¿Ndáaña káʼa̱n Biblia xa̱ʼa̱ ña̱ sáa̱nína?

Ña̱ káʼa̱n Biblia xa̱ʼa̱ ña̱yóʼo

Biblia káʼa̱nña ña̱ tá iin na̱ yiví sáa̱nína ta kǒo kívi ka̱ʼnu̱na miína, xóʼvi̱ miína ta saátu xóʼvi̱ na̱ íyo xíʼinna (Proverbios 29:22). Sava yichi̱ kivi sa̱a̱vayó xa̱ʼa̱ sava ña̱ʼa, soo xíniñúʼu kiʼinníyó kuenta chi tu̱ʼun Ndióxi̱ káʼa̱nña xíʼinyó ña̱ na̱ kamaní sáa̱ va̱ása ka̱kuna (Gálatas 5:19-21). Consejo ña̱ va̱xi nu̱ú Biblia kivi chindeétáʼanña xíʼinyó ña̱ va̱ʼa ka̱ʼnu̱-iniyó ta kǒo sa̱a̱níyó.

• ¿Á iin ku̱a̱chiví kúú ña̱ sa̱a̱níyó?

• ¿Ama kúú ña̱ kǒo xíniñúʼu sa̱a̱yó?

• ¿Ndáaña kivi keʼéyó ña̱ va̱ʼa ka̱ʼnu̱-iniyó ta kǒo sa̱a̱níyó?

• Texto ña̱ káʼa̱n xa̱ʼa̱ ña̱ sáa̱na

¿Á iin ku̱a̱chiví kúú ña̱ sa̱a̱níyó?

Sava yichi̱, su̱ví iin ku̱a̱chiví kúú ña̱ sa̱a̱níyó. Tá kúú, iin ta̱ xi̱ndasakáʼnu Ndióxi̱ tiempo xi̱naʼá ta̱ xi̱naní Nehemías, ni̱sa̱a̱níra tá na̱kunda̱a̱-inira ña̱ xi̱ ixandi̱va̱ʼanína xíʼin na̱ xi̱ndasakáʼnu Ndióxi̱ (Nehemías 5:6).

Sava yichi̱, nda̱a̱ mií Ndióxi̱ sáa̱. Tá kúú, tá ki̱xáʼa na̱ ñuura ndásakáʼnuna ndióxi̱ vatá, ni̱sa̱a̱ní Jehová xíʼinna (Jueces 2:13, 14). Ni sáa̱va Jehová, soo su̱ví ndiʼi tiempo sáa̱ra. Chi tá sáa̱ra, íyova ña̱ʼa ña̱ sása̱a̱ miíra ta va̱ʼaní xáʼnu̱-inira tá sáa̱ra (Éxodo 34:6; Isaías 48:9).

¿Ama kúú ña̱ kǒo xíniñúʼu sa̱a̱yó?

Va̱ása va̱ʼa sa̱a̱yó tá kǒo xíni̱yó ka̱ʼnu̱yó miíyó á tá kǒo ña̱ʼa níkeʼéna xíʼinyó, chi ña̱yóʼo kúú ña̱ ndóʼoyó xa̱ʼa̱ ña̱ kúúyó na̱ yiví ku̱a̱chi. Ná kotoyó u̱vi̱ ejemplo.

• Ni̱sa̱a̱ní ta̱ Caín tá kǒo níndákiʼin Ndióxi̱ ña̱ ta̱xira ndaʼa̱ra, xa̱ʼa̱ ña̱ ni̱sa̱a̱níra nda̱a̱ xa̱ʼníra ñanira (Génesis 4:3-8).

• Ni̱sa̱a̱ní ta̱ profeta Jonás tá i̱xakáʼnu-ini Ndióxi̱ xa̱ʼa̱ na̱ ñuu Nínive. Ndióxi̱ ta̱xira consejo ndaʼa̱ ta̱ Jonás ta ni̱ka̱ʼa̱nra xíʼinra ña̱ ná kǒo sa̱a̱níra, chi ña̱ xi̱niñúʼu keʼéra kúú ña̱ kundáʼvi-inira kunira na̱ yiví kán chi nda̱ndikó-inina (Jonás 3:10-4:1, 4, 11).a

U̱vi̱ ejemplo yóʼo náʼa̱ña nu̱úyó ña̱ “na̱ yiví na̱ sáa̱ní, va̱ása nda̱kú kéʼéna nda̱a̱ táki̱ʼva kúni̱ mií Ndióxi̱” chi sáa̱nína ta kǒo kíví ka̱ʼnu̱na miína (Santiago 1:20).

¿Ndáaña kivi keʼéyó ña̱ va̱ʼa ka̱ʼnu̱-iniyó ta kǒo sa̱a̱níyó?

