Ná kandíxayó ña̱ kundaa Jehová miíyó

1, 2. ¿Ndáaña xa̱a̱ ku̱nu̱mí kuu ti̱xin loʼo tiempo?

NDÓOYÓ tiempo nu̱ú ndíʼi ta ti̱xin loʼo tiempo nasa̱ma ndiʼi ña̱ʼa ña̱ íyo nu̱ú ñuʼú yóʼo. Jehová chikaa̱ra-ini na̱ chíñu ña̱ keʼéna ña̱ “ndákanixi̱níra”, ña̱yóʼo kúni̱ kachiña “ña̱ ndataxina nda̱yí ña̱ kúúmiína ña̱ kúúna rey ndaʼa̱ tí kití yukú”, tí yóʼo kúú na̱ Naciones Unidas (Apoc. 17:17).a Ta ndee̱ ña̱ ndakiʼin tí kití yukú yóʼo xíʼin ña̱ chindeétáʼan na̱ chíñu xíʼinrí, sandiʼi-xa̱ʼa̱ va̱ʼana ndiʼi na̱ veʼe-ñu̱ʼu vatá na̱ íyo ñuyǐví yóʼo (Apoc. 17:16). Tasaá kixáʼa ña̱ gran tribulación, ta ¿ndáaña kuu tá ná kixáʼa ña̱yóʼo?

² Na̱ chíñu ndakutáʼanna ña̱ sandíʼi-xa̱ʼa̱na na̱ ñuu Ndióxi̱ (Ezeq. 38:14-16). ¿Nda̱chun kúú ña̱ keʼé na̱ chíñu ña̱yóʼo? Ta̱ Ndi̱va̱ʼa chikaa̱ra-inina ña̱ sandíʼi-xa̱ʼa̱na ndiʼi na̱ ndásakáʼnu Ndióxi̱. Tá ná keʼéna ña̱yóʼo, ¿ndáaña kuu? Saá kúú ña̱ kixaa̱ guerra Ndióxi̱ ña̱ naní Armagedón, ta̱ Jesús xíʼin na̱ 144,000 ta saátu na̱ ángel sandíʼi-xa̱ʼa̱na ndiʼi na̱ kúni̱ sandíʼi-xa̱ʼa̱ na̱ ñuu Ndióxi̱ ta sakákuna na̱ ndásakáʼnu Jehová. Saá ndiʼi-xa̱ʼa̱ ndiʼi ña̱ va̱ása va̱ʼa ña̱ íyo nu̱ú ñuʼú yóʼo nu̱ú xáʼndachíñu ta̱ Ndi̱va̱ʼa, ta kooyó nu̱ú iin ñuʼú livi nu̱ú kǒoka ta̱ Ndi̱va̱ʼa koo (Apoc. 16:14-16; 19:11-21).

3. ¿Ndáaña kotoyó nu̱ú artículo yóʼo?

³ ¿Á xíniñúʼu yi̱ʼvíyó ña̱ kixaa̱ ña̱ Armagedón sandíʼi-xa̱ʼa̱ña ñuyǐví ta̱ Ndi̱va̱ʼa yóʼo? Va̱ása, saáchi Jehová káʼa̱nra ña̱ kundaavara miíyó. Nu̱ú Salmo 91:7 káʼa̱nña ña̱yóʼo: “Yatin nu̱ún kuvi mil na̱ yiví ta u̱xu̱ mil koo na̱ kuvi chí ndaʼa̱ kúaʼún, soo kǒo nda̱a̱ ni iin ña̱ va̱ása va̱ʼa kundoʼún”. Nu̱ú artículo yóʼo kixáʼayó ka̱ʼa̱nyó xa̱ʼa̱ Salmo 91, tasaá ndakuiinyó pregunta yóʼo: ¿Ndáa ki̱ʼva káʼa̱n Jehová ña̱ kundaara na̱ ñuura? ¿Ndáa ki̱ʼva ndáara miíyó vitin? Ta, ¿ndáa ki̱ʼva kundaara miíyó chí nu̱únínu?

SALMO CHÍNDEÉTÁʼANÑA XÍʼINYÓ ÑA̱ KANDÍXAYÓ JEHOVÁ

4. ¿Ndáaña káʼa̱n Salmo 91:1 xíʼin 2 xíʼinyó?

