¿Ndáa ki̱ʼva náʼa̱ na̱ testigo Jehová ña̱ ndáyáʼviní ña̱ tákuna nu̱úna?

Miíyó na̱ ñuu Jehová chíkaa̱níyó ndee̱ ña̱ na̱ʼa̱yó ña̱ ndáyáʼviní ña̱ tákuyó nu̱úyó chi saá kúni̱ Jehová. Xa̱ʼa̱ ña̱kán va̱ása xáʼa̱nyó nu̱ú ku̱a̱chi, va̱ása sánuu ná hermana se̱ʼená ta saátu chíkaa̱níyó ndee̱ ña̱ kǒo keʼéyó nda̱a̱ ni iin ña̱ʼa ña̱ kivi kaʼní miíyó. Saátu nu̱ú Jehová nda̱a̱ táki̱ʼva ndáyáʼvi ña̱ tákuyó saátu ndáyáʼvi ni̱i̱yó. Nu̱ú Génesis 9:4 xa̱ʼndara chiñu yóʼo nu̱ú ta̱ Noé: “Va̱ása xíniñúʼu kuxundó ku̱ñurí ña̱ kúúmií ni̱i̱, saáchi ni̱i̱ kúú ña̱ táxi ña̱ tákurí”. Ta tá siglo nu̱ú, espíritu santo kúú ña̱ xi̱niʼi yichi̱ nu̱ú na̱ apóstol tá xa̱ʼndana chiñu nu̱ú na̱ cristiano ña̱ ná kǒo kuniñúʼuna ni̱i̱:

Xa̱ʼa̱ ña̱yóʼo va̱ása xíxiyó ni̱i̱ ni ku̱ñu kití tí kǒo níxi̱ta̱ ndiʼi ni̱i̱. ¿Soo á xa̱ʼa̱ ña̱ kuxu kuitíyó káʼa̱n ña̱yóʼo xa̱ʼa̱? Va̱ásaví. Saáchi xíʼin ña̱yóʼo náʼa̱yó ña̱ chíndayáʼviyó ña̱ tákuyó ta íxato̱ʼóyó ña̱ káʼa̱n Jehová. Soo ná ndakanixi̱níyó ndáaña kúni̱ Jehová sanáʼa̱ra miíyó xíʼin ña̱yóʼo, kúni̱ra ná chindayáʼviyó ña̱ tákuyó. Ña̱kán kǒo xíniñúʼuyó ni̱i̱, saátu kǒo xáʼníyó nda̱a̱ ni iin na̱ yiví ta saátu kǒo kéʼéyó nda̱a̱ ni iin ña̱ʼa ña̱ i̱yo ña̱ kivi kaʼní inkana á miíyó (Gén. 9:4-6; Sal. 36:9). Ña̱kán miíyó na̱ testigo Jehová chíkaa̱níyó ndee̱ ña̱ ndakanixi̱níyó nda̱a̱ táki̱ʼva ndákanixi̱ní Jehová ta chíndayáʼviníyó ña̱ tákuyó ta saátu ni̱i̱.

Miíyó na̱ testigo Jehová ndíku̱nyó ña̱ káʼa̱n Hechos 15, xa̱ʼa̱ ña̱kán kǒo xíniñúʼuyó ni̱i̱ ta ni kǒo xíxiyó ni̱i̱, saátu kǒo táxiyó ni̱i̱yó ña̱ nde̱eña inkana ta ni kǒo ndátaánnaña miíyó. Tá kéʼéyó ña̱yóʼo chíndeétáʼanña xíʼinyó ña̱ vií kutáʼanyó xíʼin Jehová ta saátu ña̱ kǒo kiʼin kue̱ʼe̱ miíyó. Ta ña̱yóʼo kúútu ña̱ xi̱ndakanixi̱níyó xa̱ʼa̱ ku̱mí saá táʼví ña̱ kúúmií ni̱i̱ ña̱ naní: glóbulos rojos, glóbulos blancos, plasma xíʼin plaquetas. Sava na̱ doctor xa̱a̱ kíʼinna kuenta ña̱ kiviva kutátan na̱ yiví tá kǒo ni̱i̱ ndée miína ta saátu kíʼinna kuenta ña̱ kǒo kíʼin inkaka kue̱ʼe̱ na̱ yiví yóʼo.

