levadura uan okinmilui okineskayotiaya icuerpo. Satepan okinmakak vino uan okinmilui okineskayotiaya “estli tlen ika mochiua acuerdo” (Mar. 14:​22-25; Luc. 22:20; 1 Cor. 11:24). Non yankuik acuerdo okichi Jehová “iuan altepetl Israel”. Non kijtosneki okichi san inuan akinmej tlanauatiskej iuan Cristo itech iTekiuajkayo (Heb. 8:​6, 10; 9:15). Ijkuak Jesús okichi iCena okintlapoui ‘tlen amo miakej’. Ijkuakon okintlapoui iapóstoles uan yejuan okatkaj ‘tlen amo miakej’. Nonmej apóstoles yaskiaj iluikak uan ompa yetoskej iuan Jesús. w24.12 11 párrs. 9, 10

Se tlakatl okitemakti Jesús uan akinmej okikokoliayaj okikitskijkej, okiuijuikaltijkej uan okitlajtlakoltijkej okichi tlen amo kuali. Satepan sekimej soldados okipilojkej Jesús itech se kouitl para kimiktiskej. Ye otlaxiko maski otlajyoui pero Jehová okachi omoyolkoko porque okitak tlen okipanotoka iKone. Jehová kitlasojtla iKone pero amitlaj okichi maski kipia miak chikaualistli. ¿Tleka amitlaj okichi? Porque sapanoua techtlasojtla. Ikinon okitekauili makixpolokan iKone ijkon okiteititi sapanoua mitstlasojtla. ¿Tikpatioita tlen okichi para mitsmakixtis imak tlajtlakoli uan mikilistli? (1 Juan 4:​9, 10). Ye kineki techpaleuis matiktekichiuilikan maski titlajtlakolejkej uan satepan kipojpolos tlajtlakoli. w24.08 6 párrs. 13, 14

Tikajsikamatiskej Jehová techtlasojtla tla timokuayejyekouaj sapanoua miak ipati tlen okichi ijkuak topatka okitemakak iKone. Satanás kijtoua tikkauaskej toTajtsin Dios ijkuak titlajyouiskej. Ikinon okitekauili makitlajyouiltikan iKone uan ijkon omotak amo melauak tlen kijtoua Satanás (Job 2:​1-5). Jehová okiualitoka desde iluikak ijkuak iKone okipinauijkej, ijkuak soldados okiuitekej uan ijkuak okipilojkej itech kouitl. Noijki okitak ijkuak oixpoliuik iKone (Mat. 27:​28-31, 39). Jehová uelis itlaj kichiuaskia para amo ijkon makipano iKone (Mat. 27:​42, 43). Pero tla kipaleuiskia iKone amo topatka motemakaskia uan amo tikchiaskiaj itlaj kuali satepan. Ikinon Jehová okitekauili makimiktikan iKone. w25.01 22 párr. 7

Itech 16 de nisán xiuitl 33, idiscípulos Jesús omoyolkokouayaj uan omomojtiayaj. Ome discípulos okiskej Jerusalén uan oyajkej Emaús. Ijkuak discípulos onejnentiayaj, se tlakatl omotoki innauak uan inuan oyajki. Yejuan okiluijkej omoyolkokouayaj porque okimiktijkej Jesús. Satepan non tlakatl itlaj okinmilui tlen amo keman okilkajkej. Opejki kintlapouia “tlen okijkuilo Moisés uan tlen okijkuilojkej profetas”. Ijkon okinyekilui tleka okitlajyouiltijkej uan okimiktijkej Mesías. Ijkuak oajsitoj Emaús, discípulos okajsikamatkej non tlakatl ye Jesús tlen okiyolitijkej (Luc. 24:​13-35). Jesús miak uelta okinmonextili idiscípulos ijkuak ok okatka 40 tonal nikan tlaltikpak. Jesús okinyolchika idiscípulos ikinon ayakmo omoyolkokouayaj nion omomojtiayaj. Non okinpaleui mapakikan uan mamoyolchikauakan matetlapouikan uan matlamachtikan iTekiuajkayo toTajtsin Dios. w24.10 12 párrs. 1-3