• Xíniñúʼu ndakuniyó ña̱ tá sáa̱níyó náʼa̱yó ña̱ vitáníyó. Sava na̱ yiví ndákanixi̱nína ña̱ iin ña̱ va̱ʼaníva kúú ña̱ sa̱a̱na soo su̱ví saá íyoña. Na̱ yiví na̱ kamaní sáa̱ ta kǒo kíví ka̱ʼnu̱na miína vitánína. Tu̱ʼun Ndióxi̱ káʼa̱nña: “Na̱ kamaní sáa̱, íyona nda̱a̱ táki̱ʼva íyo iin ñuu ña̱ kǒo nama̱ sa̱tá ña̱ sa̱ndíʼi-xa̱ʼa̱na” (Proverbios 25:28; 29:11). Soo, tá xáʼnu̱-iniyó ta kǒo kama sáa̱yó náʼa̱yó ña̱ ndakúyó ta kúúyó na̱ ndíchi (Proverbios 14:29). Biblia káʼa̱nña: “Va̱ʼaníka ña̱ kúee koo iniyó nu̱úka ña̱ ndakú kooyó” (Proverbios 16:32).

• Ná ka̱ʼnu̱-iniyó ta ná kǒo sa̱a̱níyó chi kivi keʼéyó iin ña̱ʼa ña̱ ndandikó-iniyó xa̱ʼa̱. Salmo 37:8 káchiña: “Va̱ása sa̱a̱kaún, ndakoo ña̱ sáún”, tándi̱ʼi káʼa̱nkaña. “Chí tá ná sa̱ún, keʼún ña̱ va̱ása va̱ʼa”. Nda̱a̱ táki̱ʼva káʼa̱n tu̱ʼun yóʼo, tá sáa̱yó va̱ʼaka ná ndi̱ko-iniyó ña̱ va̱ʼa kǒo keʼéyó iin ña̱ va̱ása va̱ʼa. Nda̱a̱ táki̱ʼva káʼa̱n Efesios 4:26: “Tá sáa̱ndó, kǒo ki̱ʼvindó ku̱a̱chi”.

• Tá xa̱a̱ kíxáʼa sáa̱yó va̱ʼaka ná ku̱ʼu̱nyó. Biblia káʼa̱nña: “Ña̱ kixáʼayó na̱áyó íyoña nda̱a̱ táki̱ʼva íyo ña̱ kunáyó nu̱ú ñúʼu ku̱a̱ʼání ti̱kui̱í; va̱ʼaka ná ku̱ʼu̱nyó tá kúma̱níka kixáʼa na̱átáʼanyó” (Proverbios 17:14). Tá kúúmiíyó iin ku̱a̱chi xíʼin iinna ndi̱ku̱n ná ndasaviíyóña, soo siʼna ná ya̱ʼa ña̱ sáa̱ u̱vi̱ saáyó ta saáví ndasaviíyó ku̱a̱chi.

• Ná kunda̱a̱-iniyó xa̱ʼa̱ ndiʼi ña̱ ku̱u. Proverbios 19:11 káʼa̱nña: “Tá iin na̱ yiví kúúmiína ña̱ ndíchi, ña̱yóʼo chindeétáʼan xíʼinna ña̱ va̱ása kama sa̱a̱na”. Xíniñúʼu kunda̱a̱-iniyó xa̱ʼa̱ ndiʼi ña̱ ku̱u chi ña̱yóʼo chindeétáʼan xíʼinyó ña̱ kǒo sa̱a̱níyó (Santiago 1:19).

• Ná ka̱ʼa̱nyó xíʼin Ndióxi̱ ña̱ chindeétáʼanra xíʼinyó ña̱ va̱ʼa kǒo ndi̱ʼiní-iniyó. Tá kéʼéyó oración va̱ʼaní chíndeétáʼanña xíʼinyó, chi saá kúú ña̱ sándi̱ko Ndióxi̱ iniyó (Filipenses 4:7). Tá kéʼéyó oración nu̱ú Ndióxi̱ táxira espíritu santora ndaʼa̱yó ta ña̱yóʼo kúú ña̱ chíndeétáʼan xíʼinyó ña̱ táxi̱n koo iniyó, kúee koo iniyó ta saátu ña̱ ka̱ʼnu̱-iniyó (Lucas 11:13; Gálatas 5:22, 23).

• Ná nda̱kaxin viíyó na̱ kutáʼan xíʼinyó. Miíyó na̱ yiví kéʼéyó nda̱a̱ táki̱ʼva kéʼé na̱ yiví na̱ kítáʼanyó xíʼin (Proverbios 13:20; 1 Corintios 15:33). Xa̱ʼa̱ ña̱kán, káxiní káʼa̱n tu̱ʼun Ndióxi̱ xíʼinyó: “Va̱ása kutáʼún xíʼin na̱ kue̱ʼe̱ní ni va̱ása kutáʼún xíʼin na̱ kamaní sáa̱”. ¿Nda̱chun? “Chi kivi kixáʼún keʼún nda̱a̱ táki̱ʼva kéʼé na̱yóʼo, ta kivi saxóʼvi̱ún miíún xíʼin ña̱yóʼo” (Proverbios 22:24, 25).