Veʼe ña̱ xíniñúʼu na̱ hermano ña̱ sakúaʼana xa̱ʼa̱ Ndióxi̱

Jehová kútóoníra sánáʼa̱ra na̱ ñuura, ña̱kán ku̱vaʼa veʼe nu̱ú ku̱ʼu̱n na̱ hermano ña̱ va̱ʼa viíníka sakúaʼana. Tá kúú, xa̱a̱ íyo sava ku̱i̱ya̱ chí sa̱tá na̱ hermano xítona ndáa ki̱ʼva viíka sanáʼa̱na na̱ xáʼa̱n káʼvi Escuela ña̱ Evangelizadores ta saátu xítona ndáa ki̱ʼva viíka ndasaviína veʼe nu̱ú káʼvina. Saáchi ña̱ kúni̱ndi̱ kúú ña̱ ná kusi̱í-ini na̱ xáʼa̱n escuela yóʼo ta saátu na̱ sánáʼa̱-ñaʼá. ¿Ndáa ki̱ʼva xíniñúʼundi̱ donación ña̱ va̱ʼa keʼéndi̱ ña̱yóʼo?

Va̱ʼaníka íyo veʼe nu̱ú káʼvina

Xa̱a̱ ku̱a̱ʼání ku̱i̱ya̱, escuela yóʼo xíyoña salón ña̱ reino á salón ña̱ asamblea. Soo xa̱a̱ íxava̱ʼana veʼe ta ndásaviína savaña ña̱ va̱ʼa kuniñúʼuna ña̱yóʼo ña̱ kaʼvina. ¿Nda̱chun kéʼéna ña̱yóʼo? Ná ka̱ʼa̱nyó xa̱ʼa̱ u̱ni̱ ña̱ʼa.

Xíniñúʼuna na̱ chindeétáʼan xíʼinna ña̱ keʼéna ku̱a̱ʼáka chiñu. Ta̱ hermano Christopher Mavor ta̱ chíndeétáʼan xíʼin na̱ Comité ña̱ Servicio na̱ Cuerpo Gobernante ni̱ka̱ʼa̱nra: “Na̱ sucursal ni̱ka̱ʼa̱nna xíʼinndi̱ ña̱ xíniñúʼuna ku̱a̱ʼáka na̱ hermano xíʼin ná hermana ña̱ va̱ʼa natúʼunna xa̱ʼa̱ tu̱ʼun Ndióxi̱”. Tá kúú, ku̱i̱ya̱ 2019 na̱ sucursal ña̱ ñuu Brasil ni̱ka̱ʼa̱nna ña̱ xíniñúʼuna 7,600 na̱ ni̱xa̱ʼa̱n Escuela ña̱ Evangelizadores ña̱ va̱ʼa ku̱ʼu̱nna natúʼunna xíʼin na̱ yiví xa̱ʼa̱ Ndióxi̱ ñuu yóʼo. Saátu na̱ sucursal ña̱ Estados Unidos xíniñúʼuna ku̱a̱ʼáníka na̱ precursor na̱ xíni̱va̱ʼa ña̱ va̱ʼa sanáʼa̱na inkana ndáa ki̱ʼva natúʼunna xíʼin na̱ yiví chí calle, nu̱ú xíka ku̱a̱ʼá na̱ yiví, nu̱ú xáa̱ tú barco ta saátu veʼeka̱a. Xíniñúʼundi̱ na̱ hermano na̱ kachíñu ti̱xin departamento Local ña̱ Diseño xíʼin Construcción ta saátu na̱ kachíñu xíʼin na̱ Comité na̱ Nátúʼun xíʼin na̱ hospital. Ta na̱ ni̱xa̱ʼa̱n Escuela ña̱ Evangelizadores kúú na̱ kivi keʼé chiñu yóʼo.

