“ငါ့ထံသို့လာကြလော့၊ ငါသည် လန်းဆန်းစေမည်”
လန်းဆန်းစေသော ဆီးနှင်းပေါက်များနှင့်တူသည့် လူငယ်လူရွယ်များ
ယေရှုခရစ်က “ငါ့ထံသို့လာကြလော့၊ ငါသည်လန်းဆန်းစေမည်” ဟုဆိုသောအခါ ကိုယ်တော်သည် မိမိ၏ငယ်ရွယ်သော တပည့်နောက်လိုက်များကိုပါ ထည့်ပြောခဲ့ပေမည်။ (မဿဲ ၁၁:၂၈၊ ကဘ) ကိုယ်တော့်ထံ မိမိတို့ကလေးငယ်များကို လူတို့ခေါ်ဆောင်လာစပြုသောအခါ ကိုယ်တော်၏တပည့်များက တားဆီးဖို့ကြိုးစားခဲ့ကြသည်။ သို့သော် ယေရှုက “ထိုသူငယ်တို့ကို ငါ့ထံသို့လာပါလေစေ။ မဆီးတားကြနှင့်” ဟုမိန့်ဆိုခဲ့၏။ ထို့နောက်ယေရှုသည် “သူငယ်တို့ကိုချီပိုက်၍ သူတို့အပေါ်မှာ လက်တော်ကိုတင်လျက် ကောင်းချီး” ပင်ပေးခဲ့သည်။ (မာကု ၁၀:၁၄-၁၆) လူငယ်လူရွယ်များကို အဖိုးထိုက်သောသူများအဖြစ် ယေရှု ရှုမြင်ခဲ့သည်မှာ ယုံမှားဖွယ်မရှိချေ။
ဘုရားသခင်၏အမှုဆောင်ရာတွင် အထူးကောင်းမွန်သော ပုံသက်သေတင်ပြခဲ့ကြသည့် တည်ကြည်သောလူပျို၊ အပျိုများအပြင် လူငယ်များနှင့် ကလေးငယ်များအကြောင်းကိုပါ သမ္မာကျမ်းစာက ပြောပြသည်။ ဆာလံကျမ်းတွင် ဆီးနှင်းတမျှ လန်းဆန်းစေသော “လူပျိုတော်တို့” အကြောင်းကို ကြိုဟောထားသည်။ အဆိုပါကျမ်းက ယေဟောဝါ၏နာမတော်ကို ချီးမွမ်းသည့် “လူပျိုနှင့်အပျိုများ” အကြောင်းကိုလည်း ဖော်ပြသည်။—ဆာလံ ၁၁၀:၃; ၁၄၈:၁၂၊ ၁၃။
လူငယ်များ ဖွံ့ ဖြိုးကြီးထွားရာနေရာ
ဆီးနှင်းကို ပေါများကြွယ်ဝခြင်းအပြင် ကောင်းချီးတို့နှင့် ဆက်စပ်ဖော်ပြထားသည်ဖြစ်ရာ ဆီးနှင်းနှင့် ခိုင်းနှိုင်းဖော်ပြခြင်းသည် သင့်လျော်ပေ၏။ (ကမ္ဘာဦး ၂၇:၂၈) ဆီးနှင်းပေါက်များသည် ညင်သာပြီး လန်းဆန်းစေသည်။ ခရစ်တော်ရောက်ရှိသည့် ဤအချိန်အတွင်း ခရစ်ယာန်လူငယ်မြောက်မြားစွာတို့သည် တလိုတလားနှင့် စိတ်အားထက်သန်စွာ မိမိတို့ကိုယ်ကိုပေးဆက်ကြသည်။ လန်းဆန်းစေသောဆီးနှင်းပေါက်များကဲ့သို့ပင် လူငယ်မောင်မယ်များစွာတို့သည် ဘုရားသခင်၏အမှုတော်ကို ကြည်လင်ရွှင်ပျစွာ အမှုထမ်းကြပြီး ဝတ်ပြုသူချင်းများကို ထောက်မကူညီပေးနေကြသည်။—ဆာလံ ၇၁:၁၇။
ခရစ်ယာန်လူငယ်များသည် အခြားသူများကို လန်းဆန်းစေရုံမကပါ; သူတို့၏အမှုတော်ဆောင်ခြင်းတွင် သူတို့ကိုယ်နှိုက် စိတ်သစ်လူသစ်ဖြစ်လာကြသည်။ ဘုရားသခင့်အဖွဲ့အစည်းက သူတို့ ဖွံ့ ဖြိုးကြီးထွားနိုင်သော ဝန်းကျင်ကိုစီမံပေးသည်။ မြင့်မားသောကိုယ်ကျင့်တရားစံနှုန်းများ ရှိခြင်းဖြင့် ဤလူငယ်မောင်မယ်များသည် ဘုရားသခင်နှင့်ရင်းနှီးသောဆက်ဆံရေးရှိကြသည်။ (ဆာလံ ၁၁၉:၉) အသင်းတော်အတွင်းတွင် အကျိုးရှိသောလုပ်ငန်းများလည်း လုပ်ဆောင်ကြကာ မိတ်ဆွေကောင်းများ တွေ့ ရှိကြပြီး ၎င်းတို့က ကျေနပ်ဖွယ်ကောင်းပြီး အဓိပ္ပာယ်ပြည့်ဝသောဘဝရှိစေသည်။
