¿Á kivi sandíko Biblia inii̱ tá ni̱ki̱ʼvii̱ ku̱a̱chi?

Ña̱ káʼa̱n Biblia xa̱ʼa̱ ña̱yóʼo

Kiviva chindeétáʼan Biblia xíʼinyó ña̱ ndi̱ko-iniyó tá ni̱ki̱ʼviyó iin ku̱a̱chi (Salmo 32:1-5). Tá ni̱ki̱ʼviyó ku̱a̱chi ta nda̱ndikó-iniyó, ixakáʼnuva-ini Ndióxi̱ xa̱ʼa̱yó ta chindeétáʼanra xíʼinyó ña̱ va̱ʼa ndi̱ko-iniyó (Salmo 86:5). Biblia káʼa̱nña xíʼinyó ña̱ tá va̱ása va̱ʼa kúniyó xa̱ʼa̱ iin ña̱ ke̱ʼéyó, sava yichi̱ ña̱ va̱ʼava kúú ña̱yóʼo, saáchi chíndeétáʼanña xíʼinyó ña̱ kǒo keʼékayó ña̱yóʼo (Salmo 51:17; Proverbios 14:9). Soo saátu, káʼa̱n Biblia xíʼinyó ña̱ kuentaní ná kooyó ña̱ kǒo ndakava-iniyó xa̱ʼa̱ ña̱ ke̱ʼéyó ta saátu ná kǒo ndakanixi̱níyó ña̱ kǒo kivika nasa̱mayó á ña̱ kǒo ndáyáʼviyó nu̱ú Ndióxi̱. Tá nina ña̱ va̱ása va̱ʼa ndákanixi̱níyó xa̱ʼa̱ miíyó kivi kusuchíní-iniyó ta kundi̱ʼi̱ní-iniyó (2 Corintios 2:7).

• ¿Ndáa xa̱ʼa̱ kúú ña̱ kivi chikaa̱yó ku̱a̱chi miíyó?

• ¿Ndáaña kivi keʼún ña̱ va̱ʼa kǒo chikaa̱níún ku̱a̱chi miíún?

• Texto ña̱ káʼa̱n xa̱ʼa̱ na̱ kíʼvi ku̱a̱chi ta íxakáʼnu-ini Ndióxi̱ xa̱ʼa̱na

¿Ndáa xa̱ʼa̱ kúú ña̱ kivi chikaa̱yó ku̱a̱chi miíyó?

Íyo ku̱a̱ʼáva xa̱ʼa̱ ña̱ kivi kundoʼoyó ña̱yóʼo. Sana sa̱xóʼvi̱yó-ini iin na̱ kúni̱níyó xíniyó. Á sana xa̱ʼa̱ ña̱ ta̱ʼán keʼéyó iin ña̱ túvi̱yó ña̱ xíniñúʼu keʼéyó. Sava yichi̱ ndákavaní iniyó xa̱ʼa̱ iin ña̱ʼa ni su̱ví ku̱a̱chi miívíyó níxi̱kuuña. Tá kúú tá kúni̱yó keʼéyó ku̱a̱ʼání ña̱ʼa soo kǒo kúchiñuyó saxínuyóña ta xa̱ʼa̱ ña̱yóʼo kixáʼa ndakavaní-iniyó. Ña̱kán tu̱ʼun Ndióxi̱ káʼa̱nña xíʼinyó ña̱ ná keʼéyó nda̱saa ña̱ kivi keʼéyó (Eclesiastés 7:16).

¿Ndáaña kivi keʼún ña̱ va̱ʼa kǒo chikaa̱níún ku̱a̱chi miíún?

Kǒo taxiún ña̱ sayíʼviña miíún, va̱ʼaka chikaa̱ ndee̱ ña̱ keʼún ña̱ʼa ña̱ chindeétáʼan xíʼún. ¿Ndáaña kivi keʼún?