⁴ Salmo 91 chíndeétáʼanña xíʼinyó ña̱ kandíxayó ña̱ kundaava Jehová miíyó. Ña̱ versículo 1 xíʼin 2 káʼa̱nña xíʼinyó ña̱ mií Jehová kundaara na̱ kándíxa miíra (kaʼvi Salmo 91:1, 2).b Nu̱ú ña̱yóʼo káʼa̱nña “yóʼó kúú ta̱ ndáa-inii̱ ña̱ chindeétáʼún xíʼi̱n ta íyoún nda̱a̱ táki̱ʼva íyo iin ñuu ña̱ kútu̱ní ndási nu̱ú kivi koose̱ʼíi̱”. Tiempo xi̱naʼá sava ñuu xi̱ndasi nama̱ sa̱táña ña̱ va̱ʼa kundaaña na̱ yiví, ta na̱ xi̱xika chí ke̱ʼe kivi ki̱ʼvina ñuu yóʼo ña̱ va̱ʼa ka̱kuna nu̱ú na̱ sáa̱-ini xíni miína. Ta nu̱ú versículo ña̱ va̱xi chí nu̱ú ña̱ ni̱ka̱ʼa̱n ta̱ salmista, xi̱niñúʼura sava ejemplo ña̱ náʼa̱ nu̱úyó ña̱ kundaava Jehová na̱ ñuura nu̱ú ña̱ kivi kundoʼona (Sal. 91:3-13). Iinlá Jehová ta̱ íyo ndiʼi ndee̱ kivi kundaa miíyó (Rut 2:12; Sal. 17:8).

5, 6. ¿Ndáaña káʼa̱n Salmo 91:14-16 xíʼinyó ta nda̱chun kivi kandíxayó ña̱yóʼo?

⁵ Versículo so̱ndíʼi ña̱ va̱xi nu̱ú Salmo 91 va̱xi tu̱ʼun ña̱ va̱ʼaní chíndeétáʼan xíʼinyó. Su̱víka ta̱ salmista kúú ta̱ káʼa̱n ña̱ kundaana miíyó, chi mií Jehová kúú ta̱ káʼa̱n ña̱ kundaara na̱ ndásakáʼnu miíra (kaʼvi Salmo 91:14-16).c Nu̱ú versículo yóʼo káʼa̱n Jehová ña̱ kundaarana xa̱ʼa̱ ña̱ kándíxana miíra, chi xíni̱na ki̱vi̱ra ta káʼa̱nna xíʼinra. Ndiʼi ña̱ káʼa̱n Jehová sáxi̱nuvaraña, ña̱kán kivi kandíxayó ña̱yóʼo ta kǒo kaka-iniyó ña̱ sáxi̱nuvara ña̱ káʼa̱nra (Núm. 23:19; Jos. 23:14).

⁶ Jehová kúni̱ra ná kandíxayó miíra ta ná kǒo yi̱ʼvíyó, xa̱ʼa̱ ña̱kán xi̱niñúʼura ta̱ ka̱ʼyi ña̱ Salmo 91 (Rom. 15:4). Nda̱a̱ táki̱ʼva ke̱ʼé ta̱ ka̱ʼyi ña̱ Salmo saátu miíyó kivi ka̱ʼa̱nyó ña̱yóʼo xíʼin Jehová: “Yóʼó kúú ta̱ ndáa-inii̱ ña̱ chindeétáʼún xíʼi̱n ta íyoún nda̱a̱ táki̱ʼva íyo iin ñuu ña̱ kútu̱ní ndási nu̱ú kivi koose̱ʼíi̱” (Sal. 91:2). ¿Ndáa ki̱ʼva kundaa Jehová miíyó?

¿NDÁA KI̱ʼVA KÁʼA̱N SALMO 91 ÑA̱ KUNDAA JEHOVÁ MIÍYÓ?

7. ¿Ndáa ki̱ʼva káʼa̱n Salmo 91 ña̱ kundaa Jehová miíyó?

