¿Á kivi chindeétáʼan religión, Ndióxi̱ xíʼin Biblia xíʼi̱n ña̱ kusi̱í-inii̱?

Ña̱ káʼa̱n Biblia xa̱ʼa̱ ña̱yóʼo

Kiviva chindeétáʼanña xíʼún. Biblia xa̱ʼa̱ ku̱a̱ʼání ku̱i̱ya̱ ni̱ka̱ʼyi̱ña ta ku̱a̱ʼání ña̱ ndíchi kúúmiíña ta saátu ndákuiinña sava pregunta ña̱ ndáyáʼviní ta chíndeétáʼanña xíʼinyó ña̱ kusi̱í-iniyó. Ná ka̱ʼa̱nyó xa̱ʼa̱ sava pregunta yóʼo.

1. ¿Á íyo iin na̱ i̱xava̱ʼa ndiʼi ña̱ʼa? Biblia káʼa̱nña Ndióxi̱ i̱xava̱ʼa ndiʼi ña̱ʼa (Apocalipsis 4:11). Xa̱ʼa̱ ña̱ i̱xava̱ʼara miíyó kúnda̱a̱-inira ndáaña xíniñúʼuyó ña̱ va̱ʼa kusi̱í-iniyó.

2. ¿Á ndíʼi̱-ini Ndióxi̱ xa̱ʼíi̱? Biblia káʼa̱nña ña̱yóʼo xíʼinyó xa̱ʼa̱ Ndióxi̱ “va̱ása xíká íyora nu̱ú iin iinyó” (Hechos 17:27). Ndíʼi̱-inira xa̱ʼa̱yó ta kúni̱ra si̱í ná kooyó (Isaías 48:17, 18; 1 Pedro 5:7).

3. Tá ná sakúaʼi̱ xa̱ʼa̱ Ndióxi̱, ¿ndáa ki̱ʼva chindeétáʼan ña̱yóʼo xíʼi̱n ña̱ kusi̱í-inii̱? Ndióxi̱ i̱xava̱ʼara miíyó ña̱ kuni̱yó kunda̱a̱-iniyó xa̱ʼa̱ra tasaá kunda̱a̱-iniyó ndáa xa̱ʼa̱ kúú ña̱ tákuyó (Mateo 5:3). Ña̱yóʼo chíndeétáʼanña xíʼinyó ña̱ kuni̱yó vií kutáʼanyó xíʼinra. Ndióxi̱ kúni̱ra ná kunda̱a̱-iniyó xa̱ʼa̱ra saáchi Biblia káʼa̱nña ña̱yóʼo: “Kuyatinndó nu̱ú Ndióxi̱ ta ta̱kán kuyatinra nu̱úndó” (Santiago 4:8).

Ku̱a̱ʼání na̱ yiví káʼa̱nna xa̱ʼa̱ ña̱ ki̱xáʼana kítáʼanna xíʼin Ndióxi̱ si̱íníka íyona. Soo ña̱ kunda̱a̱-iniyó xa̱ʼa̱ Ndióxi̱ va̱ása kúni̱ kachiña ña̱ kutaʼa ndiʼi tu̱ndóʼo nu̱úyó, soo consejo ña̱ káʼa̱nra ña̱ va̱xi nu̱ú Biblia chíndeétáʼanña xíʼinyó ña̱ va̱ʼa keʼéyó ña̱yóʼo:

• Si̱í kooyó xíʼin na̱ veʼeyó.

• Vií kutáʼanyó xíʼin ndiʼina.

• Ña̱ va̱ʼa kundeé-iniyó tá kúúmiíyó kue̱ʼe̱ tá kúú ña̱ depresión ta saátu ña̱ kǒo ndi̱ʼi̱-iniyó tá kǒo xu̱ʼún ndaʼa̱yó.

Ku̱a̱ʼání religión xíniñúʼuna Biblia soo kǒo ndíku̱nna ña̱ káʼa̱nña. Soo religión ña̱ nda̱a̱ ndíku̱nna ña̱ káʼa̱n Biblia ta chíndeétáʼanña xíʼinyó ña̱ kunda̱a̱-iniyó xa̱ʼa̱ Ndióxi̱.