ခရစ်တော်၏သွန်သင်ချက်များကို ယနေ့ မည်သူတို့ ကျင့်သုံးနေကြသနည်း

ယေရှုခရစ်သည် အသက်ရှင်ခဲ့သမျှတွင် အကြီးမြတ်ဆုံးလူသားတစ်ဦးဖြစ်သည်ဟု လူအများရှုမြင်ကြသည်။ အချို့ဆိုလျှင် ကိုယ်တော်အား တစ်ဦးတည်းသောအကြီးမြတ်ဆုံးပုဂ္ဂိုလ်ဟု ယူမှတ်ကြသည်။ ကိုယ်တော်၏သွန်သင်ချက်များသည် လူများစွာ၏အသက်တာကို အလွန်သြဇာလွှမ်းခဲ့ရာ “ချစ်ခင်ကြင်နာပြီး ကောင်းမှုပြုတတ်သော သာမညလူတန်းစားများအပြင် ထင်ပေါ်ကျော်ကြားသည့် သူတစ်ပါးအကျိုးဆောင်မှုများအပေါ်တွင်လည်း” ဩဇာလွှမ်းခဲ့သည်ဟု အင်္ဂလိပ်စာရေးဆရာ မယ်လ်ဗင် ဗရက်ဂ် ရေးသားခဲ့သည်။

ခရစ်ယာန်ဘာသာကော မည်သို့နည်း

ခရစ်ယာန်ဘာသာကိုကော မည်သို့ရှုမြင်ကြသနည်း။ ယင်းကို “လူတို့၏ဝိညာဉ်ရေးတိုးတက်မှုများတွင် အရေးပါဆုံးအရာတစ်ခု” အဖြစ်ဖော်ပြကြ၏။ စကော့တလန်ရှိ ဂလက်စ်ဂေါ ကယ်လီဒိုးနီးယားတက္ကသိုလ်ရှိ ဒေးဗစ်ကဲလ်စိုက ရှုမြင်ချက်တစ်ခုကို ဤသို့ရေးသားဖော်ပြသည်– “ခရစ်ယာန်ဘာသာ၏ အနှစ်နှစ်ထောင်သမိုင်းကြောင်းသည် အနုပညာ၊ ဗိသုကာအတတ်၊ အတွေးအခေါ်ပညာ၊ တေးဂီတနှင့် လူမှုရေးနယ်ပယ်တို့တွင် နှိုင်းယှဉ်မရသော အောင်မြင်ပြီးမြောက်မှုများနှင့် ပြည့်နှက်နေသည်ကို တွေ့ရှိရ၏။”

သို့သော် လူအများက ထိုသို့ မရှု မြင်ကြပေ။ ယေရှုခရစ်၏သွန်သင်ချက်နှင့် ကိုယ်တော်သည် ဘုရားသခင့်သားတော်ဖြစ်ကြောင်း ယုံကြည်ခြင်းအပေါ်အခြေပြုသော ခရစ်ယာန်ဘာသာကို သူတို့ ကန့် ကွက်နေခြင်းတော့မဟုတ်ပါ။ ယင်းအစား သူတို့သည် အမည်ခံခရစ်ယာန်ဘာသာရေး အဖွဲ့အစည်းများ၏ အမူအကျင့်ကို ရွံရှာနေခြင်းဖြစ်သည်။

ဥပမာ၊ ယင်းနှင့်ပတ်သက်၍ ဆယ့်ကိုးရာစုမှ ဂျာမန်အတွေးအခေါ်ပညာရှင် ဖရီးဒရစ်ခ် နီချီက ခရစ်ယာန်ဘာသာသည် “လူသားတစ်ရပ်လုံး၏ မဖျောက်ဖျက်နိုင်သော အမည်းကွက်ကြီးတစ်ခုဖြစ်သည်။ ဘေးသင့်စေသောအရာတစ်ခု၊ ဧရာမဖောက်ပြန်ယိုယွင်းမှုကြီးတစ်ခုလည်းဖြစ်သည်၊ . . . ယင်း၏အကြံအောင်မြင်ရေးအတွက် အငြိုးကြီးသော၊ အလွန်စဉ်းလဲကောက်ကျစ်သော၊ ပုန်းလျှိုးကွယ်လျှိုးနှင့် အလွန်သေးသိမ်ညံ့ဖျင်းသောနည်းလမ်းမှန်သမျှကို အသုံးမပြုဘဲမနေပေ” ဟုရေးသားခဲ့သည်။ သူ၏ရှုမြင်ချက်သည် အစွန်းရောက်သည်မှန်သော်လည်း အမြော်အမြင်ရှိ အကဲခတ်သူတို့က ထိုသို့ပင်ကောက်ချက်ချခဲ့ကြပြီ။ အဘယ်ကြောင့်နည်း။ အကြောင်းမှာ ရာစုနှစ်များတစ်လျှောက် အမည်ခံခရစ်ယာန်များသည် ယေရှု၏အရည်အသွေးများကို မတင်ပြကြဘဲ “အကျင့်ယိုယွင်းမှု၊ ကြောက်မက်ဖွယ် ရာဇဝတ်မှုများနှင့် ဘာသာတရားကို မခန့်လေးစားပြုမှုတို့ဖြင့်” နာမည်ထွက်နေ၍ ဖြစ်သည်။

