¿Ndáana kúú na̱ ángel?
Ña̱ káʼa̱n Biblia xa̱ʼa̱ ña̱yóʼo
Su̱ví táki̱ʼva íyo miíyó saá íyo na̱ ángel chi na̱yóʼo íyoní ndee̱na ta ku̱a̱ʼání ña̱ʼa kivi keʼéna (2 Pedro 2:11). Na̱ ángel ndóona chí ndiví nu̱ú íyo Ndióxi̱ soo va̱ása kívi kuniyó nu̱ú ndóona (1 Reyes 8:27; Juan 6:38). Ña̱kán sava yichi̱ káʼa̱n Biblia xa̱ʼa̱na ña̱ kúúna espíritu (1 Reyes 22:21; Salmo 18:10).
¿Ndáa míí ke̱e na̱ ángel?
Ndióxi̱ kúú ta̱ i̱xava̱ʼa na̱yóʼo ta ta̱ Jesús kúú ta̱ chi̱ndeétáʼan xíʼinra chi ta̱yóʼo kúú “ta̱ nu̱ú va̱ʼa na̱kuva̱ʼa nu̱ú ndiʼika ña̱ʼa”. Ta siaʼa káʼa̱n Biblia xa̱ʼa̱ chiñu ña̱ ke̱ʼé ta̱ Jesús: “Ta̱yóʼo kúú ta̱ xi̱niñúʼu Ndióxi̱ ña̱ ke̱ʼéra ndiʼika ña̱ʼa ña̱ íyo chí ndiví ta saátu ña̱ íyo nu̱ú ñuʼú, ña̱ʼa ña̱ va̱ʼa kuniyó xíʼin ña̱ʼa ña̱ kǒo kívi kuniyó” ta i̱xava̱ʼatura na̱ ángel (Colosenses 1:13-17). Na̱yóʼo va̱ása tíndaʼa̱na ta kǒo se̱ʼena íyo saáchi se̱ʼe Ndióxi̱ kúúna ta iin tá iinna ku̱vaʼa (Job 1:6; Marcos 12:25).
Xa̱a̱ ya̱chi̱ví ku̱vaʼa na̱ ángel tá kúma̱níka kuva̱ʼa ñuʼú nu̱ú ndóoyó yóʼo. Tá ixava̱ʼa Ndióxi̱ ñuʼú “ndiʼi na̱ ángel ki̱xáʼana ndáʼyi̱ kóʼóna ta nda̱sakáʼnuna Ndióxi̱” (Job 38:4-7).
¿Nda̱saa na̱ ángel íyo?
Biblia va̱ása káʼa̱nña nda̱saa kúú na̱ íyo soo náʼa̱vaña ña̱ ku̱a̱ʼání kúú na̱ íyo. Tá kúú ti̱xin iin visión xi̱ni ta̱ apóstol Juan ña̱ ku̱a̱ʼání millón kúu na̱ ángel (Apocalipsis 5:11, nota).
¿Á íyo ki̱vi̱ iin tá iin na̱ ángel ta á inkáchi íyo ndiʼina?
Biblia káʼa̱nña xa̱ʼa̱ ki̱vi̱ na̱ ángel: Ta̱ Miguel xíʼin ta̱ Gabriel (Daniel 12:1; Lucas 1:26).a Ta inka na̱ ángel ni̱ka̱ʼa̱nna ña̱ íyo ki̱vi̱na soo va̱ása níka̱ʼa̱nna ndáaña kúúña (Génesis 32:29; Jueces 13:17, 18).
Xa̱a̱ síín síín íyo iin tá iin na̱ ángel ta xa̱a̱ síín íyo ña̱ ndákanixi̱ní iin tá iinna. Ta saátu na̱ ángel, va̱ʼa nátúʼunna xíʼin táʼanna ta ndásakáʼnuna Jehová (Lucas 2:13, 14; 1 Corintios 13:1). Kivitu ndaka̱xinna á keʼéna ña̱ va̱ʼa á ña̱ va̱ása va̱ʼa nda̱a̱ táki̱ʼva ke̱ʼé na̱ ni̱ki̱ʼvi ku̱a̱chi ta nda̱kutáʼanna xíʼin ta̱ Ndi̱va̱ʼa ña̱ koona contra Ndióxi̱ (Mateo 25:41; 2 Pedro 2:4).
¿Á íyo na̱ ángel na̱ kúúmií chiñu ña̱ ndáyáʼvika nu̱ú inkana?
