¿Á xa̱a̱ ni̱ka̱ʼa̱n Biblia ndáa ki̱ʼva koo na̱ yiví tiempo vitin?

Ña̱ káʼa̱n Biblia xa̱ʼa̱ ña̱yóʼo

Biblia xa̱a̱ ni̱ka̱ʼa̱nña ña̱ tiempo vitin na̱ yiví kininíka keʼéna (2 Timoteo 3:1-5).a Soo saátu káʼa̱n Biblia ña̱ su̱ví ndiʼi na̱ yiví keʼé saá, saáchi mií Ndióxi̱ chindeétáʼanra xíʼin ku̱a̱ʼání na̱ yiví ña̱ ndakanixi̱nína nda̱a̱ táki̱ʼva ndákanixi̱ní miíra ta keʼéna ña̱ kútóora (Isaías 2:2, 3).

Nu̱ú artículo yóʼo ka̱ʼa̱nyó xa̱ʼa̱ sava pregunta yóʼo:

¿Ndáaña ni̱ka̱ʼa̱n Biblia xa̱ʼa̱ ki̱ʼva ña̱ ndákanixi̱ní na̱ yiví xíʼin ña̱ keʼéna tiempo vitin?

Biblia káʼa̱nña ndáa ki̱ʼva xa̱a̱ na̱ yiví keʼéna ta xa̱ʼa̱ ña̱yóʼo na̱ʼa̱na ña̱ ndíʼi̱ka-inina xa̱ʼa̱ mií kuitína. Na̱ yiví ku̱ʼvi̱ka-inina kunina miína ta va̱ása ku̱ʼvi̱-inina kunina Ndióxi̱ (2 Timoteo 3:2-4).

Xa̱a̱ xínuva profecía yóʼo. Tiempo vitin na̱ yiví nina xa̱ʼa̱ miína ndíʼi̱-inina xa̱ʼa̱ tá kúú, ña̱ kuumiína chiñu ña̱ sakúsi̱í-inina. Nda̱a̱ táki̱ʼva ni̱ka̱ʼa̱n profecía yóʼo, ku̱a̱ʼání na̱ yiví ndíʼi̱-inina xa̱ʼa̱ mií kuitína. Va̱ása kúʼvi̱-inina xínina ña̱ va̱ʼa ta kǒo chíndayáʼvina ña̱ va̱ʼa ña̱ kúúmií inkana. Va̱ása táxina tíxa̱ʼvi ndaʼa̱ Ndióxi̱ xa̱ʼa̱ ña̱ va̱ʼa kúúmiína ta ni ña̱ kéʼé inkana xa̱ʼa̱na (2 Timoteo 3:2, 3).

Biblia káʼa̱nña na̱ yiví kundi̱ʼi̱ kuití inina xa̱ʼa̱ mií kuitína ta na̱ʼa̱na ña̱yóʼo:

Kuni̱na kuumiína ku̱a̱ʼáníka ña̱ʼa. Ku̱a̱ʼání na̱ yiví kútóonína kuumiína ku̱a̱ʼání xu̱ʼún. Ndákanixi̱nína ña̱ va̱ʼa si̱í koona xíniñúʼu kuumiína ku̱a̱ʼání ña̱ʼa á ku̱a̱ʼání xu̱ʼún (2 Timoteo 3:2).
Ni̱nu kunina. Ku̱a̱ʼání na̱ yiví kúta̱a-inina ta ni̱nuní kúnina (2 Timoteo 3:2, 4). Kúta̱aní-inina xa̱ʼa̱ ña̱ xíni̱na keʼéna ta saátu xa̱ʼa̱ xu̱ʼún ña̱ kúúmiína.
Káʼa̱nna ña̱ vatá. Ku̱a̱ʼání na̱ yiví káʼa̱nna tu̱ʼun síkí xa̱ʼa̱ inka ta saátu káʼa̱nna ña̱ vatá (2 Timoteo 3:2, 3). Káʼa̱nna ña̱ vatá xa̱ʼa̱ inkana á xa̱ʼa̱ Ndióxi̱.
Va̱ása kuniso̱ʼona. Ku̱a̱ʼánína va̱ása nda̱kú koo inina, kǒo kindo̱o-inina xíʼin nda̱a̱ ni iin ña̱ʼa, xi̱kótáʼanna ta so̱ʼoní koona (2 Timoteo 3:2-4). Ta ña̱yóʼo náʼa̱naña tá kǒo kíndo̱o-inina xíʼin ña̱ káʼa̱n inkana ta ni kǒo sáxi̱nuna ña̱ xa̱a̱ ki̱ndoona keʼéna.
Kue̱ʼe̱ní koona. Ku̱a̱ʼání na̱ yiví kamaní sáa̱na ta xa̱ʼa̱ ña̱kán ndi̱va̱ʼaní kéʼéna xíʼin inkana (2 Timoteo 3:3).
Kǒo kandíxana. Ta̱ Jesús ni̱ka̱ʼa̱nra tiempo ña̱ ndóoyó vitin “ku̱a̱ʼání ña̱ va̱ása va̱ʼa” kuu, saáchi ku̱a̱ʼání na̱ yiví ya̱ʼandosóna ña̱ káʼa̱n ley (Mateo 24:12; nota). Ta saátu ni̱ka̱ʼa̱nra ña̱ koo ku̱a̱ʼání tu̱ndóʼo (Lucas 21:9).
Kǒo kuʼvi̱-inina kunina na̱ veʼena. Ku̱a̱ʼánína kǒo kándíxana ña̱ káʼa̱n na̱ yivána ta kǒo kúʼvi̱-inina xínina na̱ veʼena, ta ku̱a̱ʼání na̱ familia ndóʼona ña̱yóʼo chi kǒo ndíʼi̱-ini na̱ veʼena xa̱ʼa̱na ta íxandi̱va̱ʼana xíʼinna (2 Timoteo 3:2, 3).
Ka̱ʼa̱nna ña̱ kándíxana Ndióxi̱ soo ña̱ vatáva kúú ña̱yóʼo. Tiempo vitin ku̱a̱ʼání na̱ yiví káʼa̱nna ña̱ ndásakáʼnuna Ndióxi̱ (2 Timoteo 3:5). Soo nu̱úka ña̱ keʼéna ña̱ kúni̱ Ndióxi̱ kéʼéna ña̱ káʼa̱n na̱ níʼi yichi̱ nu̱úna ti̱xin veʼe-ñuʼú nu̱ú xáʼa̱nna, chi na̱yóʼo káʼa̱nna xíʼinna ña̱ kivi keʼéna ña̱ kúni̱ miína (2 Timoteo 4:3, 4).

Xa̱ʼa̱ ña̱ ndíʼi̱-ini na̱ yiví xa̱ʼa̱ mií kuitína, ¿ndáaña kundoʼo inkana xa̱ʼa̱ ña̱yóʼo?

Xa̱ʼa̱ ña̱ ndíʼi̱ní-ini na̱ yiví xa̱ʼa̱ mií kuitína, inkana xóʼvi̱nína xa̱ʼa̱ ña̱ kéʼéna xíʼinna ta ndákava-inina (Eclesiastés 7:7). Tá kúú, na̱ kúni̱ kuumií ku̱a̱ʼání xu̱ʼún sándaʼvina inkana ña̱ va̱ʼa tavána xu̱ʼún ndaʼa̱na. Na̱ kǒo kúʼvi̱-ini xíni na̱ veʼena íxandi̱va̱ʼana xíʼinna ta xa̱ʼa̱ ña̱yóʼo ndákava-inina ta nda̱a̱ kúni̱na kaʼnína miína. Ta na̱ sándaʼvi na̱ veʼena sáxo̱ʼvi̱nína-ini na̱yóʼo.

¿Nda̱chun kininíka keʼé na̱ yiví?