Ku̱a̱ʼáka solicitud chíndaʼána. Ku̱a̱ʼání na̱ hermano chíndaʼána solicitud chi kúni̱na ku̱ʼu̱nna Escuela ña̱ Evangelizadores, soo xa̱ʼa̱ ña̱ kǒo ku̱a̱ʼá lugar va̱ása kívi kanandi̱ ndiʼina. Tá kúú ti̱xin iin kuití ku̱i̱ya̱, na̱ hermano na̱ ndóo chí Brasil chi̱ndaʼána ki̱ʼva 2,500 solicitud sucursal ña̱ íyo ñuu yóʼo. Soo xa̱ʼa̱ ña̱ válíní veʼe nu̱ú káʼvina va̱ása kívi ku̱ʼu̱n ndiʼina, ña̱kán 950 kuitína va̱ʼa ni̱xa̱ʼa̱n.

Nu̱ú kíndo̱o na̱ xáʼa̱n Escuela. Tá xíyo escuela ña̱ Evangelizadores ti̱xin iin salón nu̱ú ndákutáʼanyó á iin salón ña̱ asamblea, na̱ xáʼa̱n escuela yóʼo kíndo̱ona veʼe na̱ hermano. Tá loʼo yichi̱ káʼvina ti̱xin iin ku̱i̱ya̱, va̱ʼava kíndo̱ona veʼe na̱ hermano. Soo tá ku̱a̱ʼání yichi̱ káʼvina ti̱xin iin ku̱i̱ya̱ íxayo̱ʼvi̱vaña xíʼin na̱ hermano ña̱ ndakiʼinna ndiʼi na̱yóʼo veʼena. Xa̱ʼa̱ ña̱kán i̱xava̱ʼana veʼe nu̱ú kundoo na̱ xáʼa̱n escuela, ta veʼe yóʼo yatin ndítaña xíʼin salón nu̱ú káʼvina.

Ña̱ va̱ʼa ixava̱ʼana iin veʼe nu̱ú kundoo 30 na̱ hermano xíʼin na̱ sánáʼa̱-ñaʼá, ta saátu ña̱ ixava̱ʼana veʼe nu̱ú kaʼvina, xíniñúʼuna ku̱a̱ʼání xu̱ʼún, chi sava ñuu nu̱ú íxava̱ʼana ña̱yóʼo yaʼvika sava ña̱ʼa.

Nu̱ú íyo veʼe yóʼo xíʼin ki̱ʼva ña̱ íyoña

Chí yuʼú ñuu kúú nu̱ú kéʼéna veʼe nu̱ú kaʼvi na̱ hermano yóʼo, soo yáʼava carro tú kivi kaka na̱ hermano xíʼin. Íxava̱ʼana veʼe yóʼo ñuu nu̱ú íyo ku̱a̱ʼání na̱ publicador na̱ kivi ku̱ʼu̱n kachíñu ña̱ va̱ʼa ndasaviínaña.

Veʼe yóʼo íyo biblioteca nu̱ú káʼvina, íyotu computadora xíʼin impresora. Saátu íyo nu̱ú xíxi na̱ xáʼa̱n escuela yóʼo xíʼin na̱ sánáʼa̱-ñaʼá, ta íyotu lugar nu̱ú kivi keʼéna ejercicio, kusíkína á keʼéna inkaka ña̱ʼa.

Soo ña̱ ndáyáʼvi va̱ʼaka kúú salón nu̱ú kaʼvina. Iin ta̱ hermano ta̱ naní Troy, ta̱ káchíñu xíʼin na̱ Departamento Mundial ña̱ Diseño xíʼin Construcción ña̱ ndíkaa̱ chí Warwick (Nueva York) káchira: “Ni̱ka̱ʼa̱nndi̱ xíʼin na̱ Departamento ña̱ Escuelas Teocráticas ña̱ ná chindeétáʼanna xíʼinndi̱ ña̱ viíka kuva̱ʼa veʼe nu̱ú sákuaʼa na̱ xáʼa̱n escuela yóʼo. Na̱ hermano yóʼo ni̱ka̱ʼa̱nna xíʼinndi̱ ndáa ki̱ʼva kooña, ta saátu ndáa ki̱ʼva koo equipo ña̱ audio xíʼin video”. Ta̱ Zoltán ta̱ sánáʼa̱ ti̱xin Escuela ña̱ Evangelizadores ta̱ íyo chí Hungría káchira: “Tá xa̱ʼa̱, kǒo micrófono níxikuumiíndi̱, ña̱kán xi̱kaʼa̱nndi̱ xíʼin na̱ hermano ña̱ ndeéka ná ka̱ʼa̱nna, soo vitin mesa tú xíniñúʼuna kúúmiínú micrófono ta va̱ʼaníka xíniso̱ʼondi̱ ña̱ káʼa̱nna”.

