¿Ama ndiʼi-xa̱ʼa̱ ñuyǐví yóʼo?

Ña̱ káʼa̱n Biblia xa̱ʼa̱ ña̱yóʼo

Ña̱ va̱ʼa kunda̱a̱-iniyó ama ndiʼi-xa̱ʼa̱ ñuyǐví yóʼo, siʼna xíniñúʼu kunda̱a̱-iniyó ndáaña kúni̱ kachi tu̱ʼun “ñuyǐví” tá va̱xiña nu̱ú Biblia. Tu̱ʼun Griego kósmos kúni̱ kachiña “ñuyǐví” ta ku̱a̱ʼá yichi̱ káʼa̱nña xa̱ʼa̱ ndiʼi na̱ yiví, tá kúú na̱ kúxíká nu̱ú Ndióxi̱ ta va̱ása kéʼéna ña̱ kúni̱ra (Juan 15:18, 19; 2 Pedro 2:5) Sava yichi̱ xíniñúʼuna tu̱ʼun kósmos ña̱ va̱ʼa ka̱ʼa̱nna xa̱ʼa̱ ña̱ íyo nu̱ú ñuyǐví yóʼo (1 Corintios 7:31; 1 Juan 2:15, 16).a

¿Ndáaña kúni̱ kachi Biblia tá káʼa̱nña ña̱ ndiʼi-xa̱ʼa̱ ñuyǐví?

Tu̱ʼun ndiʼi-xa̱ʼa̱ ñuyǐví ku̱a̱ʼání yichi̱ va̱xiña nu̱ú Biblia, ta siaʼa sándaya̱ʼanaña nu̱ú inkaka Biblia “ndiʼi-xa̱ʼa̱ tiempo” (Mateo 24:3; Reina-Valera, 1977). Su̱ví ña̱ ndiʼi-xa̱ʼa̱ ñuʼú káʼa̱nña xa̱ʼa̱, á ña̱ ndiʼi-xa̱ʼa̱ ndiʼi na̱ yiví, chi ña̱ káʼa̱nña xa̱ʼa̱ kúú ña̱ ndiʼi-xa̱ʼa̱ ña̱ʼa ña̱ íyo ñuyǐví yóʼo (1 Juan 2:17).

Biblia káʼa̱nña xíʼinyó ña̱ “ndiʼi-xa̱ʼa̱ na̱ kéʼé ña̱ va̱ása va̱ʼa”, tasaá na̱ yiví na̱ kéʼé ña̱ va̱ʼa, kusi̱í-inina kundoona nu̱ú ñuʼú yóʼo (Salmo 37:9-11). Ña̱yóʼo kuuña tá ná kixáʼa “tu̱ndóʼo ña̱ káʼnu” tasaá ki̱xáʼa ña̱ Armagedón (Mateo 24:21, 22; Apocalipsis 16:14, 16).

¿Ama ndiʼi-xa̱ʼa̱ ñuyǐví yóʼo?

Ta̱ Jesús ni̱ka̱ʼa̱nra: “Ni iinna va̱ása xíni̱ hora xíʼin ki̱vi̱, ni na̱ ángel na̱ íyo chí ndiví ni yi̱ʼi̱; mitúʼun yivái̱ xíni̱” (Mateo 24:36, 42). Ta ni̱ka̱ʼa̱nra ña̱ kixaa̱ña hora ña̱ va̱ása ndátuyó (Mateo 24:44).

Ni va̱ása kúnda̱a̱ káxi iniyó ndáa ki̱vi̱ ta ndáa hora kixaa̱ña, ta̱ Jesús ni̱ka̱ʼa̱nra ndáaña kuu tasaá kunda̱a̱-iniyó ña̱ xa̱a̱ ku̱nu̱mí ndiʼi-xa̱ʼa̱ ñuyǐví (Mateo 24:3, 7-14). Biblia káʼa̱nña xa̱ʼa̱ña ña̱ kúúña tiempo so̱ndíʼi á ki̱vi̱ nu̱ú ndíʼi (Daniel 12:4; 2 Timoteo 3:1-5).

¿Á íyo ña̱ kindo̱o tá ná ndiʼi-xa̱ʼa̱ ñuyǐví?

Íyova ña̱ kindo̱o. Saáchi Biblia káʼa̱nña xa̱ʼa̱ ñuʼú yóʼo ña̱ “nda̱a̱ ni iin ki̱vi̱ va̱ása sakánda̱naña nu̱ú kánuuña” (Salmo 104:5). Saátu káʼa̱n Biblia ña̱ kundookava na̱ yiví nu̱ú ñuʼú yóʼo: “Na̱ keʼé ña̱ nda̱kú ndakiʼinna ñuʼú yóʼo ta koona nu̱úña ndiʼi tiempo” (Salmo 37:29). Ndióxi̱ saxínura ña̱ xi̱kuni̱ra keʼéra nda̱a̱ tá xa̱ʼa̱:

• Ndulivi nu̱ú ñuʼú yóʼo (Isaías 35:1; Lucas 23:43).

• Va̱ása yi̱ʼvíkayó ta va̱ʼaní kundooyó (Miqueas 4:4).

• Ndiʼi na̱ yiví kuumiína chiñu ña̱ kusi̱í-inina keʼéna (Isaías 65:21-23).

• Va̱ása kooka kue̱ʼe̱ ta va̱ása kuchéekana (Job 33:25; Isaías 33:24).