Íyovana. Ta̱ ángel ta̱ kúúmiíka ndee̱ xíʼin nda̱yí kúú ta̱ arcángel Miguel (Judas 9; Apocalipsis 12:7). Na̱ serafín kúú inka na̱ ángel na̱ kúúmií chiñu ña̱ ndáyáʼvi chi na̱yóʼo ndítana sa̱tá tayi̱ nu̱ú xáʼndachíñu Ndióxi̱ (Isaías 6:2, 6). Ta inka na̱ ángel na̱ kúúmií chiñu ña̱ ndáyáʼvi kúú na̱ querubín ta kéʼéna chiñu ña̱ va̱ása kéʼé inkaka na̱ ángel, na̱yóʼo kúú na̱ xi̱ndaa chí nu̱ú xi̱kiʼvina chí jardín ña̱ Edén tá ta̱vá Ndióxi̱ ta̱ Adán xíʼin ñá Eva (Génesis 3:23, 24).
¿Á kivi chindeétáʼan na̱ ángel xíʼinyó?
Kiviva. Ndióxi̱ xíniñúʼura na̱yóʼo ña̱ va̱ʼa chindeétáʼanra xíʼin na̱ yiví, ná kotoyó ndáa ki̱ʼva kéʼéraña:
Ndióxi̱ xíniñúʼura na̱ ángel ña̱ va̱ʼa kuniʼina yichi̱ nu̱ú na̱ ndásakáʼnu Ndióxi̱ tá xáʼa̱nna nátúʼunna xa̱ʼa̱ Reinora (Apocalipsis 14:6, 7). Chíndeétáʼanna xíʼin na̱ nátúʼun xa̱ʼa̱ra ta saátu xíʼin na̱ xíniso̱ʼo ña̱ nátúʼunna (Hechos 8:26, 27).
Na̱ ángel chíndeétáʼanna xíʼin congregación ña̱ va̱ása koo na̱ yiví na̱ kéʼé ña̱ va̱ása va̱ʼa (Mateo 13:49).
Na̱ ángel ndáana na̱ nda̱kú íyo ini xíʼin Ndióxi̱ ta níʼina yichi̱ nu̱úna (Salmo 34:7; 91:10, 11; Hebreos 1:7, 14).
Si̱lóʼo kúma̱ní ta ndakutáʼan na̱ ángel xíʼin ta̱ Jesús ña̱ ndatavána na̱ yiví ndaʼa̱ ña̱ va̱ása va̱ʼa ta va̱ása xo̱ʼvi̱kana (2 Tesalonicenses 1:6-8).
¿Á íyo iin ángel na̱ ndáa iin tá iinyó?
Na̱ ángel chíndeétáʼanna xíʼin na̱ yiví ña̱ vií kitáʼanna xíʼin Ndióxi̱ soo ña̱yóʼo va̱ása kúni̱ kachiña ña̱ ndáka̱xin Ndióxi̱ iin ángel ña̱ kundaana iin tá iin na̱ ndásakáʼnu miíra á ña̱ ndakiʼinna tu̱ʼunna (Mateo 18:10).b Na̱ ángel va̱ása ndátavána na̱ ndásakáʼnu Ndióxi̱ ndaʼa̱ ndiʼi tu̱ndóʼo ta saátu va̱ása sásina nu̱úna ña̱ ki̱ʼvina ku̱a̱chi. Biblia káʼa̱nña ña̱ chíndeétáʼanvara xíʼin na̱ yiví ña̱ ya̱ʼana nu̱ú tu̱ndóʼo chi táxira ña̱ ndíchi ndaʼa̱na ta saátu táxira ndee̱ ndaʼa̱na ña̱ ya̱ʼana nu̱ú tu̱ndóʼo (1 Corintios 10:12, 13; Santiago 1:2-5).
Ña̱ ndákanixi̱ní sava na̱ yiví xa̱ʼa̱ na̱ ángel
Ña̱ ndákanixi̱ní savana: Na̱ va̱ʼa kúú ndiʼi na̱ ángel.
Ña̱ nda̱a̱: Biblia káʼa̱nña xa̱ʼa̱ “na̱ ta̱chí ndi̱va̱ʼa” ta saátu káʼa̱nña xa̱ʼa̱ “na̱ ángel na̱ ni̱ki̱ʼvi ku̱a̱chi” (Efesios 6:12; 2 Pedro 2:4). Na̱yóʼo kúú na̱ ángel na̱ nda̱kutáʼan xíʼin ta̱ Ndi̱va̱ʼa ña̱ koona contra Ndióxi̱.