Se chokotsin moskaltia ijkuak panoti xiuitl. Pero akin kineki kipias chikauak itlaneltokilis moneki itlaj kichiuas uan amo san mochias mapano xiuitl. Tokniuan tlen ochantiayaj Corinto okikakej kuali tlajtoli, omoapolaktijkej, okiselijkej espíritu santo uan okichijkej tlen okinmachti apóstol Pablo (Hech. 18:​8-11). Pero opanok seki xiuitl uan ayamo okipiayaj chikauak intlaneltokilis maski yomoapolaktijkaj (1 Cor. 3:2). Tla tiknekij tikpiaskej chikauak totlaneltokilis, achto moneki tiknekiskej ijkon tikchiuaskej. Amo keman kipiaskej chikauak intlaneltokilis akinmej kinekij yetoskej ken konemej (Prov. 1:22). Tejuan amo tiknekij tikchiuaskej ijkon ken kichiuaj sekimej tlen yiuejueyij. Yejuan san kichiaj makinmiluikan inpapanuan tlen kichiuaskej noso tlen kipejpenaskej kichiuaskej. Tejuan tiknekij timochijchikauaskej tikpiaskej chikauak totlaneltokilis. Tla tikitaj amo tikpiaj chikauak totlaneltokilis, matiktlatlaujtikan Jehová ‘makichiua matiknekikan ijkon tikchiuaskej uan matechmaka chikaualistli para matikchiuakan’ (Filip. 2:13). w24.04 4 párrs. 9, 10

Jehová techiluia ken momachilia ijkuak ikaj kixkomaka (Ezeq. 33:11). Jehová amo keman teixpolojtikisa tla amo moneki ijkon kichiuas. Ye teiknomati uan nochipa ijkon kiteititia ijkuak moneki. ¿Akinmej tikmatij amo kinyolitiskej? Biblia techiluia sekimej tlen amo kinyolitiskej. Jesús okijto Judas Iscariote amo kiyolitiskej (Mar. 14:21; noijki xikita Juan 17:12 uan nota de estudio). Judas Iscariote kuali okimatiaya tlen okichijtoka ijkuak okixnamik Jehová uan iKone (xikita Mar. 3:29 uan xikinmita notas de estudio). Jesús okijto sekimej teopixkej tlen okixnamikej noijki amo kinyolitiskej (Mat. 23:33; noijki xikita Juan 19:11 uan nota de estudio kanin kijtoua “del hombre”). Apóstol Pablo okijto akinmej kixnamikij Jehová uan ialtepe amo kinyolitiskej tla amo moyolkopaskej (Heb. 6:​4-8; 10:29). w24.05 4 párrs. 10, 11

Satanás amitlaj techtoktis tla tejuan tikatej inauak Jehová (1 Juan 3:8). Jehová noijki techmaluis ijkuak tiyetoskej itech xochitlali para kuali iuan matimouikakan uan ayakmo tiixpoliuiskej (Apoc. 21:4). Tikpatioitaj toTajtsin Dios techkalotia porque techpaleuia nochipa iuan matimouikakan (Ezeq. 37:27). ¿Tlen moneki tikchiuaskej tla tiknekij nochipa matechkaloti? Tla ikaj techyoleua matiakan ikalijtik, techpaktiskia matechilui tlen tikchiuaskej. Tejuan noijki tiknekij Jehová matechilui tlen kipaktia matikchiuakan porque ye techkalotijtok. Sapanoua tiktlasojtlaj ikinon timochijchikauaj tikchiuaskej tlen ye kipaktia (Col. 1:10). Tla tiktlakaitaj amo tikchiuaskej tlen amo kipaktia. Tiknekij tiyetoskej tiyolyamankej ixpan toTajtsin Dios (Miq. 6:8). w24.06 4 párrs. 8, 9