“Mií Jehová kúú ta̱ ka̱na ndi̱ʼi̱”

¿Ndáaña va̱ʼa xa̱a̱ ndákiʼin na̱ sánáʼa̱ ti̱xin escuela yóʼo ta saátu na̱ xáʼa̱n káʼvi? Ñá Angela ñá ni̱xa̱ʼa̱n Escuela ña̱ Evangelizadores chí Palm Coast (Florida, Estados Unidos), káchiñá: “Va̱ʼaní ku̱vaʼa cuarto nu̱ú kísi̱na ta saátu nu̱ú ndákutáʼanna káʼvina. Xa̱ʼa̱ ña̱kán, ña̱ ndíʼi̱ kuití inina xa̱ʼa̱ kúú ña̱ kaʼvina ta saátu ña̱ sakúaʼana”. Ta̱ Csaba iin ta̱ sánáʼa̱ ti̱xin escuela yóʼo ta̱ íyo chí ñuu Hungría, kútóoníra kuxura xíʼin na̱ xáʼa̱n káʼvi escuela yóʼo. Ta̱yóʼo káchira: “Va̱ʼaníka nátúʼunna xa̱ʼa̱ ña̱ ndóʼona ta va̱ʼaníka xáa̱ndi̱ kúnda̱a̱-inindi̱ ndáa ki̱ʼva íyona. Ña̱yóʼo chíndeétáʼanña xíʼinndi̱ ña̱ kunda̱a̱-inindi̱ ndáaña sándi̱ʼi-inina tasaá kotondi̱ ndáa ki̱ʼva sanáʼa̱ndi̱na”.

Na̱ sánáʼa̱ ti̱xin Escuela ña̱ Evangelizadores xíʼin na̱ xáʼa̱n káʼvi, xítona ña̱ iin bendición ña̱ va̱ʼaní ña̱ táxi Jehová ndaʼa̱na kúú ña̱yóʼo saáchi miíra kúú ta̱ va̱ʼaní sánáʼa̱ miíyó (Isaías 30:20, 21). Tá kúú, chí ñuu Filipinas nda̱saviína iin veʼe ña̱ va̱ʼa kuniñúʼu na̱ hermano ña̱yóʼo ña̱ kaʼvina. Iin ñá hermana ñá ni̱xa̱ʼa̱n ka̱ʼvi ini veʼe yóʼo káchiñá: “Tá xi̱nindi̱ veʼe yóʼo xíʼin ndiʼi ña̱ kúúmiíña, nda̱kanixi̱níndi̱ ña̱ mií Jehová kúú ta̱ ka̱na ndi̱ʼi̱ chi kúni̱ra ña̱ ná kusi̱í-iniyó nani káʼviyó tu̱ʼunra”.

Xu̱ʼún ña̱ táxindó kúú ña̱ xíniñúʼundi̱ ña̱ íxava̱ʼandi̱ veʼe nu̱ú káʼvi na̱ hermano, ña̱ ndásaviíndi̱ña ta saátu ña̱ kíʼinndi̱ kuenta xíʼinña. Ta ku̱a̱ʼáníndó táxindó xu̱ʼún yóʼo chí nu̱ú donate.jw.org. Tíxa̱ʼviníndó xa̱ʼa̱ ña̱ va̱ʼaní-inindó.