သမ္မာကျမ်းစာအကူအညီဖြင့် သွေးဆောင်မှုကို သူတွန်းလှန်ခဲ့

မျက်မှောက်လောကတွင် သွေးဆောင်မှု များလှသည်။ ကျမ်းစာမူများကိုစွဲကိုင်ထားဖို့ မလွယ်ကူပါ။ ဥပမာ၊ “မတရားသောမေထုန်ကို ကြဉ်ရှောင်ကြလော့” ဟူသော ကျမ်းစာသွန်သင်ချက်ကို လိုက်နာဖို့ဆိုသည်မှာ စိန်ခေါ်ချက်တစ်ခုဖြစ်ပေမည်။—၁ ကောရိန္သု ၆:၁၈။

စဘားစတီရန်ဟု ကျွန်ုပ်တို့အမည်ပေးမည့်သူသည် ပိုလန်နိုင်ငံရှိ စကင်ဒီနေဗီယံကုမ္ပဏီတစ်ခုတွင် အလုပ်လုပ်သော ယေဟောဝါသက်သေတစ်ဦးဖြစ်သည်။ သူသည် ဆက်လက်တည်ကြည်နေဖို့ ကြိုးစားတိုက်လှန်ခဲ့ရသည်။

စဘားစတီရန်သည် ယေဟောဝါသက်သေတစ်ဦးဖြစ်ကြောင်း လုပ်ဖော်ဆောင်ဖက်များ သိလာကြသည်။ သူ့အထက်အရာရှိများက သူ၏လုံ့လဝီရိယနှင့် ရိုးဖြောင့်မှုကို သဘောကျပြီး အခွင့်ထူးများဖြင့် ဆုချခဲ့သည်။ သို့သော် ၎င်းအခွင့်ထူးများရထား၍ ဒွိဟဖြစ်ဖွယ်ဖျော်ဖြေမှုများပါဝင်သော လုပ်ငန်းဆိုင်ရာစည်းဝေးများတွင် သူပါရှိနေဖို့ တာဝန်ရှိနေသည်။

မကြာမီ စဘားစတီရန် သံသယဝင်လာသည်။ “ငါဟာ ယေဟောဝါသက်သေတစ်ယောက်ဆိုတာ ငါ့ရဲ့ဘော့စ်က သိတာပဲ။ အဲဒါကြောင့်လည်း ငါ့ကို ယုံကြည်စိတ်ချ၊ အားကိုးတာပေါ့။ အဲဒီမှာပါဝင်ဖို့ ငြင်းလိုက်မယ်ဆိုရင် ရှာဖို့ခက်လှတဲ့ ဒီအလုပ်ကို ငါဆုံးရှုံးရမယ်။ အဲဒီဖျော်ဖြေမှုမှာ မပါဝင်ဘဲ ကြည့်ရုံသက်သက်ဆိုရင်ကော။”

ထိုအခါ သူ အသေးစိတ် စုံစမ်းကြည့်သည်။ သူသည် ညချမ်းပိုင်းတွင် နိုင်ငံခြားသားဖောက်သည်များ တွဲဖို့ “မိန်းကလေးများ” ကို စီစဉ်ပေးရမည်ဖြစ်သည်။ သူ ဘာလုပ်မည်နည်း။

အကျင့်ယိုယွင်းမှုနှင့်ပတ်သက်ပြီး ကျမ်းစာပေါ်အခြေပြုသည့် သူ၏သဘောထားကို အလုပ်ကြီးကြပ်သူအား ပြန်ပြောပြဖို့ စဘားစတီရန် ဆုံးဖြတ်ခဲ့သည်။ မကြာမီ ထိုအလုပ်သည် သူနှင့်မအပ်စပ်ကြောင်း၊ အနှေးနှင့်အမြန်ဆိုသလို အလုပ်ထွက်ရမည်ဖြစ်ကြောင်း ပေါ်လွင်ထင်ရှားလာသည်။ လခပိုနည်းသော်လည်း ထိုသို့သောသွေးဆောင်မှုများမရှိသည့် အလုပ်အသစ်ကို သူရရှိခဲ့သည်။ ယခု သူ၏သိစိတ်မှာ ကြည်လင်နေပြီ။

အကျင့်ယိုယွင်းမှုတွင်ပါဝင်ရန် သို့မဟုတ် မသိကျိုးကျွံပြုရန် သင့်ကို တစ်စုံတစ်ဦး ဖိအားပေးလာလျှင် မည်သို့ပြုမည်နည်း။ ပြောင်းလဲမှုကြီးပြုရန် အသင့်ရှိမည်လော။ ကမ္ဘာဦး ၃၉:၇-၁၂ တွင်မှတ်တမ်းတင်ထားသည့်အတိုင်း ရှေးခေတ်မှ ယောသပ် ထိုသို့ပင်ပြုခဲ့သည်။