⁷ Nu̱ú tutu ña̱ xa̱a̱ tává na̱ ñuu Ndióxi̱ káʼa̱nña xa̱ʼa̱ Salmo 91 ña̱ mií Jehová káʼa̱nra ña̱ kundaara miíyó ña̱ kǒo kuxíkáyó nu̱úra. Kivi kandíxayó Jehová chindeétáʼanvara xíʼinyó nu̱ú ña̱ʼa ña̱ kivi sakúxíka miíyó nu̱úra. Su̱ví nda̱saa ña̱ vií kítáʼanyó xíʼin Jehová káʼa̱n Salmo yóʼo xa̱ʼa̱, chi saátu kundaara miíyó ña̱ kǒo ndakava-iniyó ta kǒo ña̱ kundoʼoyó. Jehová va̱ása taxira na̱ sáa̱-ini xíni miíyó sandíʼi-xa̱ʼa̱na miíyó, ta saátu va̱ása taxira ña̱ ndi̱ʼi̱-iniyó ni ña̱ xo̱ʼvi̱yó. ¿Nda̱chun va̱ʼa kúnda̱a̱-iniyó Salmo 91 káʼa̱nña ña̱ kundaa Jehová miíyó ta va̱ása ndi̱ʼi̱-iniyó?

8, 9. ¿Ndáaña nda̱kuiin ta̱ Jesús yuʼú ta̱ Ndi̱va̱ʼa tá ni̱xa̱ʼa̱nra nu̱úra ta ndáaña sákuaʼayó xíʼin ña̱yóʼo? (Mateo 4:5-7).

⁸ Ndakanixi̱ní ndáa ki̱ʼva nda̱kuiin ta Jesús yuʼú ta̱ Ndi̱va̱ʼa tá ni̱ka̱ʼa̱nra xíʼinra ña̱ ná sandákavara miíra (kaʼvi Mateo 4:5-7). Tá sa̱ndáa ta̱ Ndi̱va̱ʼa ta̱ Jesús nu̱ú súkun va̱ʼa xi̱ní templo, ni̱ka̱ʼa̱nra xíʼinra ña̱ ná sakánara miíra saáchi na̱ ángel Jehová kundaanara ta kǒo ña̱ kundoʼora. Ta̱ Ndi̱va̱ʼa ni̱ka̱ʼa̱nra xa̱ʼa̱ ña̱ va̱xi nu̱ú Salmo 91:11, 12. Tá versículo yóʼo va̱ása káʼa̱nña ña̱ kundaa Jehová miíyó ña̱ va̱ʼa kǒo ña̱ kundoʼoyó, sana ka̱ʼa̱n ta Jesús ña̱yóʼo xíʼin ta̱ Ndi̱va̱ʼa: “Su̱ví ña̱ nda̱a̱ kúú ña̱ káʼún, Salmo yóʼo va̱ása káʼa̱nña ña̱ kundaa Jehová miíyó nu̱ú ña̱ kundoʼoyó”. Chi ña̱ ni̱ka̱ʼa̱n ta̱ Jesús kúú ña̱yóʼo: “Va̱ása kotondosóún Jehová Ndióxi̱ún”. ¿Ndáaña sákuaʼayó xíʼin ña̱yóʼo?

⁹ Ta̱ Jesús xi̱kunda̱a̱-inira, sava yichi̱ Jehová xi̱xiniñúʼura na̱ ángel ña̱ va̱ʼa kundaana na̱ xi̱ndasakáʼnu miíra ta kǒo ixandi̱va̱ʼa na̱ sáa̱-ini xíni miína xíʼinna (2 Rey. 6:15-17; 19:34, 35; Dan. 3:19, 20, 26-28; 6:16-22). Soo ta̱ Jesús va̱ása níxitondosóra yivára ta kundatura ña̱ ná xa̱a̱ na̱ ángel ña̱ sakákuna miíra. Ta̱ Ndi̱va̱ʼa va̱ása vií níxiniñúʼura ña̱ va̱xi nu̱ú Salmo 91 chi va̱ása níka̱ʼa̱nra xa̱ʼa̱ ña̱ kundaa Jehová ta̱ Jesús, chi ña̱ ni̱ka̱ʼa̱nra xíʼinra kúú ña̱ ná keʼéra iin ña̱ i̱yo tasaá kotondosóra Jehová.d Xíʼin ña̱ nda̱kuiin ta̱ Jesús yuʼú ta̱ Ndi̱va̱ʼa ña̱ va̱xi nu̱ú Salmo 91 kivi kandíxayó ña̱ ndáava Jehová miíyó ña̱ kǒo kuxíkáyó nu̱úra, ña̱ kusi̱í-iniyó xíʼin ña̱ kǒo nda̱a̱ ni iin ña̱ʼa kundoʼoyó.

