“လေမသင့်” သည့်အခါ

လှေတစ်စင်းဖြင့် ဂါလိလဲပင်လယ်ကိုဖြတ်ရန် ကြိုးစားရုန်းကန်နေကြရသော ယေရှုတပည့်တော်များ၏ တကယ့်အဖြစ်အပျက်ကို ဖော်ပြရာတွင် ခရစ်ဝင်ကျမ်းရေးသူမာကုက သူတို့သည် “လေမသင့်သောကြောင့် . . . တက်ခတ်၍ပင်ပန်းကြသည်” ဟုဆိုထားသည်။ ကမ်းခြေတွင်ရှိနေသေးသည့် ယေရှုသည် သူတို့၏အဖြစ်ကိုမြင်ကာ သူတို့ဆီသို့ အံ့ဖွယ်နည်းဖြင့် ရေပေါ်မှလှမ်းလျှောက်သွားခဲ့သည်။ လှေပေါ်၌ သူတို့ ရှိရာသို့တက်တော်မူလျှင် လေသည်ငြိမ်လေ၏။—မာကု ၆:၄၈-၅၁။

ထိုကျမ်းရေးသူကပင် အစောပိုင်းအဖြစ်အပျက်တစ်ခုတွင် “ပြင်းစွာသောမိုးသက်မုန်တိုင်း” ဖြစ်ခဲ့ကြောင်း မှတ်တမ်းတင်ခဲ့သည်။ ထိုအခါ ယေရှုသည် “လေနှင့်ပင်လယ်ကိုဆုံးမတော်မူသဖြင့် လေသည်ငြိမ်၍အလွန်သာယာလေ၏။”—မာကု ၄:၃၇-၃၉။

ယနေ့ ကျွန်ုပ်တို့သည် ထိုကဲ့သို့သောအံ့ဖွယ်အဖြစ်အပျက်များကို တွေ့ မြင်ရန် အခွင့်အရေးမရှိကြသော်လည်း ယင်းမှ များစွာသင်ယူနိုင်ပါသည်။ အန္တရာယ်ထူပြောသည့်အချိန်တွင် အသက်ရှင်နေရသော မစုံလင်သည့်လူသားများအနေဖြင့် ဆင်းရဲခက်ခဲခြင်းလေထန်မှ မလွတ်နိုင်ကြချေ။ (၂ တိမောသေ ၃:၁-၅) အမှန်မှာ၊ တစ်ခါတစ်ရံ ကိုယ်ရေးကိုယ်တာအခက်အခဲများကြောင့် စိတ်ဆင်းရဲမှုဝေဒနာသည် ပြင်းထန်သောမုန်တိုင်းပမာဖြစ်သည်ဟု ခံစားရနိုင်သည်။ သို့သော် သက်သာရာရနိုင်ပါသည်! ယေရှုက ဤသို့ဖိတ်ခေါ်ပါသည်– “ဝန်လေး၍ပင်ပန်းသောသူအပေါင်းတို့၊ ငါ့ထံသို့လာကြလော့။ ငါသည်ချမ်းသာပေးမည်။”—မဿဲ ၁၁:၂၈။

“လေမသင့်” ပုံရှိသည့်အခါ ကျွန်ုပ်တို့၏စိတ်နှလုံး “ငြိမ်၍အလွန်သာယာ” နိုင်ပါသည်။ မည်သို့အားဖြင့်နည်း။ ယေဟောဝါဘုရားသခင်၏ မပျက်မကွက်ပြည့်စုံမည့် ကတိတော်များကို ယုံကြည်ကိုးစားခြင်းအားဖြင့်ဖြစ်သည်။—ဟေရှာယ ၅၅:၉-၁၁; ဖိလိပ္ပိ ၄:၅-၇ နှိုင်းယှဉ်။