ခရစ်ယာန်ဘာသာတွင် ခရစ်တော်ရှိသလော

ထို့ကြောင့် “ခရစ်ယာန်ဘာသာမှာ ခရစ်တော်ရှိနေတုန်းပဲလား” ဟုမေးသင့်မေးထိုက်ပါသည်။ “ရှိတာပေါ့၊ ယေရှုက ‘ကမ္ဘာကုန်တဲ့အထိ’ သူ့နောက်လိုက်တွေနဲ့အတူ ရှိနေမယ်လို့ ကတိပေးခဲ့တာပဲ” ဟုအချို့က ချက်ချင်းဖြေဆိုပေမည်။ (မဿဲ ၂၈:၂၀) ထိုသို့ ယေရှု အမှန်မိန့်ဆိုခဲ့သည်။ သို့သော် မည်သည့်အမူအကျင့်ပင်ရှိပါစေ၊ ခရစ်ယာန်ဟုအမည်ခံသူတိုင်းနှင့်အတူ ကိုယ်တော်ရှိနေမည်ဟု ဆိုလိုပါသလော။

ယေရှုခေတ်မှ ဘာသာရေးခေါင်းဆောင်အချို့က ဘုရားသခင်သည် မိမိတို့ဘက်တွင် လုံးလုံးရှိသည်ဟု ယူမှတ်ခဲ့ကြကြောင်း သတိရပါ။ ဘုရားသခင်သည် ဣသရေလလူမျိုးကို အထူးရွေးချယ်ခဲ့သောကြောင့် သူတို့အဘယ်အရာပင်ပြုလုပ်ပါစေ သူတို့ကို ကိုယ်တော် ဘယ်သောအခါမျှ စွန့်ပစ်မည်မဟုတ်ဟု ဘာသာရေးခေါင်းဆောင်အချို့ ယူဆကြသည်။ (မိက္ခာ ၃:၁၁) သို့သော် သူတို့သည် ဘုရားသခင်၏ပညတ်နှင့်စံနှုန်းများကို ကမ်းကုန်အောင် ဆန့်ကျင်ခဲ့လေသည်။ ထို့ကြောင့် ယေရှုခရစ်က သူတို့ကို ဤသို့ရှင်းရှင်းမိန့်ဆိုခဲ့သည်– “သင်တို့နေသောအိမ်သည် လူဆိတ်ညံလျက်ကျန်ရှိ၏။” (မဿဲ ၂၃:၃၈) သူတို့၏ဘာသာရေးစနစ်တစ်ရပ်လုံးကို ဘုရားသခင်မနှစ်သက်တော့ဘဲ ငြင်းပယ်လိုက်ရာ အေဒီ ၇၀ တွင် ၎င်းတို့၏ယေရုရှလင်မြို့တော်နှင့် ဗိမာန်တော်ကို ရောမစစ်တပ်အား ဖျက်ဆီးစေခဲ့သည်။

ယနေ့ ခရစ်ယာန်ဘာသာလည်း ထပ်တူအဖြစ်မျိုး ကြုံနိုင်သလော။ ယေရှုသည် “ကမ္ဘာကုန်သည်အထိ” မိမိနောက်လိုက်များနှင့်အတူရှိမည်ဟူသော ကတိတော်နှင့်ဒွန်တွဲနေသည့် လိုအပ်ချက်အချို့ကို သုံးသပ်ကြည့်ကြစို့။

[စာမျက်နှာ ပါ ရုပ်ပုံများ]

ယေရှုခရစ်၏သွန်သင်ချက်များသည် ကမ္ဘာတစ်ဝန်းရှိ လူသန်းပေါင်းများစွာကို အလွန်သြဇာညောင်းခဲ့