Ye otlaneltokaya ikinon Jehová okilui makimikti itelpoch tlen omotokayotiaya Isaac. Abrahán sapanoua omoyolkoko ijkuak okiluijkej ijkon makichiua. Pero ye okitlakamatki toTajtsin Dios. Ijkuak yikimiktiskia ikone, Jehová amo okikauili ijkon makichiua. Tlen okichi Abrahán techmachtia itlaj miak ipati tinochtin akinmej titlaneltokaj. Techmachtia Jehová techtlasojtla ikinon topatka kitemakaskia ikone makimiktikan (Gén. 22:​1-18). Opanok miak xiuitl uan Jehová okinnauati israelitas makintemakakan yolkamej para makinmiktikan uan ijkon ye kintlapojpoluiskia (Lev. 4:​27-29; 17:11). Non okiteititi Jehová kitemakaskia itlaj okachi ipati para tinochtin techmakixtis. ToTajtsin Dios okinnauati profetas makiyekijtokan ‘ikone siuatl’ kitlajyouiltiskiaj uan kimiktiskiaj. Ijkon techmakixtiskia imak tlajtlakoli uan mikilistli (Is. 53:​1-12). w24.08 4 párrs. 7, 8

Ijkuak tiktlajtoltiskej Biblia matikitakan ken tikchiuaskej tlen otiktlajtoltijkej. Ijkuak tiktlajtoltiskej Biblia matimotlajtlanikan: “¿Ken uelis nikchiuas tlen axkan nimomachtijtok noso ken nechpaleuis satepan?”. Matikijtokan tiktlajtoltijtokej 1 Tesalonicenses 5:​17, 18. Satepan matimokuayejyekokan ken timotlatlaujtiaj. Matimotlajtlanikan: “¿Kox nochipa timotlatlaujtiaj ika nochi toyolo? ¿Tlen tlamantli techpaktiskia tiktlasojkamatiliskej toTajtsin Dios?”. Xamo tikijtoskej tiknekij tiktlasojkamatiliskej eyi tlamantli. Tla timokuayejyekoskej maski san kanaj keski minutos, techpaleuis matikchiuakan tlen otimomachtijkej. Okachi kuali tiktekichiuiliskej Jehová tla nochipa ijkon tikchiuaskej. w24.09 4, 5 párrs. 9, 10

Jehová okitlali toyolipan matipakikan ijkuak itlaj tiktemakaj uan amo ijkuak itlaj tikseliaj. Techpaktia tikinpaleuiskej tokniuan uan tipakij ijkuak techtlasojkamatiliaj. Pero uelis tipakiskej maski amo techtlasojkamatiliskej porque tejuan tikmatij otikchijkej tlen kuali. Nochipa matikilnamikikan ijkuak itlaj tiktemakaskej Jehová okachi techteochiuas ijkon ken kijtoua 2 Crónicas 25:9. Matikilnamiktokan san Jehová kitemaka nochi tlen kipia. Sapanoua tipakij ijkuak ye techteochiua. Ikinon nochipa matikinmakakan oksekimej tlen tikpiaj ijkon ken toTajtsin Dios kichiua. w24.09 30, 31 párrs. 20, 21

Jehová teiknomati porque kipia kualtsin iyelis (Sal. 103:13; Is. 49:15). Techiknomati ijkuak titlajyouiaj uan kiyolkokoua tlen techpanoua (Zac. 2:8). Ye techpaleuia inauak matimotokikan uan iuan matimouikakan (Sal. 25:14; Hech. 17:27). Noijki yolyamanki porque “ye tlachia tlakxitlan para kitas iluikak uan tlaltikpak, keualtia akin yolyamanki” (Sal. 113:​6, 7). Tiyolpakij tikueyichiuaskej toTajtsin Dios porque kualtsin iyelis. Tikueyichiuaj Jehová porque tiknekij oksekimej makixmatikan. Miakej amo kixmatij toTajtsin Dios uan kineltokaj tlen amo melauak. Ijkon kichiuaj porque Satanás kinkajkayaua uan “amo kinkauilia matlachiakan” para makixmatikan toTajtsin Dios (2 Cor. 4:4). Satanás kinkajkayaua uan kineki makineltokakan toTajtsin Dios momakopa, amo tetlasojtla uan ye itlajtlakol nochi tlen panoua ipan tlaltikpak. Pero tejuan tikmatij tlen melauak tlamachtia Biblia uan tiknekij tikinpaleuiskej oksekimej makixmatikan toTajtsin Dios uan makiueyichiuakan (Is. 43:10). w25.01 3 párrs. 6, 7

