နာမကျန်းသူသည် ယုံကြည်ခြင်းဖြင့် ပျောက်ကင်းသွားနိုင်သလော

ဖျားနာသောအခါ ဝေဒနာသက်သာပျောက်ကင်းဖို့ ကျွန်ုပ်တို့ရှာကြံတတ်ကြသည်။ ယေရှုခရစ်သည် ဖျားနာမှုအမျိုးမျိုးကို မကြာခဏကုသပေးပြီး လူနာများစွာကို သက်သာစေခဲ့ကြောင်း သမ္မာကျမ်းစာမှ သင်သိရှိထားပေမည်။ မည်သို့ ပျောက်ကင်းသွားခဲ့သနည်း။ “ဘုရားသခင်၏မဟာတန်ခိုးတော်” အားဖြင့်ဟု သမ္မာကျမ်းစာကဆို၏။ (လုကာ ၉:၄၂၊ ၄၃; တမန်တော် ၁၉:၁၁၊ ၁၂) သို့ဖြစ်၍ အနာရောဂါပျောက်ကင်းစေသည်မှာ ဘုရားသခင့်ထံတော်မှ သန့်ရှင်းသောဝိညာဉ်တော်ဖြစ်သည်၊ ကာယကံရှင်၏ ယုံကြည်ခြင်းတစ်ခုတည်းကြောင့်မဟုတ်။ (တမန်တော် ၂၈:၇-၉) ယင်းကြောင့် ယေရှုသည် လူနာများ ရောဂါပျောက်ကင်းရန် မိမိကို ယုံကြည်ကြောင်းဖော်ပြပြောဆိုဖို့ မတောင်းဆိုခဲ့ချေ။

‘အံ့ဖွယ်ကုသမှုများသည် အတိတ်တွင်ကျန်ရစ်ခဲ့ပြီလော၊ သို့မဟုတ် ယေရှုပြုလုပ်ခဲ့သော ကုသမှုမျိုး တစ်ဖန်ပေါ်လာဦးမည်လော။ နာကျင်စေသော သို့မဟုတ် ကုရာနတ္တိဆေးမရှိသော ရောဂါဝေဒနာကို ခံစားနေရသူများအတွက် အဘယ်မျှော်လင့်ချက်ရှိသနည်း’ ဟုသင်သိလိုပေမည်။

ဘုရားသခင်၏ဖြောင့်မတ်သော ကမ္ဘာသစ်တွင် ယေရှုမြေကြီးပေါ်ရှိစဉ် ပြုလုပ်ခဲ့သော အံ့ဖွယ်ကုသမှုမျိုးကို ဘုရားသခင့်တန်ခိုးတော်က တစ်ဖန်ဖြစ်ပေါ်စေလိမ့်မည်ဟု သမ္မာကျမ်းစာရှင်းပြသည်။ ဘုရားသခင်သည် ယုံကြည်ခြင်းကုထုံးဖြင့် ကုသပေးသူတစ်ယောက်မျှ မလုပ်ဆောင်နိုင်သောအရာ—အနာရောဂါဟူသမျှနှင့် သေခြင်းကို မည်သို့နှင့် မည်သည့်အချိန်တွင် ဖယ်ရှားပစ်မည်ဖြစ်ကြောင်း သင့်အရပ်ဒေသရှိ ယေဟောဝါသက်သေများက ဝမ်းသာအားရ ပြောပြကြပါလိမ့်မည်။ မှန်ပါသည်၊ ဘုရားသခင်သည် “သေခြင်းကို အစဉ်အမြဲပယ်ဖျက်” ပါလိမ့်မည်။—ဟေရှာယ ၂၅:၈၊ သမ္မာ။