Soo xa̱ʼa̱ ña̱ ku̱a̱ʼa̱n nása̱maní ki̱ʼva ña̱ íxatátan na̱ doctor, ku̱a̱ʼání na̱ hermano ndáka̱tu̱ʼunna ndáa ki̱ʼva kundiku̱nna ña̱ káʼa̱n Biblia xa̱ʼa̱ ni̱i̱ tá xíniñúʼu kutátanna. Ña̱kán nu̱ú Informe na̱ Cuerpo Gobernante ña̱ ka̱na ku̱i̱ya̱ 2026 (informe 2) ni̱ka̱ʼa̱nna ña̱yóʼo: “Miíyó na̱ ndásakáʼnu Ndióxi̱ tiempo vitin, va̱ása ndíku̱nkayó ley ta̱ Moisés soo ndíku̱nvayó ña̱ káʼa̱n Biblia nu̱ú tutu Hechos nu̱ú káʼa̱nña ña̱ va̱ása kuniñúʼuyó ni̱i̱. Soo Biblia va̱ása káʼa̱nña ndáa ki̱ʼva kuniñúʼuyó ni̱i̱ miíyó tá kútátanyó á tá ndátana miíyó. Ña̱kán nda̱a̱ táki̱ʼva ndáka̱xinyó ki̱ʼva ña̱ kundaayó miíyó, saátu iin tá iin miíyó xíniñúʼu ndaka̱xin ndáa ki̱ʼva kuniñúʼuyó ni̱i̱ miíyó tá kútátanyó á tá ndátana miíyó”. Ndiʼi ña̱ ka̱na nu̱ú informe yóʼo chíndeétáʼanña xíʼinyó ña̱ kundiku̱nyó ña̱ káʼa̱n Gálatas 6:5: “Iin tá iinna ndakuiinna xa̱ʼa̱ ña̱ kéʼéna”.

Ña̱kán na̱ Cuerpo Gobernante ni̱ka̱ʼa̱nnína xíʼin Jehová ta na̱ndukúkana xa̱ʼa̱ ña̱yóʼo ta ni̱xa̱a̱na ku̱ndaa̱-inina ña̱ iin tá iinyó xíniñúʼu ndaka̱xin á ndakiʼinyó táʼví ña̱ kúúmií ni̱i̱ ña̱ naní glóbulos rojos, glóbulos blancos, plasma xíʼin plaquetas ña̱ kúúmií ni̱i̱ inka na̱ yiví.​ Ña̱kán iin tá iin miíyó na̱ ndásakáʼnu Ndióxi̱ xíniñúʼu ndaka̱xin ndáa ki̱ʼva kuniñúʼuyó ku̱mí táʼví ña̱ ni̱i̱ yóʼo tá xa̱a̱ kútátanyó á tá xíniñúʼu ndatána miíyó. Ta saátu iin tá iin miíyó xíniñúʼu ndaka̱xin á taxiyó iin táʼví ña̱ kúúmií ni̱i̱yó ña̱ kuniñúʼu inkana, soo siʼna xíniñúʼu kunda̱a̱ va̱ʼa iniyó á ndixa kuniñúʼuna loʼo kuití ña̱yóʼo.