IKone toTajtsin Dios amo keman otlajtlakolchi uan okinchiuaya milagros. Pero Satanás okichi sekimej makijtokan tlen amo melauak. Ijkon okichijkej teopixkej tlen otlayekanayaj. Yejuan okinmiluijkej oksekimej Jesús okinkixtiaya ejekamej porque ‘Diablo okimakaya chikaualistli’ (Mar. 3:22). Satepan ijkuak okixkomakatokaj Jesús, teopixkej tlen otlayekanayaj okijtojkej Jesús okiuijuikalti toTajtsin Dios. Noijki okintlatlaluijkej akinmej ompa okatkaj makimiktikan Jesús (Mat. 27:20). Ijkuak idiscípulos Cristo opejkej tetlapouiaj, akinmej okinkokoliayaj okinkuesojkej oksekimej para “makintlauelitakan” uan makintlajyouiltikan (Hech. 14:​2, 19). Revista Akin Tetlapouijtok 1 de diciembre 1998 okiyekijto tlen kijtoua Hechos 14:2 uan okijto: “Judíos tlen okinmixnamikiayaj tokniuan amo okinkakej. Pero noijki okichijkej oksekimej tlen amo judíos makinkokolikan tokniuan”. Satanás nochipa tlakajkayaua. Ikinon axkan ok kinkajkayaua “nochtin tlen chantij tlaltikpak”. w24.04 11 párrs. 15, 16

Jehová amo kita keman ikaj oixpoliuik para uelis kiyolitis. Jehová kuali tlaixkomaka uan kuali kipejpena tlen kineki kichiuas (Sal. 33:​4, 5). Kuali tikmatij Jehová nochi kuali kichiuas porque ye kajki “Juez itech nochi tlaltikpak”. Jehová amo kita kanin chanti ikaj para uelis kiyolitis. Jehová amo keman kinmitas ken “tentsomej” akinmej uejka chantij porque amo okimatkej tlen kijtosneki iTekiuajkayo (Mat. 25:46). Tla tejuan techtekipachoua tlen kinpanos nonmej personas, Jehová okachi kitekipachouaj. Amo tikmatij tlen kichiuas Jehová ijkuak panotos ueyi tlajyouilistli. Xamo sekimej kixmatiskej toTajtsin Dios uan kineltokaskej ijkuak ye kichipauas itoka inmixpan nochi altepemej (Ezeq. 38:16). w24.05 12 párrs. 14, 15

Tejuan tlen tiktekichiuiliaj Jehová techpaktia timosepanpaleuiskej (2 Cor. 8:4). Pero ualeua moneki timoyolchikauaskej tla tiknekij ijkon tikchiuaskej. Matikitakan tleka ijkon tikijtouaj. Ijkuak peua se guerra, tlayekankej kinyolchikauaj tokniuan, kinmakaj tlen ika mopanoltiskej uan kinpaleuiaj kuali mamouikakan iuan Jehová. Tlayekankej kinpaleuiaj maski uelis itlaj kinpanos. Miak ipati matitetlakamatikan ijkuak itlaj panotos uan ijkon amo timoxexeloskej. Ikinon matikchiuakan tlen technauatiskej tokniuan tlen tlapaleuiaj Betel (Heb. 13:17). Tlayekankej moneki kitlajtoltiskej miak uelta amatl kanin kijtoua tlen kichiuaskej ijkuak tlaxixinis (1 Cor. 14:​33, 40). Matiyetokan tiyolchikauakej pero noijki matiyetokan tiixtlamatkej (Prov. 22:3). Kuali matikitakan tlen uelis techpanos uan matimomaluikan. Matikneltokakan Jehová. Noijki techpaleuis amitlaj matechpano ijkuak tikinpaleuiskej tokniuan. w24.07 4 párr. 8; 5 párr. 11

Tekiua David okineltokaya Jehová porque kuali okixmatiaya. Okilui Jehová makipaleui ijkuak tekiua Saúl uan oksekimej okinekiayaj kitlajyouiltiskej. Ijkuak David okitak Jehová okinankili uan okimakixti, ye okijto: “¡Jehová yoltok!” (Sal. 18:46). David amo san okinekiaya kijtos Jehová melauak kajki. Se amochtli kijtoua tlen David okilui Jehová okiteititiaya okineltokaya “toTajtsin Dios melauak yoltok uan nochipa kipaleuia ialtepe”. David okitaya Jehová okipaleuiaya. Non okipaleui okachi makineltoka Jehová yoltok. Noijki okiyolchika uan okipaleui makitekichiuili uan makiueyichiua (Sal. 18:​28, 29, 49). Tla tikneltokaj Jehová yoltok tiyolpakiskej ijkuak tiktekichiuiliskej. Noijki ijkuak itlaj tikixnamikiskej uelis titlaxikoskej uan ye techpaleuis okachi matiktekichiuilikan. Noijki techpaleuis amo keman matikkauakan. w24.06 20, 21 párrs. 3, 4

