¿Á ndákuiin Ndióxi̱ ña̱ káʼa̱nyó xíʼinra?
Ña̱ káʼa̱n Biblia xa̱ʼa̱ ña̱yóʼo
Ndákuiinvaraña. Íyo sava texto xíʼin ña̱ ndo̱ʼo savana ña̱ náʼa̱ nu̱úyó ña̱ ndákuiinvara ña̱ káʼa̱nyó xíʼinra. Ña̱yóʼo káʼa̱n Biblia xa̱ʼa̱ Ndióxi̱: “Táxira ña̱ kúni̱ na̱ íxato̱ʼó miíra; xíniso̱ʼora tá kána kóʼónara ña̱ chindeétáʼanra xíʼinna ta sáka̱kurana” (Salmo 145:19). Soo ña̱ va̱ʼa ndakuiin Ndióxi̱ oraciónyó xíniñúʼu keʼéyó sava ña̱ʼa.
Ña̱ káʼa̱n Ndióxi̱ xíʼinyó keʼéyó
Xíʼin miíra xíniñúʼu ka̱ʼa̱nyó, su̱ví xíʼin ta̱ Jesús, ni xíʼin ñá María, ni xíʼin na̱ ángel á ni xíʼin santo ña̱ ñúʼu veʼe-ñu̱ʼu. Biblia káʼa̱nña xa̱ʼa̱ Jehová, “yóʼó xíniso̱ʼún ña̱ káʼa̱nna xíʼún” (Salmo 65:2).
Ná kǒo ndukúyó ña̱ʼa ña̱ kǒo kútóora á ña̱ yáʼandosó ña̱ káʼa̱nra xíʼinyó nu̱ú tu̱ʼunra (1 Juan 5:14).
Ná kuniñúʼuyó ki̱vi̱ ta̱ Jesús tá xa̱a̱ káʼa̱nyó xíʼin Ndióxi̱, chi saá náʼa̱yó ña̱ íxato̱ʼóyó ta̱ Jesús. Ta̱ Jesús ni̱ka̱ʼa̱nra ña̱yóʼo: “Nda̱a̱ ni iinna kǒo kivi xa̱a̱ nu̱ú yivái̱ tá su̱ví xa̱ʼa̱ yi̱ʼi̱ kúúña” (Juan 14:6).
Ná kándíxayó Ndióxi̱. Tá túviyó ña̱ xíniñúʼu kandíxakayóra ná ka̱ʼa̱nyó xíʼinra ña̱ ná chindeétáʼanra xíʼinyó ña̱ kandíxakayóra (Mateo 21:22; Lucas 17:5).
Vitá ná koo iniyó ta ndinuʼu-iniyó ná ka̱ʼa̱nyó xíʼinra. Biblia káʼa̱nña ña̱yóʼo: “Ni súkunní íyo Jehová, ndáara na̱ vitá-ini” (Salmo 138:6).
Ná ka̱ʼa̱n ni̱ʼiyó xíʼinra. Ta̱ Jesús ni̱ka̱ʼa̱nra ña̱yóʼo: “Ndakundeéndó ndukúndó ña̱ va̱ʼa nu̱ú Ndióxi̱ ta taxiraña ndaʼa̱ndó” (Lucas 11:9).
Ña̱ kǒo kíʼin Ndióxi̱ kuenta xíʼin
Ñuu nu̱ú ke̱eyó xíʼin ki̱ʼva ña̱ náʼa̱yó. “Va̱ása ndáka̱xin Ndióxi̱ na̱ yiví, nda̱a̱ ndáaka ñuuna ndákiʼinvarana tá ndixa íxato̱ʼónara ta kéʼéna ña̱ va̱ʼa nu̱úra” (Hechos 10:34, 35).
Tá xa̱a̱ káʼa̱nyó xíʼin Ndióxi̱ kivi kooyó, kivi kuxítíyó á kivi kunditayó (1 Crónicas 17:16; Nehemías 8:6; Daniel 6:10; Marcos 11:25).
Kivi ka̱ʼa̱n kóʼóyó á ka̱ʼa̱n ya̱áyó xíʼinra. Ndákuiinra oración ña̱ kéʼéyó ni sava yichi̱ kéʼé ya̱áyó ña̱yóʼo (Nehemías 2:1-6).
Á iin tu̱ndóʼo loʼo kúúña á iin ña̱ káʼnu kúúña. Biblia káʼa̱nña ña̱yóʼo xíʼinyó: “Ta sandákoondó ndiʼi ña̱ sándi̱ʼi̱-inindó ndaʼa̱ Ndióxi̱, chi ta̱yóʼo ndíʼi̱ní-inira xa̱ʼa̱ndó” (1 Pedro 5:7).