ယေဟောဝါ၏နှိမ့်ချခြင်းက ကျွန်ုပ်တို့အတွက် အဘယ်အဓိပ္ပာယ်ရှိ

ဒါဝိဒ်သည် ဆင်းရဲခက်ခဲမှုအကြောင်း သိနားလည်သူဖြစ်သည်။ မနာလိုစိတ်ရှိသည့် ယောက္ခမဖြစ်သူ ဘုရင်ရှောလု၏နှိပ်စက်မှုခံခဲ့ရသည်။ ရှောလုသည် ဒါဝိဒ်ကို လှံနှင့်ထိုးသတ်ဖို့ သုံးကြိမ်တိုင်ကြိုးစားခဲ့သော်လည်း မအောင်မြင်သဖြင့် နှစ်ချီ၍လိုက်လံသတ်ဖြတ်ခဲ့ရာ ဒါဝိဒ်ခမျာ ထွက်ပြေးတိမ်းရှောင်နေခဲ့ရသည်။ (၁ ဓမ္မရာဇဝင် ၁၈:၁၁; ၁၉:၁၀; ၂၆:၂၀) သို့တိုင် ဒါဝိဒ်နှင့်အတူ ယေဟောဝါရှိတော်မူ၏။ ယေဟောဝါသည် သူ့ကို ရှောလု၏ရန်မှမက အခြားရန်သူများလက်မှလည်း ကယ်တင်ပေးခဲ့သည်။ ထို့ကြောင့် ဒါဝိဒ်က– “ထာဝရဘုရား [သခင်] သည် ငါ၏ကျောက်၊ ငါ၏ရဲတိုက်၊ ငါ့ကိုကယ်လွှတ်သောသခင် . . . ဖြစ်တော်မူ၏။ [ယေဟောဝါ] သည် ကယ်တင်တော်မူခြင်း ဒိုင်းလွှားကိုအပ်၍ ကိုယ်တော်၏နှိမ့်ချတော်မူခြင်းအားဖြင့် အကျွန်ုပ်သည် ချီးမြှောက်ခြင်းသို့ရောက်ပါ၏” ဟုသီဆိုခဲ့ခြင်းကို ကျွန်ုပ်တို့သဘောပေါက်နိုင်ကြသည်။ (၂ ဓမ္မရာဇဝင် ၂၂:၂၊ ၃၆၊ ကဘ) ဒါဝိဒ်သည် ဣသရေလနိုင်ငံတွင် အတော်အတန်ချီးမြှောက်ခံခဲ့ရသည်။ သို့သော် ယေဟောဝါ၏နှိမ့်ချခြင်းနှင့် မည်သို့ပတ်သက်သနည်း။

သမ္မာကျမ်းစာက ယေဟောဝါအား နှိမ့်ချမှုရှိသူအဖြစ်ဖော်ပြသောအခါ ကိုယ်တော်သည် ကန့်သတ်ချက်ရှိသည်၊ သို့မဟုတ် အခြားသူတို့ကိုလက်အောက်ခံရသည်ဟု ဆိုလိုနေခြင်းမဟုတ်ပါ။ ယင်းအစား ဤနှစ်လိုဖွယ်အရည်အသွေးက ကိုယ်တော်၏မျက်နှာသာတော်ရရှိရန် စိတ်ရင်းမှန်ဖြင့် ကြိုးစားသူတို့အပေါ် ကိုယ်တော်စာနာစိတ်ရှိပြီး ကရုဏာပြတော်မူကြောင်းဖော်ပြသည်။ ဆာလံ ၁၁၃:၆၊ ၇၊ ကဘ တွင် ကျွန်ုပ်တို့ဤသို့ဖတ်ရ၏– “[ယေဟောဝါ] သည် ကိုယ်ကိုနှိမ့်ချ၍ မိုးကောင်းကင်နှင့် မြေကြီးကို ငုံ့၍ကြည့်ရှုတော်မူ၏၊ . . . ဆင်းရဲသောသူကို မြေမှုန့်ထဲက ချီးမြှောက်တော်မူသည်။” ‘ကိုယ်ကိုနှိမ့်ချသည်’ ဟူသည့်အဓိပ္ပာယ်မှာ ‘ကိုယ်တော်သည် ငုံ့၍ကြည့်ရှုတော်မူသည်၊’ သို့မဟုတ် ‘ကြည့်ရှုရန် နှိမ့်ချတော်မူသည်’ ဟူ၍ဖြစ်၏။ ထို့ကြောင့် မစုံလင်သော်လည်း နှိမ့်ချစိတ်ရှိသည့် ဘုရားသခင့်အမှုတော်ဆောင်သူ ဒါဝိဒ်ကို ယေဟောဝါကိုယ်တော်တိုင် ကောင်းကင်မှ ‘ငုံ့၍’ သို့မဟုတ် ‘ကိုယ်ကိုနှိမ့်ချ၍’ ဂရုစိုက်ကြည့်ရှုတော်မူသည်။ ထို့ကြောင့် ဒါဝိဒ် ဤသို့အာမခံနိုင်ခဲ့ခြင်းဖြစ်၏– “ထာဝရဘုရား [သခင်] သည် မြင့်မြတ်တော်မူသော်လည်း စိတ်နှိမ့်ချသောသူတို့ကို ကြည့်ရှုတော်မူ၏။” (ဆာလံ ၁၃၈:၆) ဒါဝိဒ်နှင့် ယေဟောဝါဆက်ဆံခဲ့သည့် သနားညှာတာ၊ စိတ်ရှည်သောနည်းလမ်းက ဘုရားသခင့်အလိုတော်ဆောင်လိုသူအားလုံးကို အားရှိစေသင့်သည်။