Biblia káxiní káʼa̱nña xíʼinyó ndáa xa̱ʼa̱ kúú ña̱ kininí kéʼé na̱ yiví:

Xa̱ʼa̱ ña̱ ndíʼi̱-inina xa̱ʼa̱ mií kuitína va̱ása kúʼvi̱-inina xínina Ndióxi̱ ni na̱ yiví (Mateo 24:12).
Ta̱ Ndi̱va̱ʼa chi̱ndaʼána miíra ña̱ va̱xira nu̱ú ñuʼú yóʼo (Apocalipsis 12:9, 12). Xa̱ʼa̱ ña̱kán ku̱a̱ʼání ña̱ʼa kéʼé ta̱ Ndi̱va̱ʼa ña̱ va̱ʼa sandáʼvira na̱ yiví, tasaá kundi̱ʼi̱-inina xa̱ʼa̱ mií kuitína (1 Juan 5:19).

¿Ndáaña xíniñúʼu keʼéyó tá xítoyó ña̱ va̱ása va̱ʼa kéʼé na̱ yiví?

Tu̱ʼun Ndióxi̱ káʼa̱nña xíʼinyó: “Kǒo kutáʼún xíʼi na̱ kéʼé ña̱yóʼo” (2 Timoteo 3:5). Ña̱yóʼo kǒo kúni̱ kachiña ña̱ ni loʼo va̱ása kitáʼanyó xíʼin na̱ yiví, chi ña̱ kúni̱ kachi kúú ña̱ kǒo kutáʼanyó xíʼin na̱ yiví na̱ ndíʼi̱-ini xa̱ʼa̱ mií kuitína ta kǒo kéʼéna ña̱ káʼa̱n Ndióxi̱ (Santiago 4:4).

¿Á ndiʼi na̱ yiví kéʼé ña̱ va̱ása va̱ʼa?

Va̱ása. Biblia ni̱ka̱ʼa̱nña ña̱ koo na̱ yiví na̱ xo̱ʼvi̱ ta ndi̱ʼi-inina xa̱ʼa̱ ndiʼi ña̱ va̱ása va̱ʼa ña̱ kéʼé na̱ yiví (Ezequiel 9:4). Na̱yóʼo kǒo kundi̱ʼi-inina xa̱ʼa̱ miína chi taxina ña̱ kuniʼi Ndióxi̱ yichi̱ nu̱úna. Xíʼin ña̱ ka̱ʼa̱nna ta saátu xíʼin ña̱ keʼéna na̱ʼa̱na ña̱ síín íyona nu̱ú na̱ yiví (Malaquías 3:16, 18). Tá kúú, chikaa̱na ndee̱ ña̱ vií kutáʼanna xíʼin ndiʼi na̱ yiví ta ni va̱ása kuni̱na ku̱ʼu̱nna nu̱ú guerra á ña̱ kuni̱na kanitáʼanna xíʼin inkana (Miqueas 4:3).

¿Á nina ña̱ kini xa̱a̱ na̱ yiví keʼéna?

Va̱ása, su̱ví ndiʼiví na̱ yiví keʼé ña̱ kini. Si̱lóʼo kúma̱ní ta sandíʼi-xa̱ʼa̱ Ndióxi̱ na̱ kǒo xíín kuniso̱ʼo ña̱ káʼa̱nra (Salmo 37:38). Nu̱ú ñuʼú yóʼo taxira koo na̱ yiví na̱ xíniso̱ʼo ña̱ káʼa̱nra ta taxira ña̱ koona ndiʼi tiempo (2 Pedro 3:13; Salmo 37:11, 29). Kivi kandíxayó ña̱ kuu ña̱yóʼo, saáchi Biblia xa̱a̱ chíndeétáʼanña xíʼin ku̱a̱ʼání na̱ yiví ña̱ na̱samana ña̱ kéʼéna ta kéʼéna ña̱ kúni̱ Ndióxi̱ (Efesios 4:23, 24).

a Profecía ña̱ va̱xi nu̱ú Biblia xíʼin ña̱ kúú nu̱ú ñuʼú yóʼo náʼa̱ña ña̱ “ki̱vi̱ nu̱ú ndíʼi” ndóoyó chi tiempo yóʼo yo̱ʼvi̱níña (2 Timoteo 3:1). Tá kúni̱ún kunda̱a̱ka-iniún xa̱ʼa̱ ña̱yóʼo, ka̱ʼvi artículo ña̱ naní “¿Ndáa señal kúú ña̱ koo tiempo so̱ndíʼi?”.