¿Ndáaña kúú ndiví?

Ña̱ káʼa̱n Biblia xa̱ʼa̱ ña̱yóʼo

Tá va̱xi tu̱ʼun ndiví nu̱ú Biblia káʼa̱nña xa̱ʼa̱ 1) ndiví ña̱ xítoyó, 2) ndiví nu̱ú íyo Ndióxi̱, ta saátu 3) ndiví ña̱ ndána̱ʼa̱ nda̱yí ña̱ kúúmií iinna ña̱ kaʼndachíñuna. Ta ña̱ káʼa̱n iníísaá capítulo chindeétáʼan xíʼinyó kunda̱a̱-iniyó ndáa ndiví káʼa̱nña xa̱ʼa̱.a

1. Ndiví ña̱ xítoyó. Tá káʼa̱n Biblia xa̱ʼa̱ ndiví, káʼa̱nña xa̱ʼa̱ ndiví ña̱ xítoyó, nu̱ú káni ta̱chí, nu̱ú ndáchí saa, nu̱ú ndóso vi̱kó ña̱ sákuun sa̱vi̱ xíʼin nieve ta saátu nu̱ú ndáye̱ʼe̱ tá káni taxa (Salmo 78:26; Proverbios 30:19; Isaías 55:10; Lucas 17:24). Saátu kivi ka̱ʼa̱nña xa̱ʼa̱ nu̱ú kánuu ñu̱ʼu, yo̱o̱ xíʼin ki̱mi (Deuteronomio 4:19; Génesis 1:1).

2. Ndiví nu̱ú íyo Ndióxi̱. Tu̱ʼun ndiví káʼa̱ntuña xa̱ʼa̱ ndiví nu̱ú íyo Ndióxi̱, káʼnuka ña̱yóʼo nu̱ú ndiví ña̱ xítoyó ta va̱ása kívi kuniyóña (1 Reyes 8:27; Juan 6:38) Kán kúú nu̱ú íyo Jehová ta̱ va̱ása kívi kuniyó ta kántu íyo na̱ ángel (Juan 4:24; Mateo 24:36). Savatu yichi̱ tá káʼa̱n Biblia xa̱ʼa̱ ndiví, káʼa̱nña xa̱ʼa̱ na̱ ángel (Salmo 89:5-7).

   Saátu tá va̱xi tu̱ʼun yóʼo nu̱ú Biblia, káʼa̱nña xa̱ʼa̱ lugar nu̱ú íyo Jehová (1 Reyes 8:43, 49; Hebreos 9:24; Apocalipsis 13:6). Tu̱ʼun Ndióxi̱ ni̱ka̱ʼa̱nña xa̱ʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa ña̱ xi̱ndoona chí ndiví soo ta̱vánana. Ña̱yóʼo kúni kachiña ña̱ va̱ása níkivika ki̱ʼvina nu̱ú íyo Jehová, soo ni̱xi̱yokavana chí ndiví (Apocalipsis 12:7-9, 12).

3. Ndiví ña̱ ndána̱ʼa̱ nda̱yí ña̱ kúúmií iinna ña̱ kaʼndachíñuna. Tá va̱xi tu̱ʼun ndiví nu̱ú Biblia, ndána̱ʼa̱ña nda̱yí ña̱ kúúmií iinna ña̱ kaʼndachíñuna, ta sava na̱ kúúmií nda̱yí yóʼo kúú:

   • Jehová Ndióxi̱ ta̱ káʼnu ta̱ kúúmií ndiʼi ndee̱ (2 Crónicas 32:20; Lucas 15:21).

   • Reino Ndióxi̱, ña̱ kixáʼa kaʼndachíñu nu̱ú ndiʼi na̱ chíñu na̱ íyo nu̱ú ñuʼú yóʼo. Ta Biblia káʼa̱nña xa̱ʼa̱ reino yóʼo ña̱ kúúña “ndiví xa̱á” (Isaías 65:17; 66:22; 2 Pedro 3:13).b

   • Na̱ nda̱kaxin Ndióxi̱ ña̱ ku̱ʼu̱nna chí ndiví (Efesios 2:6).

   • Na̱ chíñu na̱ xáʼndachíñu nu̱ú na̱ yiví (Isaías 14:12-14; Daniel 4:20-22; 2 Pedro 3:7).

   • Na̱ ta̱chí ndi̱va̱ʼa na̱ chíndaʼá na̱ yiví ña̱ keʼéna ña̱ va̱ása va̱ʼa (Efesios 6:12; 1 Juan 5:19).

¿Ndáa ki̱ʼva íyo ndiví?

Chí ndiví nu̱ú íyo Jehová xíʼin na̱ ángel ku̱a̱ʼání chiñu kéʼéna. Ku̱a̱ʼání millón kúú na̱ ángel na̱ ndóo kán ta kéʼéna ña̱ kúni̱ Jehová (Salmo 103:20, 21; Daniel 7:10).

Biblia káʼa̱nña xa̱ʼa̱ ndiví nu̱ú íyo iin ñuʼu̱ ña̱ ndeéní ndáye̱ʼe̱ (1 Timoteo 6:15, 16). Ti̱xin visión ña̱ xi̱ni ta̱ Ezequiel xa̱ʼa̱ ndiví, xi̱nira ña̱ ndeéní táxa ndiʼi ña̱ʼa, ta ti̱xin visión ña̱ xi̱ni ta̱ Daniel, xi̱nira iin yu̱ta tá ñuʼu̱ (Ezequiel 1:26-28; Daniel 7:9, 10). Iin lugar ña̱ yi̱i̱ á ña̱ va̱ása yaku̱a̱ kúú ndiví ta liviníña (Salmo 96:6; Isaías 63:15; Apocalipsis 4:2, 3).

Ndákanda̱ní-iniyó xa̱ʼa̱ ki̱ʼva ña̱ káʼa̱n Biblia xa̱ʼa̱ ndiví (Ezequiel 43:2, 3). Soo ni saá, miíyó na̱ yiví va̱ása kívi kunda̱a̱-iniyó ndáa ki̱ʼva íyo chí ndiví, chi va̱ása kívi kuniyó nu̱ú íyo Jehová xíʼin na̱ ángel.