¿Tlen techmachtia tlen apóstol Pablo okinmijkuilili tlen ochantiayaj Tesalónica? Amo san niman matikneltokakan tla tikkakij itlaj tlen amo mouika iuan tlen techmachtia Biblia noso ijkuak techiluiskej opanok itlaj tetlajtlachialti. Yiuejkika ompa Unión Soviética sekimej tlen okinkokoliayaj tokniuan okinmakakej se carta kanin okijtouaya san yejuan uelis moyekanaskiaj. Yejuan okinekiayaj makineltokakan non carta okiualtitlankej tokniuan tlen kinyekanaj iTlaixpantijkauan Jehová. Tokniuan okimatiayaj tlen melauak ikinon amo okineltokakej tlen ompa oijkuilitoka maski omotaya kuali okijkuilojkej. Axkan akinmej techkokoliaj kitlaliaj seki tlamantli tlen amo melauak itech internet noso redes sociales para techkajkayauaskej uan ijkon matimoxexelokan. Amo san niman matikneltokakan tlen tikkakij noso tlen tiktlajtoltiaj. Moneki achto matikitakan kox melauak tlen kijtouaj. Tla ijkon tikchiuaskej tikmaluiskej tlen kuali timokuayejyekouaj (2 Tes. 2:2; 1 Juan 4:1). w24.07 12 párrs. 14, 15

Okachi miak ipati ijkuak ikaj kipejpena motemakas ixpan Jehová uan kitekichiuilis inuan tokniuan. ToTajtsin Dios kineki nochtin ijkon makichiuakan. ¿Tleka ijkon kineki makichiuakan? Kineki iuan matimouikakan uan satepan nochipa matiyoltokan (Deut. 30:​19, 20; Gál. 6:​7, 8). Jehová techkauilia matikpejpenakan kox tiktekichiuiliskej uan amo techiluia moneki ijkon tikchiuaskej porque ijkon technauatia. Pero ¿tlen panos tla se tokni tlajtlakolchiua? Tla amo moyolkopa kiluiskej ayakmo pouis itech tlanechikol (1 Cor. 5:13). Pero Jehová kineki mamoyolkopa uan oksepa iuan mamouika. Ikinon okitemakak iKone para kintlapojpoluis akinmej moyolkopaj. ToTajtsin Dios sapanoua techtlasojtla ikinon kinpaleuia akinmej tlajtlakolchiuaj uan kinmiluia mamoyolkopakan (Zac. 1:3; Rom. 2:4; Sant. 4:8). w24.08 14 párrs. 1, 2

Ijkuak apóstol Juan okijkuilo carta eyi, sekimej otlamachtiayaj tlen amo melauak uan okinxexelouayaj tokniuan. Pero oksekimej ok okichiuayaj “tlen melauak”, okitlakamatiayaj Jehová uan okichiuayaj tlen okinnauati (2 Juan 4, 6). Nonmej tokniuan okiyolpaktiayaj Jehová uan noijki Juan (Prov. 27:11). ¿Tlen techmachtia tlen okijkuilo Juan? Okachi tipakiskej tla amo keman tikkauaskej toTajtsin Dios (1 Juan 5:3). Tejuan kuali timomachiliaj porque tikmatij tikyolpaktiaj Jehová. Ye yolpaki ijkuak tikixtopeuaj tlen techyoltilana uan timochijchikauaj tikchiuaskej tlen kuali. Ángeles noijki pakij ijkuak tiktlakamatij Jehová (Luc. 15:10). Tejuan noijki tipakij ijkuak tikmatij oksekimej tokniuan amo kikauaj toTajtsin Dios (2 Tes. 1:4). Ijkuak kipojpoloskej nochi tlen Satanás kinauatijtok, tipakiskej porque amo keman otikkajkej toTajtsin Dios. w24.11 12 párrs. 17, 18