10. ¿Ndáaña xíniñúʼu kandíxayó?

¹⁰ Ña̱ káʼa̱n Jehová xíʼinyó ña̱ va̱xi nu̱ú Salmo 91 va̱ʼaní chíndeétáʼanña xíʼinyó ña̱ kandíxayóra. Ku̱ndaa̱-iniyó ña̱ va̱ʼaní chíndeétáʼanra ta ndáara na̱ kándíxa miíra. Ña̱kán kǒo xíniñúʼu yi̱ʼvíyó tá ndákanixi̱níyó ña̱ ndiʼi-xa̱ʼa̱ ñuyǐví ta̱ Ndi̱va̱ʼa. Ná kotoyó ndáa ki̱ʼva ndáa Jehová miíyó tiempo vitin ta saátu ndáa ki̱ʼva kundaara miíyó chí nu̱únínu.

¿NDÁA KI̱ʼVA NDÁA JEHOVÁ MIÍYÓ VITIN?

11. ¿Ndáa ki̱ʼva chíndeétáʼan Jehová xíʼinyó ña̱ kǒo kuxíkáyó nu̱úra?

¹¹ Jehová ndáara miíyó ña̱ kǒo kuxíkáyó nu̱úra, táxira ku̱a̱ʼá ña̱ʼa ndaʼa̱yó ña̱ va̱ʼa viíka xa̱a̱yó kutáʼanyó xíʼinra. Tá kúú, kúnda̱a̱-inira ña̱ ndiʼi ki̱vi̱ chíkaa̱níyó nde̱e ña̱ kǒo ki̱ʼviyó ku̱a̱chi nu̱úra. Ta̱yóʼo táxira ku̱a̱ʼá ña̱ʼa ndaʼa̱yó ña̱ chíndeétáʼan xíʼinyó ña̱ va̱ʼa kuchiñuyó nu̱ú ña̱yóʼo (Rom. 6:16; 7:21-23). Ná ka̱ʼa̱nyó xa̱ʼa̱ sava ña̱yóʼo.

12, 13. ¿Ndáa ki̱ʼva kuchiñuyó nu̱ú ña̱ va̱ása va̱ʼa xíʼin ña̱ ndákanixi̱níyó? (Mateo 5:28, 29).

¹² Nu̱ú tu̱ʼun Jehová. Nu̱ú Biblia, va̱ása káʼa̱n kuití Jehová xíʼinyó ndáaña va̱ása xíniñúʼu keʼéyó, chi saátu káʼa̱nra xíʼinyó ndáaña xíniñúʼu keʼéyó ña̱ va̱ʼa kǒo ki̱ʼviyó ku̱a̱chi. Ná ndakanixi̱níyó xa̱ʼa̱ ña̱ káʼa̱n Mateo 5:28, 29 (kaʼviña). Ta̱ Jesús ni̱ka̱ʼa̱nra ña̱ tá iinna xítona “nu̱ú iin ñaʼá ta kúni̱na ku̱su̱nna xíʼinñá xa̱a̱ ni̱ki̱ʼvina ku̱a̱chi xíʼin ñáyóʼo xíʼin níma̱na”. ¿Ndáaña sákuaʼayó xíʼin ña̱yóʼo?

¹³ Tá xítoyó nu̱ú kána na̱ʼná ña̱ kini, sana kixáʼayó kuni̱yó keʼéyó ña̱yóʼo. Tá ná ya̱ʼayó nu̱ú iin prueba, sana kixáʼayó keʼéyó ña̱ kini saáchi ndíkaa̱ ña̱ kini níma̱yó (Sant. 1:14, 15). Ña̱ va̱ʼa ná kǒo ndakanixi̱níyó xa̱ʼa̱ ña̱ va̱ása va̱ʼa, ndi̱ku̱n ná nasamayó ña̱ ndákanixi̱níyó. Ta̱ Jesús ni̱ka̱ʼa̱nra ndáaña xíniñúʼu keʼéyó ña̱ va̱ʼa vií koo ña̱ ndákanixi̱níyó, ta̱yóʼo ka̱chira: “Tá nduchúnu̱ú kúaʼún sándakavarí yóʼó ndaʼa̱ ku̱a̱chi, tavárí ta sákana xíkárí” (Mateo 5:29). Na̱ʼná nu̱ú kána ña̱ kini íyoña nda̱a̱ táki̱ʼva íyo iin kue̱ʼe̱ ña̱ kíʼin miíyó ta xíniñúʼu sandíʼi-xa̱ʼa̱yóña (Col. 3:5). Tá xíniso̱ʼoyó consejo ña̱ ni̱ka̱ʼa̱n ta̱ Jesús, viíka xa̱a̱yó kutáʼanyó xíʼin Jehová.