Ña̱ ndákanixi̱ní savana: Va̱ása kivi kuvi na̱ ángel.
Ña̱ nda̱a̱: Ta̱ Ndi̱va̱ʼa ta saátu na̱ ta̱chí ndi̱va̱ʼa, ndiʼi-xa̱ʼa̱vana (Judas 6).
Ña̱ ndákanixi̱ní savana: Tá xíʼi̱ iin na̱ yiví ndúuna ángel.
Ña̱ nda̱a̱: Tá xíʼi̱ na̱ yiví, va̱ása ndúuna na̱ ángel. Chi síínva íyo na̱ ángel nu̱ú na̱ yiví (Colosenses 1:16). Na̱ ndátaku ña̱ koona chí ndiví, va̱ása kuvikana (1 Corintios 15:53, 54). Ta na̱yóʼo ndakiʼinna iin chiñu ña̱ ndáyáʼvika nu̱ú na̱ ángel (1 Corintios 6:3).
Ña̱ ndákanixi̱ní savana: Ndióxi̱ i̱xava̱ʼara na̱ ángel ña̱ va̱ʼa kachíñuna nu̱ú na̱ yiví.
Ña̱ nda̱a̱: Na̱ ángel káchíñuna nu̱ú Ndióxi̱ su̱ví nu̱ú miíyó na̱ yiví (Salmo 103:20, 21). Ta̱ Jesús xi̱kaʼa̱nra xíʼin Ndióxi̱ ña̱ chindeétáʼanra xíʼinra ta su̱ví xíʼin na̱ ángel níka̱ʼa̱nra ña̱ chindeétáʼanna xíʼinra (Mateo 26:53).
Ña̱ ndákanixi̱ní savana: Kivi keʼéyó oración nu̱ú na̱ ángel ña̱ va̱ʼa chindeétáʼanna xíʼinyó.
Ña̱ nda̱a̱: Tá kéʼéyó oración nu̱ú Ndióxi̱ saá ndásakáʼnuyóra, ta iinlá Ndióxi̱ kúú ta̱ kivi keʼéyó oración nu̱ú (Apocalipsis 19:10). Tá kéʼéyó oración nu̱ú Ndióxi̱ xíniñúʼu kuniñúʼuyó ki̱vi̱ ta̱ Jesús (Juan 14:6).
a Íyo sava Biblia ña̱ xíniñúʼu tu̱ʼun Lucifer nu̱ú Isaías 14:12, ta savana káʼa̱nna ña̱ ki̱vi̱ yóʼo kúú ki̱vi̱ ta̱ ángel ta̱ ndu̱u ta̱ Ndi̱va̱ʼa. Soo tu̱ʼun hebreo ña̱ xíniñúʼuna kúni̱ kachiña “ta̱ ndáye̱ʼe̱”. Ta iníísaá capítulo yóʼo náʼa̱ña nu̱úyó ña̱ su̱ví xa̱ʼa̱ ta̱ Ndi̱va̱ʼa káʼa̱nña chi xa̱ʼa̱ na̱ chíñu ñuu Babilonia káʼa̱nña na̱ sa̱kúkaʼan Ndióxi̱ nu̱ú xa̱ʼa̱ ña̱ ni̱nuní xi̱kunina (Isaías 14:4, 13-20). Tu̱ʼun “ndáye̱ʼe̱” xi̱niñúʼunaña ña̱ va̱ʼa ka̱ʼa̱nna xa̱ʼa̱ ña̱ kukaʼan nu̱ú na̱ chíñu ñuu Babilonia.
b Savana ndákanixi̱nína ña̱ ni̱xi̱yo iin ángel ta̱ xi̱ndaa ta̱ Pedro saáchi nda̱tavárara tá xi̱ndikaa̱ra veʼeka̱a (Hechos 12:6-16) Tá ni̱xa̱ʼa̱n ta̱ Pedro xi̱tora na̱ discípulo, na̱kán ni̱ka̱ʼa̱nna ña̱ ki̱xi iin ángel nu̱úna. Soo sana ni̱ka̱ʼa̱nna ña̱yóʼo saáchi nda̱kanixi̱nína ña̱ iin ángel kúú ta̱ ni̱xa̱a̱ na̱túʼun xa̱ʼa̱ ta̱ Pedro.