Xamo timotlajtlania keman uelis tikiluis ichpochtli tlen tikmachilia. Tla san niman tikiluis xamo mokuayejyekos amo tikmati timochias (Prov. 29:20). Pero tla amo tikiluis uan yokitak mitspaktia xamo mokuayejyekos amo tikmati tlen tikneki (Ecl. 11:4). Amo kijtosneki moneki timonamiktis iuan ichpochtli tla tikiluis tlen tikmachilia. Pero xikilnamikto ijkuak tikiluis ichpochtli tlen tikmachilia, kijtosneki kuali yotimokuayejyeko uan yotimoyektlali para timonamiktis. ¿Tlen tikchiuas tla tikita ikaj tikpaktia? Tla amo mitspaktia, xikilui uan amitlaj xikchiua tlen kiteititis mitspaktia. Ximokuayejyeko ken momachilis tla san tikyolkokos (Efes. 4:25). w24.05 22, 23 párrs. 9, 10

Tlanauatiskej iuan Jesús ompa iluikak san akinmej melauak okinpejpenkej uan tetlakamatij. Tla se tokni tlapejpenal amo motlachilijtok, amo uelis yas iluikak inuan oksekimej tlapejpenalmej (Mat. 24:31). Pero tinochtin akinmej tiknekij nochipa tichantiskej nikan tlaltikpak moneki matikkakikan tlen okijto Jesús, matitetlakamatikan uan matimotlachilijtokan. Tejuan tikixmatij Jehová ikinon tikneltokaj tlen kipejpena kichiuas. Amo timotekipachouaj tla Jehová ok kinpejpena sekimej tokniuan mayetokan tlapejpenalmej. Matikilnamikikan ijkuak Jesús okijto se tlakatl okipiaya itlal uan okintlakeuato sekimej tlakamej makitekitij uva saiktlami hora (Mat. 20:​1-16). Akinmej saiktlami opejki tekipanouaj noijki okintlaxtlaui ijkon ken akinmej achto opejkej tekipanouaj. Tlapejpenalmej noijki ijkon kinteochiuaskej ijkuak kinuikaskej iluikak maski yikin okinpejpenkej. w24.09 24 párrs. 15-17

Jesús otechititi tlen moneki tikchiuaskej ijkuak itlaj techtoktiskej porque ye okitlajyouiltijkej miak. Ijkon okipanok ijkuak sekimej ifamiliares okijtouayaj ye okuatlapolo uan amo okineltokiliayaj ye okatka Mesías. Teopixkej tlen otlayekanayaj okijtouayaj ye okipiaya chikaualistli porque ejekamej okimakayaj. Noijki soldados romanos okipinauijkej, okitlajyouiltijkej uan okimiktijkej (Mar. 3:​21, 22; 14:55; 15:​16-20, 35-37). Pero Jesús otlaxiko uan amo omomakopki. ¿Tlen techmachtia tlen okichi? (1 Ped. 2:​21-23). Jesús otechititi tlen moneki tikchiuaskej ijkuak itlaj techtoktiskej. Ye okimatiaya keman itlaj kijtos uan keman amitlaj kijtos (Mat. 26:​62-64). Amitlaj okijtouaya ijkuak oksekimej itlaj okitlajtlakoltiayaj (Mat. 11:19). Ijkuak Jesús itlaj okinmiluiaya akinmej okixnamikiayaj, amo okinuijuikaltiaya nion okinmiluiaya momakopaskia. w24.11 4, 5 párrs. 9, 10

Matikijtokan itlaj kualtsin otiktliokolijkej akin sapanoua tiktlasojtlaj uan kipaleuis miak. Timoyolkokoskej tla tikitaj amo kinejneki tlen otiktliokolijkej. Pero tipakiskej miak tla techtlasojkamatilis uan kinejnekis tlen otiktliokilijkej. ¿Tlen techmachtia nin tlamantli? Jehová topatka okitemakak iKone. Ye paki ijkuak tiktlasojkamatiliaj uan tikteititiaj tikpatioitaj topatka okitemakak iKone uan tiktlasojkamatiliaj techtlasojtla miak (Juan 3:16; Rom. 5:​7, 8). Xamo ayakmo okachi tikpatioitaskej Jesús topatka omotemakak ijkuak panoti xiuitl. Tipakij Jesús topatka omotemakak pero xamo yetoskia ken itlaj tiktlatiaj uan ompa tikilkauaj. Pero amo tiknekij ijkon matechpano ikinon moneki nochipa matimokuayejyekokan tlen topatka yokichijkej Jehová uan Jesús. w25.01 26 párrs. 1, 2