14. ¿Ndáa ki̱ʼva chíndeétáʼan espíritu santo xíʼinyó?

¹⁴ Espíritu santo Jehová. Xíniñúʼura ña̱yóʼo ña̱ va̱ʼa chindeétáʼanra xíʼinyó ña̱ va̱ʼa kǒo ndakanixi̱níyó ña̱ kini. Tá ndiʼi yichi̱ ndúkúyóña nu̱úra taxivaraña ndaʼa̱yó (Luc. 11:9-13). ¿Ndáa ki̱ʼva chíndeétáʼan ña̱ espíritu santo xíʼinyó? Ta̱ apóstol Pablo ka̱ʼyira ña̱yóʼo: “Taxindó ná chindeétáʼan ña̱ espíritu santo xíʼinndó tasaá kǒo keʼéndó nda̱a̱ ni iin ña̱ʼa ña̱ kúni̱ ku̱ñundó” (Gál. 5:16). Versículo yóʼo káʼa̱nña xa̱ʼa̱ iin na̱ chíkaa̱ ndee̱ ña̱ keʼéna ña̱ káʼa̱n Ndióxi̱. Tá kéʼéyó ña̱ káʼa̱n Ndióxi̱ táxira espíritu santo ndaʼa̱yó ta ña̱yóʼo chíndeétáʼanña xíʼinyó ña̱ vií koo ña̱ ndákanixi̱níyó. Tá kíxáʼayó ndákanixi̱níyó xa̱ʼa̱ ña̱ kini, espíritu Ndióxi̱ kivi chindeétáʼanña xíʼinyó ña̱ nasamayó ña̱ ndákanixi̱níyó. Soo va̱ása sándiʼi-xa̱ʼa̱ña ndiʼi ña̱ va̱ása va̱ʼa ña̱ kíxáʼayó ndákanixi̱níyó soo táxiña ndee̱ ndaʼa̱yó ña̱ ya̱ʼayó nu̱ú ña̱ va̱ása va̱ʼa, tasaá viíka xa̱a̱yó kutáʼanyó xíʼin Jehová.

15. ¿Ndáa ki̱ʼva ndáa na̱ ñuu Jehová miíyó? (Koto na̱ʼná).

¹⁵ Na̱ ñuu Jehová. Xíniñúʼura na̱yóʼo ña̱ va̱ʼa tavána tutu ña̱ chindeétáʼan xíʼinyó ña̱ va̱ʼa ndasakáʼnukayóra. Xa̱ʼa̱ ña̱ kúúyó na̱ yiví ku̱a̱chi, sava yichi̱ ndákava-iniyó xa̱ʼa̱ ña̱ va̱ása va̱ʼa ke̱ʼéyó, kíxáʼayó ndíʼi̱-iniyó ta nda̱a̱ ndákanixi̱níyó ña̱ va̱ása ndáyáʼviyó. Ta Ndi̱va̱ʼa xíniñúʼura ña̱yóʼo ña̱ va̱ʼa sakúxíkara miíyó nu̱ú Ndióxi̱ (Mat. 4:3; 6:13). Soo na̱ ñuu Jehová távána tutu ña̱ táxi kúnda̱a̱-iniyó ña̱ íxakáʼnuva-ini Jehová xa̱ʼa̱yó ta ndáyáʼviyó nu̱úra, ta kivi kandíxayó ña̱ taxira ña̱ xíniñúʼuyó (Sal. 86:5; Mat. 10:29-31; Luc. 12:28; Heb. 13:5). ¿Á xa̱a̱ káʼviún sava tutu ña̱ tává na̱ ñuu Ndióxi̱ ta túviún ña̱ xa̱ʼa̱ miíún ka̱ʼyinaña? Ña̱yóʼo náʼa̱ña, Jehová xíniñúʼura na̱ ñuura ña̱ taxina ña̱ xíniñúʼuyó mií tiempo ña̱ xíniñúʼuyóña tasaá yatinka kooyó xíʼinra.

