¿Ndáa míí íyo ta̱ Ndi̱va̱ʼa?

Ña̱ káʼa̱n Biblia xa̱ʼa̱ ña̱yóʼo

Ta̱ Ndi̱va̱ʼa kúúra iin espíritu, xa̱ʼa̱ ña̱kán kǒo kívi kuniyóra. Ta̱ Ndi̱va̱ʼa va̱ása ndíkaa̱ra infierno á ndayá ña̱ sándoʼora na̱ yiví na̱ kéʼé ña̱ va̱ása va̱ʼa, nda̱a̱ táki̱ʼva xítoyó nu̱ú na̱ʼná ña̱ va̱xi chí nu̱ú kíxáʼa artículo yóʼo.

“Ki̱xáʼa kánitáʼanna chí ndiví”

Ni̱xi̱yo iin tiempo ña̱ va̱ʼa xi̱xika ta̱ Ndi̱va̱ʼa chí ndiví. Ta saátu va̱ʼa xi̱xaʼa̱nra nu̱ú Ndióxi̱ tá xi̱ndakutáʼan ndiʼi na̱ ángel nu̱úra (Job 1:6). Soo Biblia ni̱ka̱ʼa̱nña ña̱ “kixáʼa kanitáʼanna chí ndiví”, ta tavána ta̱ Ndi̱va̱ʼa chí ndiví ta sakánanara nu̱ú ñuʼú yóʼo (Apocalipsis 12:7-9). Xa̱a̱ ni̱xi̱yova ku̱a̱chi yóʼo chí ndiví saáchi xa̱a̱ xítoyó xínu ña̱ káʼa̱n Biblia nu̱ú ñuʼú yóʼo tiempo vitin. Ña̱kán, vitin chí nu̱ú ñuʼú yóʼova íyo ta̱ Ndi̱va̱ʼa.

¿Á kúni̱ kachi ña̱yóʼo ña̱ iin kuití lugar íyora nu̱ú ñuʼú yóʼo? Tá káʼa̱n Biblia xa̱ʼa̱ ñuu Pérgamo ña̱ ni̱xi̱yo tiempo xi̱naʼá, káʼa̱nña ña̱ kán kúú “nu̱ú íyo trono ta̱ Ndi̱va̱ʼa” ta saátu káʼa̱nña ña̱ kán kúú “nu̱ú íyo ta̱ Ndi̱va̱ʼa” (Apocalipsis 2:13). Sana ña̱yóʼo káʼa̱nña xa̱ʼa̱ ndiʼi ña̱ʼa ña̱ va̱ása va̱ʼa ña̱ xi̱keʼé na̱ yiví na̱ xi̱ndoo ñuu kán, ta kǒo kúni̱ kachiña ña̱ kán ni̱xi̱yo ta̱ Ndi̱va̱ʼa. Ni tiempo vitin su̱ví iin ñuu ña̱ íyo nu̱ú ñuʼú yóʼo kúú nu̱ú íyo ta̱ Ndi̱va̱ʼa. Tu̱ʼun Ndióxi̱ káʼa̱nña ña̱ xáʼndachíñura nu̱ú iníísaá ñuʼú yóʼo, ña̱kán xíʼin ña̱yóʼo kúnda̱a̱-iniyó ña̱ va̱ása íyokara chí ndiví (Lucas 4:5, 6).