ဘုရားသခင့်နိုင်ငံတော်ကြွေးကြော်သူများမှတ်တမ်း

ရုပ်မြင်သံကြားအစီအစဉ်တစ်ခုက ဘုရားသခင့်ဘုန်းထင်ရှားစေရန် သူ့ကိုလှုံ့ဆော်ပေးခဲ့

တမန်တော်ပေါလုက “လူအချို့တို့သည် ငြူစူရန်တွေ့ချင်သောသဘောနှင့် ခရစ်တော်၏တရားကိုဟောပြောကြ၏။ အချို့တို့သည် စေတနာစိတ်နှင့်ဟောပြောကြ၏” ဟုဆိုခဲ့သည်။ (ဖိလိပ္ပိ ၁:၁၅) တစ်ခါတစ်ရံ ယေဟောဝါ၏လူမျိုးတော်ကို အသရေဖျက်ဖို့ကြိုးစားသူများပင် မရည်ရွယ်ဘဲ စိတ်ရိုးဖြောင့်သူတို့ကို အမှန်တရားဘက်သို့ လှည့်လာစေခဲ့ကြပြီ။

၁၉၉၈၊ နိုဝင်ဘာလတွင် ပြင်သစ်နိုင်ငံ၊ လူဗီယာရှိ ယေဟောဝါသက်သေများ၏ဌာနခွဲ၊ ဗေသလအဆောက်အအုံပုံများကို ပြင်သစ်ရုပ်မြင်သံကြားသတင်း၌ ဖော်ပြခဲ့သည်။ တုံ့ပြန်မှုအမျိုးမျိုးရရှိခဲ့သော်လည်း ထိုအစီအစဉ်သည် မမျှော်လင့်ဘဲ ကောင်းကျိုးများဖြစ်ပေါ်စေခဲ့သည်။

ဗေသလမှ ၃၅ မိုင်ခန့်အကွာတွင် နေထိုင်သူ အယ်နာပေါ်လာသည် ထိုအစီအစဉ်ကိုကြည့်မိသည်။ ကလေးနှစ်ယောက်မိခင်ဖြစ်သူ အယ်နာပေါ်လာသည် အိမ်ထောင်ကွာရှင်းထားသူဖြစ်ပြီး အလုပ်ရှာနေ၏။ ထို့ကြောင့် နောက်တစ်နေ့မနက်တွင် အလုပ်အကိုင်စုံစမ်းမေးမြန်းရန် ဗေသလသို့ဖုန်းဆက်လေသည်။ “တကယ်ကောင်းမွန်တဲ့နေရာဖြစ်ပြီး အဲဒီကအလုပ်ကလည်း အကျိုးပြုတဲ့လုပ်ငန်းဖြစ်တယ်လို့ ကျွန်မထင်မိတယ်” ဟုသူပြောပြသည်။ ဗေသလ၌အမှုထမ်းနေသူတို့သည် မိမိတို့အချိန်ကို စေတနာအလျောက် ပေးဆက်ကြသော ခရစ်ယာန်ဓမ္မအမှုဆောင်များဖြစ်ကြောင်းသိလိုက်ရ၍ သူအလွန်အံ့အားသင့်ခဲ့ရသည်! ယေဟောဝါသက်သေများ၏ လုပ်ဆောင်မှုများအကြောင်း အကျဉ်းချုပ်ဆွေးနွေးပြီးနောက် သူ့အိမ်သို့ သက်သေခံတစ်ဦးလာလည်ပတ်ဖို့ သူသဘောတူလက်ခံလိုက်သည်။

အယ်နာပေါ်လာအိမ်သို့ ဒေသခံအသင်းတော်မှ အချိန်ပြည့်ဓမ္မအမှုဆောင်တစ်ဦးဖြစ်သူ လေနာရောက်သွားသောအခါ အတန်ကြာစကားလက်ဆုံပြောဆိုကြပြီးနောက် ထာဝရအသက်ရစေသော အသိပညာaစာအုပ်ကို သူလက်ခံခဲ့သည်။ နောက်တစ်ကြိမ်ပြန်လည်ပတ်ချိန်တွင် အယ်နာပေါ်လာသည် ထိုစာအုပ်တစ်အုပ်လုံးကို ဖတ်ပြီးပြီဖြစ်၍ မေးခွန်းများစွာရှိ၏။ ကျမ်းစာသင်အံမှုကို သူချက်ချင်းလက်ခံလိုက်သည်။ “ကျွန်မအတွက်ဆိုရင် ဒါဟာ ကျမ်းစာကိုသဘောပေါက်နားလည်ဖို့ အခွင့်အရေးပဲ။ ကျမ်းစာကို ကျွန်မတစ်ခါမှ လက်ထဲမှာမကိုင်ခဲ့ဖူးဘူး” ဟု အယ်နာပေါ်လာ ပြောပြသည်။

ဇန်နဝါရီလတွင် ဗေသလသို့ အယ်နာပေါ်လာ သွားရောက်လည်ပတ်ပြီး နောက်အပတ်တွင် ခရစ်ယာန်အစည်းအဝေးကို ပထမဦးဆုံးအကြိမ်စတက်ခဲ့သည်။ နောက်များမကြာမီ သူ၏ကလေးများကို ကျမ်းစာသင်ပေးပြီး မိတ်ဆွေများကို သက်သေခံစပြုလေသည်။ သူက “သင်ယူသိရှိလာတဲ့အကြောင်းတွေကို ကျွန်မ မပြောပြဘဲမနေနိုင်ခဲ့ဘူး။ လူတွေကို ကျမ်းစာအမှန်တရား သိစေချင်တယ်၊ သူတို့ကိုနှစ်သိမ့်ပေးချင်တယ်” ဟုပြောပြသည်။ ကိုယ်ရေးကိုယ်တာပြဿနာအချို့ကို ကျော်လွှားရန် အပြင်းအထန်ကြိုးပမ်းပြီးနောက် အယ်နာပေါ်လာသည် အစည်းအဝေးများကို မှန်မှန်တက်တော့သည်။ အလျင်အမြန်တိုးတက်လာပြီး ၂၀၀၂၊ မေလ ၅ ရက်တွင် သူနှစ်ခြင်းခံခဲ့သည်။

ထို့အပြင် အယ်နာပေါ်လာ၏ပုံသက်သေကောင်းနှင့် ထက်သန်စွာဟောပြောခြင်းကြောင့် သူ၏မိခင်လည်း ကျမ်းစာစလေ့လာခဲ့ရာ မကြာသေးမီက နှစ်ခြင်းခံခဲ့သည်။ အယ်နာပေါ်လာ ဤသို့ပြောပြသည်– “ကျွန်မဘယ်လောက်ဝမ်းသာတယ်ဆိုတာကို မပြောပြတတ်အောင်ပဲ။ ယေဟောဝါကိုသိရှိလာပြီး ကိုယ်တော့်ကိုဝတ်ပြုခွင့်ရတဲ့အတွက်၊ ကိုယ်တော်ပေးသနားတဲ့ ဆုကျေးဇူးအားလုံးအတွက် နေ့တိုင်းကျေးဇူးတင်မိပါတယ်။”

[အောက်ခြေမှတ်ချက်]

[စာမျက်နှာ ၈ ပါ ရုပ်ပုံ]

အထက်ပုံ– အယ်နာပေါ်လာ

အောက်ပုံ– ပြင်သစ် ဌာနခွဲရုံးဝင်ပေါက်