Tokni tlen tlapaleuis ken tlayekanki “amo mayeto se tlakatl tlen yikin opejki tlaneltoka”. Moneki kuali tlaneltokas maski ayamo kipia miak xiuitl omoapolakti. Moneki kiteititis ye yolyamanki ijkon ken Jesús okiteititi tla kineki tlapaleuis ken tlayekanki. Non kijtosneki makitekichiuili Jehová ken ye kineki uan ijkuak ye kinekis (Mat. 20:23; Filip. 2:​5-8). Noijki amo makikaua toTajtsin Dios, makintlakamati itlanauatiluan uan makichiua tlen kijtouaj akinmej kiyekanaj ialtepe. Akin kineki tlapaleuis ken tlayekanki moneki “makimati ken tlamachtis”. Pero non amo kijtosneki moneki sapanoua kuali tlamachtis para ijkon tlapaleuis. Porque sekimej amo okachi kuali tlamachtiaj ijkuak timonechikouaj noso kitaj oui. Pero kuali tlamachtiaj ijkuak tetlapouiaj uan ijkuak yauij kinyolchikauatiuij tokniuan. w24.11 23 párrs. 14, 15

Noijki okachi matitlatemokan ijkuak tikajsij se texto tlen amo tikajsikamatij. Satepan matimokuayejyekokan tlen otikajsikej uan tlen techmachtia itech Jehová, Jesús uan ken sapanoua techtlasojtlaj (Sal. 119:97). Amo matimotekipachokan tla amo tikajsij itlaj yankuik ijkuak timomachtiaj noso ijkuak tiktlajtoltiaj Biblia. Ijkuak timomachtiaj Biblia yetoskia ken tiktemouaj oro. Miakej uejkauaj miak tonal noso horas kitemouaj oro. Yejuan amo mosotlauaj kitemouaj oro maski amo ueyitsin kajsij. Pero tlen tikajsij itech Biblia okachi miak ipati uan amo ken oro (Prov. 8:10). Ikinon amo matimosotlauakan uan matiktlajtoltikan Biblia uan matimomachtikan (Sal. 1:2). w25.01 24, 25 párrs. 14, 15

Jehová kineki matikintlapojpoluikan akinmej techyolkokouaj (Sal. 86:5; Luc. 17:4; Efes. 4:32). Xamo ikaj kijtos noso kichiuas itlaj tlen sapanoua techyolkokos pero okachi timoyolkokouaj ijkuak se toyolikni noso se tofamiliar itlaj techtoktia (Sal. 55:​12-14). Ualeua ijkuak sapanoua timoyolkokouaj xamo tikmachiliaj ken yetoskia ikaj techtsopitia ika se espada (Prov. 12:18). Xamo tikijtoskej amo timoyolkokouaj uan amitlaj techpanoua. Pero tla ijkon tikchiuaskej yetoskia ken techtsopitiskiaj ika se cuchillo uan ompa mokaua uan amitlaj tikchiuaj para tikmokixtiliskej. Amo techpaleuis kuali matimomachilikan tla tikijtoskej amitlaj techpanoua. Xamo san niman tikualanij ijkuak ikaj itlaj techtoktia. Biblia kijtoua uelis ijkon techpanos pero noijki kijtoua amo san matikualantokan (Sal. 4:4; Efes. 4:26). ¿Tleka ijkon kijtoua? Porque ualeua ijkuak tikualanij xamo tikchiuaskej itlaj amo kuali (Sant. 1:20). Matikilnamiktokan tinochtin tikualanij ijkuak itlaj techtoktiaj pero tejuan tikijtoskej kox nochipa tikualantoskej. w25.02 15 párrs. 4-6

