Jehová itekipanojkauaj tlauel kinpaktia mopaleuisej (2 Cor. 8:4). Pero kemantika moneki amo majmauisej. Se neskayotl, kema onka tlauilankayotl ueuejtlakamej kimatij moneki kinyolchikauasej toikniuaj, kinuikilisej amatlajkuiloli o se keski tlamantli tlen kinpoloua. Inijuantij kinikneliaj toikniuaj, yeka mosentlalijtokej kinpaleuisej ika tlen moneki, maske ueliskia kinpanos tlen amo kuali. Kema pano tlen amo kuali, moneki amo timoxelosej uan tijchiuasej tlen techiljuia kali Betel (Heb. 13:17). Ueuejtlakamej, moneki kuali kiitasej tlen Jehová itlanechikol kiijtoua uan kiampa kimatisej tlake kichiuasej kema tetlasojsoljuilis se tlenijki (1 Cor. 14:33, 40). Amo ma timajmauikaj uan kuali ma timoiljuikaj tlen tijchiuasej (Prov. 22:3). Amo ma tijchiuakaj tlen ueliskia kichiuas ma techpano tlen amo kuali uan ma timotemachikaj ipan Jehová. Jehová nojkia uelis techpaleuis ma tikinpaleuikaj toikniuaj. w24.07 4 párr. 8; 5 párr. 11

Tlanauatijketl David kuali kiixmatiyaya Jehová uan motemachiyaya ipan ya. Yeka kiiljuik ma kipaleui kema tlanauatijketl Saúl uan isoldados kinekiyayaj kimiktisej. Kema kiitak Jehová kinankilik uan kimakixtik, David kiijtok: “¡Jehová itstok!” (Sal. 18:46, TNM). ¿Tlake kinejki kiijtos David? Se amochtli kiijtoua ika tlen kiijtok, kinextik tlauel motemachiyaya ipan Jehová uan kiitayaya “kej se Dios katli nelia itstok uan ajachika kinpaleuia itekipanojkauaj”. David kiitak kenijkatsa Jehová kipaleuijtoya, nopa kichijki más ma motemachi Jehová nelia itstok uan kipaleuik nojua ma kitekipano uan ma kiueyichiua (Sal. 18:28, 29, 49). Tlaj timotemachiaj Jehová nelia itstok, techpaleuis ma tijtekipanokaj ika pakilistli. Techmakas chikaualistli para ma tikijiyouikaj tlen ueli tlaouijkayotl uan nojua kuali ma tijtekipanojtokaj. Nojkia techpaleuis ma timosentlalikaj amo kema tijtlauelkauasej. w24.06 20, 21 párrs. 3, 4

¿Tlake techmachtia tlen apóstol Pablo kintlajkuiljuilik toikniuaj tlen Tesalónica? Tlaj tijkakij se tlamantli tlen kichiua ma timosentlachilikaj o tlen amo mouika ika tlen tijyekojtokej ipan Biblia, moneki timoiljuisej tlaj kinamiki tijneltokasej. Uejkajkia, ipan nopa altepemej tlen eliyayaj Unión Soviética, tekichiuanij kintitlanilijkej toikniuaj se amatlajkuiloli tlen kiijtouayaya ualayaya tlen Ueyi kali Betel. Nopaya kiniljuiyaya se keskij toikniuaj ma kisakaj tlen Jehová itlanechikol uan ma kichiuakaj seyok tlanechikoli kampa inijuantij moyakanaskiaj. Maske nesiyaya nopa amatlajkuiloli nelnelia kititlantoya Ueyi kali Betel, toikniuaj katli kuali tlaneltokayayaj amo kinkajkayajkej. Kiitakej tlen nopaya kiijtouayaya amo eliyaya sanse ika tlen Biblia tlamachtia. Ipan ni tonali, katli techkualankaitaj kitekiuiaj internet uan sekinok tlamantli pampa kinekij techkuapolosej uan techxelosej. Tlaj amo tijnekij ma techkajkayauakaj, moneki kuali tikitasej tlaj tlen tijkakij o tijpouaj mouika ika tlen timomachtijtokej ipan Biblia (2 Tes. 2:2; 1 Juan 4:1). w24.07 12 párrs. 14, 15