¿Á kúni̱ kachi ña̱yóʼo ña̱ va̱ása ndáyáʼvikaví ña̱ káʼa̱n Biblia nu̱ú na̱ Cuerpo Gobernante saáchi iin tá iinyó ndaka̱xin ndáa ki̱ʼva kutátanyó? Va̱ásaví. Nu̱ú na̱ Cuerpo Gobernante ndáyáʼviníva ña̱ káʼa̱n Biblia xa̱ʼa̱ ni̱i̱. Soo xa̱ʼa̱ ña̱ kǒo káʼa̱n káxi Biblia xa̱ʼa̱ ku̱mí táʼví ña̱ kúúmií ni̱i̱yó, na̱ Cuerpo Gobernante ndíku̱nna ña̱ káʼa̱n 1 Corintios 4:6 ña̱ xíniñúʼu keʼé kuitína “ña̱ ni̱ka̱ʼyi̱ nu̱ú tu̱ʼun Ndióxi̱”. Ta saátu ndíku̱nna ña̱ káʼa̱n 2 Corintios 1:24: “Ña̱ káʼi̱n xíʼinndó yóʼo va̱ása kúni̱ kachiña ña̱ ndi̱ʼi̱ kúú na̱ ndísochíñu xíʼin ña̱ kándíxandó Ndióxi̱, saáchi miívandó kúú na̱ kándíxa Ndióxi̱ ña̱kán kúú ña̱ ndakúní íyo inindó, chi na̱ chíndeétáʼan kuití xíʼinvandó kúúndi̱ ña̱ va̱ʼa si̱í koondó”.

¿Ndáaña xíniñúʼu keʼéyó ña̱ va̱ʼa vií koo ña̱ ndaka̱xinyó keʼéyó? Ña̱ va̱ʼa ndaka̱xinyó á kuniñúʼuyó táʼví ni̱i̱ ña̱ xa̱a̱ ni̱ka̱ʼa̱nyó xa̱ʼa̱ yóʼo á va̱ása kuniñúʼuyóña, iin tá iinyó siʼna xíniñúʼu ka̱ʼa̱nyó xíʼin Jehová ta viíní ndakanixi̱níyó xa̱ʼa̱ ña̱yóʼo tá kúma̱níka ndaka̱xinyó ndáaña keʼéyó. Saáchi tá ná ndakanixi̱níyó ña̱ su̱ví ña̱ ndeéví kúú ña̱yóʼo, kivi xo̱ʼvi̱yó xíʼin ña̱yóʼo ta kuxíkáyó nu̱ú Jehová.

¿Ndáaña xíniñúʼu kiʼinyó kuenta xíʼin tá kúma̱níka ndaka̱xinyó á ndakiʼinyó táʼví ña̱ ndáyáʼvika ña̱ kúúmií ni̱i̱ á táʼví válí ña̱yóʼo? Sana su̱ví inkáchi koo ña̱ ndaka̱xin ndiʼiyó keʼéyó. Savana sana va̱ása kandíxana ndakiʼinna ku̱mí táʼví ña̱ kúúmií ni̱i̱ ni táʼví válíña saáchi túvina ña̱ va̱ása va̱ʼa keʼéna ña̱yóʼo. Soo sava na̱ hermano sana kandíxavana ndakiʼinna ña̱yóʼo saáchi su̱ví mií ni̱i̱ví kúú ña̱ ndataánnana. Chi nda̱a̱ táʼví ña̱ ndáyáʼvika ña̱ kúúmií ni̱i̱ tá kúú glóbulos blancos xíʼin plaquetas, loʼoka ni̱i̱ kúúmiíña nu̱úka sava táʼví válí ña̱ kána ti̱xin ni̱i̱ ta sana savana xa̱a̱ nda̱kaxinvana ña̱ kuniñúʼuna sava táʼví válí yóʼo. Ni nda̱a̱ ndáaka ña̱ ndáka̱xinyó keʼéyó, Romanos 14:12 káchiña: “Ndióxi̱ ndatiinra ku̱a̱chi xíʼin iin tá iinyó xa̱ʼa̱ ña̱ ni̱ka̱ʼa̱nyó xíʼin ña̱ ke̱ʼéyó”.

Ña̱ va̱ʼa vií koo ña̱ ndaka̱xin iin tá iinyó keʼéyó, na̱ Cuerpo Gobernante ni̱ka̱ʼa̱nna ña̱ ná kana iin tutu ña̱ chindeétáʼan xíʼinyó ña̱ naní “Productos que se obtienen de la sangre completa”, ta va̱xiña nu̱ú jw.org. Tutu yóʼo ndákanikaña xa̱ʼa̱ sava táʼví ña̱ kúúmií ni̱i̱.