စကြဝဠာအရှင်ယေဟောဝါသည် အမြင့်မြတ်ဆုံးသခင်ဖြစ်သော်လည်း ကျွန်ုပ်တို့တစ်ဦးစီနှင့် အဆက်အသွယ်ပြုလိုတော်မူသည်။ ယင်းကိုသိထားခြင်းက အခက်ခဲဆုံးအခြေအနေများတွင်ပင် ကျွန်ုပ်တို့ကို ကိုယ်တော် မပျက်မကွက်ကူညီလိမ့်မည်ဟု ယုံကြည်စိတ်ချစေသည်။ ကျွန်ုပ်တို့ကို ကိုယ်တော်မေ့လျော့သွားမည်ဟု စိုးရိမ်စရာမလိုပါ။ ရှေးဣသရေလလူမျိုးနှင့်စပ်လျဉ်းပြီး ယေဟောဝါသည် “ကရုဏာတော် အစဉ်အမြဲတည်သည်ဖြစ်၍ နှိမ့်ချလျက်နေသော [သူတို့] ကို အောက်မေ့တော်မူထသောဘုရား [သခင်]” ဖြစ်သည်ဟု သင့်လျော်စွာဖော်ပြနိုင်ပါသည်။—ဆာလံ ၁၃၆:၂၃။

ယေဟောဝါ၏ မျက်မှောက်ခေတ်ကျေးကျွန်များအနေနှင့် ကျွန်ုပ်တို့လည်း ဒါဝိဒ်ကဲ့သို့ ဆင်းရဲခက်ခဲမှုများခံစားကြရပေမည်။ ဘုရားသခင်ကိုမသိသောသူများ၏လှောင်ပြောင်ခြင်းကို ကျွန်ုပ်တို့ခံနေကြရမည်၊ သို့မဟုတ် ကျန်းမာရေးမကောင်းခြင်း၊ ဆွေမျိုးရင်းချာတစ်ဦး ဆုံးပါးသွားခြင်းတို့ကို ကြုံတွေ့ရပေမည်။ ကျွန်ုပ်တို့၏အခြေအနေ မည်သို့ပင်ဖြစ်ပါစေ၊ စိတ်ရင်းမှန်နှင့်ဆုတောင်းပြီး ယေဟောဝါထံချဉ်းကပ်နိုင်သည်၊ ကိုယ်တော်၏သနားခြင်းကရုဏာတော်ကို တောင်းခံနိုင်ကြပါသည်။ ယေဟောဝါသည် ကျွန်ုပ်တို့ကို ဂရုစိုက်ကြည့်ရှုရန်၊ ကျွန်ုပ်တို့၏ဆုတောင်းချက်များကို နားညောင်းရန် ‘ငုံ့၍ကြည့်တော်မူ’ လိမ့်မည်။ မှုတ်သွင်းခံဆာလံဆရာရေးခဲ့သည့်အတိုင်း “ထာဝရဘုရား [သခင်]သည် ဖြောင့်မတ်သောသူတို့ကို ကြည့်ရှုတော်မူ၏။ သူတို့အော်ဟစ်သံကိုလည်း နားထောင်တော်မူ၏။” (ဆာလံ ၃၄:၁၅) ယေဟောဝါ၏ ဤချစ်ခင်ဖွယ်အရည်အသွေးဖြစ်သော နှိမ့်ချခြင်းသဘောကို တွေးတောဆင်ခြင်ကြည့်ရန် လှုံ့ဆော်ခံရသည်မဟုတ်ပေလော။

[စာမျက်နှာ ၃၀ ပါ ရုပ်ပုံ]

ယေဟောဝါသည် ဒါဝိဒ်၏ ဆုတောင်းချက်များကို နားညောင်းတော်မူသကဲ့သို့ ယနေ့ ကျွန်ုပ်တို့၏ဆုတောင်းချက်များကို တလိုတလား နားညောင်းတော်မူ၏