‘ကုသမှုနှင့် လန်းဆန်းမှု’
ဤခရစ်ယာန်လူငယ်များကိုယ်တိုင်က သူတို့သည် “ဆီးနှင်း” များနှင့်တူသည်ဟု ခံစားကြရပါသလော။ အသင်းတော်လုပ်ငန်းဆောင်တာများ၌ပါဝင်ပြီး ဓမ္မအမှုတွင် တစ်လလျှင်နာရီ ၇၀ ကျော် ပျော်ရွှင်စွာပါဝင်နေသော လုံမပျိုတာနီယာကို မိတ်ဆက်ပေးပါမည်။ သူမည်သို့ခံစားရသနည်း။ တာနီယာက ဤသို့ပြောပြသည်– “ကျွန်မရဲ့စိတ် လန်းဆန်းပြီး စိတ်အားတက်ကြွတယ်။ ကျွန်မရဲ့ဘဝမှာ ယေဟောဝါနဲ့ ကိုယ်တော်ရဲ့အဖွဲ့အစည်းရှိခြင်းက ကျွန်မအတွက် ‘ကုစားမှုနဲ့ လန်းဆန်းမှု’ တစ်ခုပဲ။”—သု. ၃:၈။
အချိန်ပြည့်ဓမ္မအမှုဆောင် လူငယ်နောက်တစ်ဦးဖြစ်သူ အေရီရယ်လ်သည် အသင်းတော်တွင် သူရရှိသောဝိညာဉ်ရေးအာဟာရကို တန်ဖိုးထားလေးမြတ်သည်။ သူဤသို့ထုတ်ဖော်ပြောဆိုသည်– “ခရစ်ယာန် အပတ်စဉ်အစည်းအဝေးတွေ၊ စည်းဝေးကြီးတွေနဲ့ စည်းဝေးပွဲတွေကိုသွားတက်ပြီး ယေဟောဝါရဲ့ဝိညာဉ်ရေးစားပွဲမှာ စားသုံးနိုင်တဲ့အခါ ကျွန်မ ဝိညာဉ်ရေးဘက် တကယ်လန်းဆန်းပြီး အားတက်မိတယ်။ နောက်ပြီးတော့ ကမ္ဘာတစ်ဝန်းလုံးမှာ ကျွန်မရဲ့လုပ်ဖော်ဆောင်ဖက်တွေ ရှိတယ်ဆိုတာကိုသိရလို့ ကျွန်မ အားမငယ်တော့ဘူး။” လန်းဆန်းမှု၏ပင်ရင်းကိုဖော်ပြရာတွင် သူကဤသို့ဆို၏– “အထူးသဖြင့် ဒီအစီအစဉ်စနစ်က လူတွေအပေါ် ဆိုးကျိုးကျရောက်စေတာကို ကျွန်မကြားရ၊ မြင်ရတဲ့အခါ ယေဟောဝါကို မိတ်ဆွေတစ်ဦးအဖြစ်ရရှိထားလို့ တကယ်အားရှိတယ်။”—ယာကုပ် ၂:၂၃။
အဘိရှဲသည် အသက် ၂၀ အရွယ်တွင် အချိန်ပြည့်ဧဝံဂေလိဟောပြောသူတစ်ဦးအဖြစ်သာမက အသင်းတော်၌ ဓမ္မအမှုထမ်းတစ်ဦးအဖြစ် အမှုဆောင်နေပါသည်။ သူ၏တွေ့ ကြုံမှုကို ဤသို့ဖော်ပြသည်– “ဒီကနေ့ လူငယ်တွေရင်ဆိုင်နေရတဲ့ ပြဿနာတွေကို ကျွန်တော်ဘယ်လိုဖြေရှင်းရမယ်ဆိုတာ သိထားတဲ့အတွက် ကျွန်တော့်စိတ်လန်းဆန်းတယ်။ ယေဟောဝါအမှုတော်ကို စိုးလ်အကြွင်းမဲ့ထမ်းဆောင်နိုင်ဖို့ သမ္မာကျမ်းစာအမှန်တရားက ကျွန်တော့်ကို အာရုံမထွေပြားစေဘူး။”
