သင်သည် ခံနိုင်ရည်ရှိသလော

^၁ “ငါ၏သားသမီးတို့သည် သမ္မာတရား၌ကျင်လည် [“ဆက်၍လျှောက်လှမ်းနေ၊” ကဘ] သည်ကို . . . ဝမ်းမြောက်ခြင်းထက် သာ၍ဝမ်းမြောက်ခြင်းမရှိ။” (၃ ယော. ၄) ယောဟန်၏ဝိညာဏသားသမီးများ၏ခံနိုင်ရည်သည် သူ့အား အလွန်ရွှင်လန်းစေခဲ့သည်။ ကျွန်ုပ်တို့၏ကောင်းကင်ခမည်းတော်သည် မိမိ၏သားသမီးများဖြစ်လာဖို့အလားအလာရှိသူ သန်းပေါင်းများစွာသောသူတို့ “သမ္မာတရား၌ ဆက်၍လျှောက်လှမ်းနေ” သည်ကို တွေ့ မြင်သည့်အခါ မည်မျှဝမ်းမြောက်လိုက်မည်ဖြစ်ခြင်း!—သု. ၂၃:၁၅၊ ၁၆; ၂၇:၁၁။

^၂ ဘုရားသခင့်လူမျိုးတော်တစ်ရပ်လုံးအနေနှင့် ခရစ်ယာန်လုပ်ဆောင်မှုတွင် ဇွဲနပဲဖြင့် စွဲစွဲမြဲမြဲပါဝင်နေသော်လည်း အချို့တို့သည် တဖြည်းဖြည်းအရှိန်နှေးကွေးလာသည်။ ဤသူများသည် သမ္မာတရားလေ့လာခါစက တက်တက်ကြွကြွရှိခဲ့ကြမည်ဖြစ်သော်လည်း နှစ်များကုန်လွန်လာသည့်အခါ တပည့်ဖြစ်စေခြင်းလုပ်ငန်းတွင် အနည်းငယ်သာ သို့မဟုတ် တစ်ခါတစ်ရံသာပါဝင်သည့်ပုံစံမျိုးဖြစ်လာသည်။

^၃ ကာယရေးအကန့်အသတ်ရှိမှုများနှင့် ဇရာထောင်းခြင်း၏ထိခိုက်မှုများကြောင့် အချို့သူတို့အရှိန်နှေးကွေးလာသည်ကို နားလည်နိုင်ပါသည်။ သို့သော် သူတို့၏ခံနိုင်ရည်ရှိမှုအတွက် သူတို့ကိုချီးမွမ်းထိုက်သည်။ သူတို့သည် တတ်နိုင်သမျှလုပ်ဆောင်နေသည်။ သို့သော် မိမိ၏အသက်တာကို ဘုရားသခင်ထံဆက်ကပ်အပ်နှံထားသူတစ်ဦးစီသည် မိမိကိုယ်ကိုဤသို့မေးသင့်သည်– ‘ငါ့ရဲ့အသက်တာမှာ နိုင်ငံတော်ရေးရာတွေကို နေရာအနည်းငယ်သာပေးပြီး ကိုယ်ရေးကိုယ်တာလိုက်စားမှုတွေအပေါ် များများအာရုံစိုက်ဖို့ ငါ့ကိုယ်ငါခွင့်ပြုထားသလား။ ငါဟာ အနည်းငယ် “နွေးရုံ” သာရှိနေသလား ဒါမှမဟုတ် “အားသွန်ခွန်စိုက်” ကြိုးစားနေသလား။’ (ဗျာ. ၃:၁၅၊ ၁၆; လု. ၁၃:၂၄၊ ကဘ) “ကောင်းသောအကျင့်ကိုကျင့်သောသူရှိသမျှတို့သည် ဘုန်းအသရေချမ်းသာကို ခံစားရ” မည်ဟု ယေဟောဝါကတိပေးထားသည်ကို စိတ်ထဲစွဲမှတ်ထားကာ မိမိတို့လုပ်ဆောင်နေသည့်အရာနှင့် လိုအပ်သလိုတိုးတက်ရမည့်အရာများကို ကျွန်ုပ်တို့အားလုံး ဆုတောင်းသုံးသပ်ကြစို့။—ရော. ၂:၁၀။

^၄ ခံနိုင်ရည်ရှိနိုင်ပုံ– ခံနိုင်ရည်ရှိရန် ယေရှုကို မည်သည့်အရာကကူညီပေးသနည်း။ ပေါလုက ဤသို့ရှင်းပြသည်– “ထိုသခင်သည် မိမိရှေ့၌ထားသောဝမ်းမြောက်ခြင်းအကြောင်းကြောင့် ရှက်ကြောက်သောအရာကိုမမှတ်ဘဲ လက်ဝါးကပ်တိုင်၌ခံပြီးမှ၊ ဘုရားသခင်၏ပလ္လင်တော်လက်ယာဘက်၌ ထိုင်နေတော်မူ၏။” (ဟေဗြဲ ၁၂:၁-၃) ယေရှုရှေ့၌ထားသောဝမ်းမြောက်ခြင်းသည် ကိုယ်တော်ရင်ဆိုင်ခဲ့ရသည့် ယာယီစုံစမ်းမှုများထက် ပိုအလေးသာခဲ့သည်။ ကျွန်ုပ်တို့ရှေ့၌ထားသောဝမ်းမြောက်ခြင်းသည်လည်း ခံနိုင်ရည်ရှိရန်ကူညီပေးနိုင်ကြောင်း စိတ်ထဲစွဲမှတ်ထားပါ။ (ဗျာ. ၂၁:၄၊ ၇; ၂၂:၁၂) ကိုယ်ပိုင်လေ့လာမှု၊ အစည်းအဝေးမှန်မှန်တက်ခြင်းနှင့် စွဲစွဲမြဲမြဲဆုတောင်းခြင်းအားဖြင့် ခွန်အားရဖို့ ယေဟောဝါထံ ကျွန်ုပ်တို့မျှော်ကိုးကြမည်ဆိုလျှင် လုပ်ဆောင်ရန် ကိုယ်တော်ပေးအပ်ထားသည့်လုပ်ငန်းတွင် ကျွန်ုပ်တို့စွဲစွဲမြဲမြဲလုပ်ဆောင်နိုင်မည်ဖြစ်သည်။

^၅ ယေဟောဝါသည် မိမိ၏သစ္စာစောင့်သိသူများ ခံနိုင်ရည်ရှိမှုအတွက် ဝမ်းမြောက်တော်မူ၏။ ထို့ကြောင့် ဆက်လက်၍ “သမ္မာတရား၌လျှောက်လှမ်းနေ” ခြင်းဖြင့် ကိုယ်တော်ကိုပို၍ပျော်ရွှင်စေကြစို့။