“ချစ်ခင်သူ၏ဒဏ်ချက်”

တမန်တော်ပေါလုသည် ဂလာတိပြည်ရှိ ပထမရာစုခရစ်ယာန်တို့ကို ပြုပြင်ပေးရန်လိုကြောင်း တွေ့ မြင်ခဲ့သည်။ စိတ်မခုရလေအောင် သူက ဤသို့အလျင်ကြိုတင်မေးခဲ့သည်– “ယခုမူကား၊ ငါသည် [အမှန်] တရားကို သင်တို့အားဟောပြောသောကြောင့် သင်တို့၏ရန်သူဖြစ်သလော။”—ဂလာတိ ၄:၁၆။

‘မှန်ရာကို ပြောဆိုခြင်း’ ကြောင့် ပေါလုသည် သူတို့၏ရန်သူမဟုတ်ချေ။ အမှန်မှာ သူသည် သမ္မာကျမ်းစာမှ ဤမူနှင့်အညီ ပြုမူနေခြင်းဖြစ်သည်– “အဆွေခင်ပွန်းသည် ဒဏ်ပေးသောအခါ [“ချစ်ခင်သူ၏ဒဏ်ချက်သည်၊” သမ] သစ္စာစောင့်လျက် ပေး၏။” (သု. ၂၇:၆) အမှားပြုသူ၏သိက္ခာ ထိပါးနိုင်ကြောင်း သူသိထားသည်။ သို့သော် အပြစ်ပြုသူကို လိုအပ်သည့်အလျောက် ဆုံးမပဲ့ပြင်မှုမပေးပါက ယေဟောဝါဘုရားသခင်၏မေတ္တာမခံစားရစေသည့်သဘော သက်ရောက်သွားနိုင်ကြောင်း သူသိသည်။ (ဟေဗြဲ ၁၂:၅-၇) သို့ဖြစ်သောကြောင့် အသင်းတော်၏ရေရှည်အကျိုးကိုထောက်သော တည်ကြည်သည့်မိတ်ဆွေတစ်ဦးအနေနှင့် ပေါလုသည် ဆုံးမပဲ့ပြင်မှုကိုမပေးဘဲ မနေခဲ့ချေ။

ယေဟောဝါသက်သေများသည် ယနေ့ ‘လူမျိုးတကာတို့ကို တပည့်ဖြစ်စေလျက် [ယေရှုခရစ်] ပေးသမျှသောပညတ်တော်တို့ကို စောင့်ရှောက်စေခြင်းငှာ သွန်သင်ပေးခြင်း’ တာဝန်ကို ကျေပွန်စွာထမ်းဆောင်နေကြသည်။ သို့ပြုခြင်းဖြင့် စိတ်ရင်းမှန်သော ဤခရစ်ယာန်များသည် အယူဝါဒဆိုင်ရာအမှားများနှင့် ခရစ်ယာန်မဆန်သောအမူအကျင့်တို့ကို ဖော်ထုတ်ရှုတ်ချသည့် သမ္မာကျမ်းစာအမှန်တရားတို့ကို အလျှော့ပေးလိုက်လျောခြင်းမပြုကြချေ။ (မဿဲ ၁၅:၉; ၂၃:၉; ၂၈:၁၉၊ ၂၀; ၁ ကောရိန္သု ၆:၉၊ ၁၀) သူတို့သည် ငြင်းပယ်ရမည့် ရန်သူများဖြစ်မသွားဘဲ မိတ်ဆွေစစ်တို့တွင်ရှိအပ်သော စိတ်ဝင်စားမှုမျိုး တင်ပြနေသူများဖြစ်သည်။

ဘုရားသခင်မှုတ်သွင်းသော ထိုးထွင်းသိမြင်မှုဖြင့် ဆာလံဆရာက ဤသို့ရေးသားခဲ့သည်– “ဖြောင့်မတ်သောသူသည် အကျွန်ုပ်ကို ဒဏ်ခတ်ပါစေသော။ ကျေးဇူးရှိပါလိမ့်မည်။ ဆုံးမပါစေသော။ အကျွန်ုပ်ဦးခေါင်းကိုလိမ်းသော ဆီဖြစ်ပါလိမ့်မည်။ ထပ်၍ပြုသော်လည်း အကျွန်ုပ်မငြင်းပါ။”—ဆာလံ ၁၄၁:၅။