Jesús okijto se neskayotl para kiteititis amitlaj ipati “akin kipia miak tlamantli patio, pero amitlaj kipia ixpan toTajtsin Dios” (Luc. 12:​16-21). Porque amo tikmatij tlen techpanos satepan (Prov. 23:​4, 5; Sant. 4:​13-15). Jesús okijto moneki makikauakan tlen kipiaj akinmej kinekij kichiuaskej ijkon ken ye kichiua (Luc. 14:33). Tokniuan tlen okatkaj achto siglo okikajkej tlen okipiayaj pero opakej ijkuak ijkon okichijkej (Heb. 10:34). Axkan noijki miakej tokniuan yokipolojkej inteki noso tlen okipiayaj porque amo mokajkalakiaj itech política (Apoc. 13:​16, 17). Pero yejuan kiteititiaj kineltokaj tlen Jehová okijto: “Amo keman nimitskauas uan nochipa nimitspaleuis” (Heb. 13:5). Ikinon timochijchikauaj tikpiaskej tlen monekis ijkuak tikokoxkatiskej noso tiueuejtiskej pero tikneltokaj Jehová techmaluis tla techpanos itlaj tlen amo tikchiaj. w25.03 29, 30 párrs. 13, 14

Jehová kineki techpaleuis matikpiakan chikauak totlaneltokilis. Okintlali tlayekankej matechpaleuikan “matimochiuakan tiuejueyij uan matikchiuakan nochi ijkon ken Cristo okichi” (Efes. 4:​11-13). Jehová noijki techmaka iespíritu santo tlen techpaleuia ‘matimokuayejyekokan ken Cristo’ (1 Cor. 2:​14-16). Noijki otlanauati makinmijkuilokan naui Evangelios tlen techpaleuiaj matikmatikan tlen okichi Jesús ijkuak okatka nikan tlaltikpak. Noijki tikpiaskej chikauak totlaneltokilis tla timokuayejyekouaj ijkon ken Cristo okichi, tla titlapouaj ijkon ken ye uan tla tikchiuaj tlen ye okichi. Tla tiknekij tikpiaskej chikauak totlaneltokilis, moneki matikmatikan tlen okachi oui uan amo san matikmatikan tlen “otechmachtijkej itech Cristo”. w24.04 4, 5 párrs. 11, 12

Mojmostla moneki tikpejpenaskej tlen tikchiuaskej. Seki tlamantli amo oui tikpejpenaj tikchiuaskej. Amo oui tikpejpenaj tlen tikkuaskej uan tlen hora tikochiskej. Pero okseki tlamantli oui tikpejpenaskej. Oui tikpejpenaj ken timopajtiskej, ken tiyolpakiskej, tlen okachi kipaleuis tofamilia noso ken uelis okachi tikueyichiuaskej toTajtsin Dios. Tiknekij matechpaleui tlen tikpejpenaskej tikchiuaskej uan noijki makipaleui tofamilia. Pero tiknekij okachi tikyolpaktiskej Jehová (Rom. 12:​1, 2). Miak ipati achto matitlajtlanikan nochi tlen moneki uan ijkon kuali tikpejpenaskej tlen tiknekij tikchiuaskej. ¿Tleka moneki ijkon matikchiuakan? Matimokuayejyekokan ikaj mokokoua uan yaui kitati tepajti. Tepajti amo san niman kiluis tlen pajtli moneki konis tla ayamo itlaj kitlajtlania noso ayamo kita kanin kikokoua. Tejuan noijki amo san niman tikpejpentikisaj tlen tikchiuaskej tla ayamo tikmatij nochi tlen moneki. w25.01 14 párrs. 1-3

Jehová sapanoua teiknomati uan amo kineki ikaj maixpoliui (2 Ped. 3:9). ¿Ken okiteititi Jehová okinmiknomatki akinmej sapanoua otlajtlakolchijkej? Tekiua David sapanoua otlajtlakolchi porque oauilnenki uan otemikti. Pero omoyolkopki ikinon Jehová okiknomatki uan okitlapojpolui (2 Sam. 12:​1-12). Tekiua Manasés noijki sapanoua miak xiuitl otlajtlakolchi. Pero Jehová noijki okiknomatki uan okitlapojpolui porque omoyolkopki (2 Crón. 33:​9-16). Nin techititia Jehová techiknomati ijkuak kita timoyolkopaj. Jehová kinyolitis David uan Manasés porque omoyolkopkej maski otlajtlakolchijkej. w24.05 4 párr. 12