16. ¿Ndáaña táxi Jehová kúú, ta ndáaña keʼéra?

¹⁶ Jehová ndáara na̱ ñuura nu̱ú na̱ sáa̱-ini xíni miína. Soo táxivara ña̱ ná ya̱ʼa na̱ ndásakáʼnu miíra nu̱ú sava tu̱ndóʼo ta nda̱a̱ sava na̱yóʼo xíʼi̱ tasaá náʼa̱na ña̱ vatá kúú ña̱ káʼa̱n ta̱ Ndi̱va̱ʼa (Apoc. 2:10; 6:9). Ta̱ Ndi̱va̱ʼa kǒo kíndo̱o kuití inira xíʼin ña̱ xíʼi̱yó. Chi ta̱yóʼo kúni̱ra ña̱ ná sandíʼi-xa̱ʼa̱ va̱ʼana ndiʼi na̱ ndásakáʼnu Ndióxi̱ (Mat. 24:9; Apoc. 12:9-12). Soo va̱ása kuchiñura keʼéra ña̱yóʼo, chi kúnda̱a̱-iniyó ña̱ xíniñúʼu Jehová na̱ ángel ña̱ va̱ʼa kundaana na̱ ñuura tasaá kǒo ndiʼi-xa̱ʼa̱ na̱ ndásakáʼnu miíra na̱ íyo nu̱ú ñuʼú yóʼo (Heb. 1:7, 14).

17. ¿Nda̱chun va̱ása ndátuyó ña̱ kundaa Jehová miíyó nu̱ú ndiʼi ña̱ sáxo̱ʼvi̱ miíyó?

¹⁷ ¿Á ndáa Jehová iin tá iinyó ña̱ va̱ʼa kǒo nda̱a̱ ni iin ña̱ʼa kundoʼoyó? Saá kéʼévara, chi tá xíniso̱ʼoyó ña̱ káʼa̱nra kǒo kéʼéyó ña̱ kivi taxi tu̱ndóʼo ndaʼa̱yó (Prov. 14:29, 30; 22:3; 2 Cor. 7:1). Soo va̱ása ndátuyó ña̱ kundaara miíyó nu̱ú ndiʼi ña̱ʼa ña̱ kivi saxóʼvi̱ miíyó, chi tá saá ná keʼéra ta̱ Ndi̱va̱ʼa ka̱ʼa̱nkara ña̱ vatá xa̱ʼa̱ Jehová ña̱ ndásakáʼnu kuitíyóra xa̱ʼa̱ ña̱ ndáara miíyó (Job 1:10, 11). Kúnda̱a̱-iniyó Jehová kúndeé-inira tá íxandi̱va̱ʼa na̱ sáa̱-ini xíni miíyó xíʼinyó, saáchi tá kúndeé-iniyó yáʼayó nu̱ú tu̱ndóʼo saá kúú ña̱ ndásayi̱i̱yó ki̱vi̱ra (Rom. 9:22). Soo va̱ása taxira ña̱ koo ña̱yóʼo ku̱a̱ʼá tiempo. Jehová chíndeétáʼanra xíʼinyó ña̱ nda̱kú koo iniyó ni yáʼayó nu̱ú tu̱ndóʼo tasaá vií kitáʼanyó xíʼinra (1 Cor. 10:13; 1 Ped. 5:10).

¿NDÁA KI̱ʼVA KUNDAA JEHOVÁ MIÍYÓ CHÍ NU̱ÚNÍNU?

18. ¿Ndáa ki̱ʼva kundaa Jehová miíyó chí nu̱únínu?