မြီးကောင်ပေါက်အရွယ်ဝင်ခါစတွင် အန်ထွမ်းသည် စိတ်တိုတတ်သည်။ တစ်ကြိမ်က သူသည် ကျောင်းနေဖက်တစ်ဦးကို ထိုင်ခုံနှင့်ရိုက်ပြီး နောက်တစ်ဦးကို ခဲတံနှင့်ထိုးခဲ့သည်။ အန်ထွမ်းသည် လန်းဆန်းစေသူတစ်ဦး လုံးဝမဖြစ်ခဲ့ချေ! သို့သော် သမ္မာကျမ်းစာအသိပညာက သူ၏အမူအကျင့်ကို လုံးလုံးပြောင်းလဲစေခဲ့သည်။ ယခု အသက် ၁၉ နှစ်ရှိပြီဖြစ်၍ အသင်းတော်တွင် ဓမ္မအမှုထမ်းတစ်ဦးအဖြစ်ထမ်းဆောင်ရုံမက အချိန်ပြည့်ဓမ္မအမှုဆောင်တစ်ဦးလည်းဖြစ်သည်၊ သူဤသို့ဆို၏– “ယေဟောဝါကို သိကျွမ်းခွင့်ရပြီး စိတ်ချုပ်တည်းဖို့ ကျွန်တော့်လမ်းစဉ်ကို ပြောင်းလဲရမယ်ဆိုတာ သဘောပေါက်စေခဲ့တဲ့အတွက် ကိုယ်တော့်ကိုကျေးဇူးတင်လို့မဆုံးဘူး။ ဒီနည်းနဲ့ ပြဿနာအတော်များများ ကျွန်တော်ရှောင်နိုင်ခဲ့တယ်။”
အခြားသူများကလည်း ခရစ်ယာန်လူငယ်များ၏ လန်းဆန်းစေသောသဘောထားကို သတိပြုမိကြသည်။ မက်တီယိုသည် အီတလီနိုင်ငံမှ သက်သေခံလူငယ်တစ်ဦးဖြစ်သည်။ သူ၏ဆရာမက အတန်းထဲတွင် ဆဲရေးတိုင်းထွာသောစကားလုံးသုံးသူ မည်သူမဆိုသည် ဒဏ်ငွေအနည်းငယ်ပေးရမည်ဟု ဆုံးဖြတ်ခဲ့သည်။ နောက်ပိုင်းတွင် ကလေးများက ၎င်းစည်းကမ်းကိုပယ်ဖျက်ပေးပါရန် တောင်းဆိုခဲ့ကြသည်၊ အကြောင်းမှာ “ညစ်ညမ်းတဲ့စကားမသုံးဘဲနေလို့ မဖြစ်နိုင်ဘူး” ဟုသူတို့ဆိုကြ၏။ “ဒါပေမဲ့ ဆရာမက ဖြစ်နိုင်တယ်လို့ပြောတယ်၊ ပြီးတော့ ယေဟောဝါသက်သေတစ်ယောက်ဖြစ်တဲ့ ကျွန်တော့်ကို နမူနာအဖြစ်တင်ပြပြီး ညစ်ညမ်းတဲ့စကား လုံးလုံးမသုံးတဲ့အတွက် အတန်းတစ်ခုလုံးရှေ့မှာ ကျွန်တော့်ကိုချီးမွမ်းခဲ့တယ်” ဟု မက်တီယို ရှင်းပြခဲ့သည်။
ထိုင်းနိုင်ငံမှဆုံးမရခက်သော အတန်းတစ်တန်းတွင် ဆရာမသည် ၁၁ နှစ်သား ရာချာကို အတန်းရှေ့ထွက်စေပြီး သူ၏အမူအကျင့်ကို ဤသို့ ချီးမွမ်းပြောဆိုခဲ့သည်– “မင်းတို့အားလုံး သူ့ကို ဘာကြောင့်အတုမယူကြတာလဲ။ သူဟာ စာလည်း ကြိုးစားတယ်၊ အကျင့်လည်းကောင်းတယ်။” ထို့နောက် ဆရာမက ကျောင်းသားအားလုံးကို ဤသို့ပြောသည်– “မင်းတို့လေးတွေ ရာချာလိုအကျင့်ကောင်းလာဖို့ ယေဟောဝါသက်သေတစ်ယောက်ဖြစ်ဖို့လိုလိမ့်မယ်။”
ခရစ်ယာန်လူငယ် ထောင်ပေါင်းများစွာတို့သည် ယေဟောဝါကို ပိုမိုသိကျွမ်းလာကြပြီး ကိုယ်တော်၏အလိုတော်ကိုဆောင်နေကြသည်ကို တွေ့ မြင်ရခြင်းမှာ စိတ်ကြည်နူးစရာပင်ဖြစ်၏။ အဆိုပါ ရည်မွန်သူလူငယ်များသည် သူတို့အသက်အရွယ်နှင့်မလိုက်အောင် ဉာဏ်ပညာရှိကြသည်။ ဘုရားသခင်သည် သူတို့၏လက်ရှိအသက်တာကို အောင်မြင်စေမည်သာမက လာလတ္တံ့သောကမ္ဘာသစ်တွင် ဂုဏ်အသရေရှိသောအနာဂတ်ရရှိစေနိုင်ပါသည်။ (၁ တိမောသေ ၄:၈) မကျေမနပ်ဖြစ်ပြီး စိတ်အလိုမကျသည့် လူငယ်များပြည့်နှက်လျက်ရှိသော လက်ရှိအစီအစဉ်စနစ်၏ ဝိညာဉ်ရေးလွင်တီးခေါင်တွင် ခရစ်ယာန်လူငယ်များသည် အလွန်ကွဲပြားခြားနားပြီး လန်းဆန်းမှုများစွာရှိစေကြသည်။