Vitin ña̱ xa̱a̱ ni̱ka̱ʼa̱nyó xa̱ʼa̱ ndiʼi ña̱yóʼo, iin tá iin miíyó xíniñúʼu ndaka̱xin á ndakiʼinyó iin táʼví ña̱ kúúmií ni̱i̱ inka na̱ yiví ña̱ va̱ʼa kutátanyó á va̱ása ndakiʼinvíyóña. Va̱ása xíniñúʼu ka̱ʼa̱n na̱ congregación xíʼinyó ndáaña ndaka̱xinyó keʼéyó ta saátu xíniñúʼu ixato̱ʼóyó ña̱ ndáka̱xin inka na̱ hermanoyó keʼéna.a

¿Ta ndáaña kivi chindeétáʼan xíʼin na̱ hermano na̱ káchíñu nu̱ú xíniñúʼuna ni̱i̱? Ti̱xin táʼví ña̱ naní “Ña̱ ndáka̱tu̱ʼun na̱ káʼvi tutu yóʼo” ña̱ ka̱na nu̱ú La Atalaya 15 tí abril ña̱ ku̱i̱ya̱ 1999 káʼa̱nña xa̱ʼa̱ ña̱ kivi chindeétáʼan xíʼinna ña̱ vií koo ña̱ ndaka̱xinna keʼéna tasaá kǒo ña̱ sandíʼi̱-inina.

¿Ndáaña kúni̱yó kindo̱o káxi nu̱úyó? Miíyó na̱ testigo Jehová va̱ása táxiyó ña̱ nde̱e ni̱i̱ miíyó ta ni va̱ása táxiyó ni̱i̱yó ña̱ nde̱eña inka na̱ yiví. Saátu va̱ása xíxiyó ni̱i̱ ni ku̱ñu ña̱ kǒo níxi̱ta̱ ndiʼi ni̱i̱. Soo iin tá iinyó xíniñúʼu ndaka̱xin á ndakiʼinyó iin táʼví ña̱ kúúmií ni̱i̱ inka na̱ yiví á va̱ása ndakiʼinyóña. Ta saátu iin tá iinyó xíniñúʼu ndaka̱xin á taxiyó ña̱ tavána iin táʼví ña̱ kúúmií ni̱i̱yó ña̱ va̱ʼa kuniñúʼu inka na̱ yivíña, soo siʼna xíniñúʼu kunda̱a̱ va̱ʼa iniyó á ndixa kuniñúʼuna loʼo kuití ña̱yóʼo.

Va̱ása kaka-iniyó ña̱ nu̱ú na̱ Cuerpo Gobernante ndáyáʼviní ña̱ tákuyó ta saátu ni̱i̱yó. Soo ná ndakaʼányó chi iin tá iin miíyó na̱ ndásakáʼnu Jehová kúú na̱ ndáka̱xin ndáaña keʼéyó ta ndakuiinyó xa̱ʼa̱ ña̱yóʼo nu̱ú Jehová. Xa̱ʼa̱ ña̱kán na̱ Cuerpo Gobernante káʼa̱nna xíʼin ndiʼi miíyó ña̱ tá kúma̱níka ndaka̱xinyó á kuniñúʼuyó iin táʼví ni̱i̱ inkana ta saátu á taxiyó ña̱ kuniñúʼuna iin táʼví ni̱i̱ miíyó, ná ka̱ʼa̱nyó xíʼin Ndióxi̱ xa̱ʼa̱ ña̱yóʼo ta ná nandukú va̱ʼayó xa̱ʼa̱ña. Tá saá ná keʼéyó va̱ása kundi̱ʼi-iniyó xa̱ʼa̱ ña̱ ndáka̱xinyó keʼéyó ta saátu na̱ʼa̱yó ña̱ íxato̱ʼóníyó Jehová chi miíra kúú ta̱ táxi ña̱ tákuyó (1 Tim. 1:5).