¹⁸ Tá ná koo ña̱ gran tribulación, Jehová kundaara na̱ ñuura ña̱ va̱ʼa ndasakáʼnukanara. ¿Á kundaarana ña̱ va̱ʼa kǒo nda̱a̱ ni iin ña̱ʼa kundoʼona? Tá ná kixáʼa na̱ chíñu kanitáʼanna xíʼin na̱ ndásakáʼnu Ndióxi̱, va̱ása taxira ña̱ ná sandíʼi-xa̱ʼa̱na na̱ ndásakáʼnu miíra (Ezeq. 38:1, 2, 10-16). Tasaá kúú ña̱ kixáʼa ña̱ Armagedón, Jehová chindaʼára ta̱ Jesucristo xíʼin na̱ ángel na̱ íyo chí ndiví ña̱ va̱ʼa sandíʼi-xa̱ʼa̱na na̱ sáa̱-ini xíni Ndióxi̱ (Apoc. 17:12-14; 19:11, 14, 15). ¿Ndáa ki̱ʼva kundaara na̱ ñuura tá ná kixáʼa ña̱ Armagedón?

19, 20. ¿Nda̱chun va̱ása xíniñúʼu yi̱ʼvíyó tá ná kixaa̱ ña̱ Armagedón? (Koto na̱ʼná ña̱ va̱xi chí nu̱ú kíxáʼa tutu yóʼo).

¹⁹ Ná va̱ása yi̱ʼvíyó tá ná kixaa̱ ña̱ Armagedón sandíʼi-xa̱ʼa̱ña ndiʼi ña̱ va̱ása va̱ʼa íyo nu̱ú ñuʼú yóʼo. ¿Nda̱chun va̱ása xíniñúʼu yi̱ʼvíyó? Saáchi kándíxayó ña̱ kundaava Jehová miíyó. Ña̱kán kivi kandíxayó ta̱ Jesús xíʼin na̱ kítáʼan xíʼinra ña̱ sandíʼi-xa̱ʼa̱na ndiʼi na̱ sáa̱-ini xíni Ndióxi̱ ti̱xin ña̱ Armagedón, ta nda̱a̱ ni iin na̱yóʼo va̱ása ka̱kuna (Jer. 25:33; Zac. 14:12). Tá ná kixáʼa ku̱a̱chi yóʼo, nda̱a̱ ni iin na̱ ndásakáʼnu Jehová va̱ása kuvina ixaa na̱ sáa̱-ini xíni miína, ni na̱ ta̱chí ndi̱va̱ʼa va̱ása kivi keʼé ña̱yóʼo (Luc. 21:28; 2 Ped. 2:9).

²⁰ Tá ná koo ña̱ Armagedón, sana saá xi̱nu ña̱ ni̱ka̱ʼa̱n ta̱ salmista tá ka̱chira: “Yatin nu̱ún kuvi mil na̱ yiví ta u̱xu̱ mil koo na̱ kuvi chí ndaʼa̱ kúaʼún, soo kǒo nda̱a̱ ni iin ña̱ va̱ása va̱ʼa kundoʼún. Kuninu̱ún tá ná kuu ña̱yóʼo, kunivaún tá ná ndakiʼin na̱ ndi̱va̱ʼa-ini castigo. Xa̱ʼa̱ ña̱ ni̱ka̱ʼún ña̱yóʼo ‘Jehová kúú ta̱ ndáa-inii̱ ña̱ chindeétáʼanra xíʼi̱n’, ki̱xáʼún ndáa-iniún Ndióxi̱ ta̱ káʼnuní ña̱ kundaara yóʼó” (Sal. 91:7-9). Tá ná kixaa̱ ña̱ Armagedón, kivi kandíxayó ña̱ kundaa Jehová miíyó ta kǒo nda̱a̱ ni iin ña̱ʼa kundoʼoyó, kǒo ña̱ sandákava-iniyó ta saátu va̱ása kuxíkayó nu̱úra ta kiʼinra kuenta xíʼin iin tá iinyó. Nda̱a̱ táki̱ʼva ni̱ka̱ʼa̱n ta̱ salmista, “Jehová kúú ta̱ ndáa-inii̱” ta ta̱yóʼo káʼa̱nra xíʼinyó “Kǒo nda̱a̱ ni iin ña̱ va̱ása va̱ʼa kundoʼún”. Xa̱ʼa̱ ña̱kán va̱ása yíʼviyó ña̱ koo chí nu̱únínu, chi kándíxayó ña̱ kundaa Jehová miíyó.