• Ndakuni ña̱ ni̱ki̱ʼviún ku̱a̱chi. Ka̱ʼa̱n xíʼin Jehováa ña̱ ná ixakáʼnu-inira xa̱ʼún (Salmo 38:18; Lucas 11:4). Kuniso̱ʼova Ndióxi̱ yóʼó tá ndixa ndándikó-iniún xa̱ʼa̱ ña̱ ke̱ʼún, ta chíka̱ún ndee̱ ña̱ kǒo ndikó tukún keʼún ña̱ ke̱ʼún (2 Crónicas 33:13; Salmos 34:18). Iinlá Jehová kúú ta̱ ndixa xíto ndáa ki̱ʼva íyoyó. Tá ndixa chíkaa̱yó ndee̱ ña̱ nasa̱mayó, xa̱ʼa̱ ña̱ va̱ʼa inira ta nda̱kú ndátiinra ku̱a̱chi íxakáʼnuva-inira xa̱ʼa̱ ku̱a̱chiyó (1 Juan 1:9; Proverbios 28:13).

  Tá sa̱xóʼvi̱ún-ini iinna, ndakuni ña̱ íyo ku̱a̱chiún, ta ka̱ʼa̱n xíʼinna ña̱ ná ixakáʼnu-inina xa̱ʼún, sana ixayo̱ʼvi̱vaña xíʼún soo xíniñúʼu ndakú kǒo iniún ta vitá kǒo iniún ña̱ va̱ʼa ka̱ʼún xíʼinna. Soo tá xíʼin ndinuʼu-iniyó káʼa̱nyó xíʼinna ña̱ ná ixakáʼnu-inina xa̱ʼa̱yó kuu u̱vi̱ ña̱ʼa: va̱ʼa kuniún ta ndasaviún ku̱a̱chi (Mateo 3:8; 5:23, 24).

• Ndakanixi̱ní xa̱ʼa̱ ña̱ kúndáʼvi-ini Ndióxi̱ xínira miíyó. Kivi kaʼviún 1 Juan 3:19, 20. Yóʼo kachiña ña̱ sava yichi̱ “sáxo̱ʼvi̱va níma̱yó miíyó xa̱ʼa̱ ku̱a̱ʼání ña̱ʼa”, ña̱yóʼo kúni̱ kachiña ña̱ miíyó kúú na̱ sáxo̱ʼvi̱ miíyó sava yichi̱ ta kíxáʼayó ndákanixi̱níyó ña̱ kǒo xíniñúʼu kuʼvi̱-ini Ndióxi̱ kunira miíyó. Soo saátu káʼa̱n texto yóʼo “ña̱ káʼnukava Ndióxi̱ nu̱ú níma̱yó”. ¿Ndáaña kúni̱ kachi ña̱yóʼo? Ña̱ xíni̱va̱ʼara miíyó, xíni̱ra ndáaña ndákanixi̱níyó ta saátu ndáaña kivi sandákava miíyó ndaʼa̱ ku̱a̱chi. Ta saátu xíni̱ra ña̱ kúúyó na̱ yiví ku̱a̱chi ta xa̱ʼa̱ ña̱kán kíʼviyó ku̱a̱chi sava yichi̱ (Salmo 51:5).b Ña̱kán kǒo kúndasívíra na̱ ndixa ndándikó-ini (Salmo 32:5).

• Kǒo ndakaʼánkaún xa̱ʼa̱ ña̱ ke̱ʼún tá ya̱chi̱. Biblia káʼa̱nña xa̱ʼa̱ ku̱a̱ʼá na̱ yiví na̱ ke̱ʼé ña̱ kini, soo tándi̱ʼi na̱samavana. Iin ta̱yóʼo xi̱kuu ta̱ Saulo ta̱ ñuu Tarso, soo tá na̱samara ki̱xáʼana káʼa̱nna xíʼinra ta̱ apóstol Pablo. Tá ya̱chi̱ xi̱kuura iin ta̱ fariseo ta xi̱ ixandi̱va̱ʼaníra xíʼin na̱ discípulo ta̱ Jesús (Hechos 8:3; 9:1, 2, 11). Soo tá na̱kunda̱a̱-inira ña̱ kǒo kútóo Jehová ni ta̱ Jesús ña̱ kéʼéra, nda̱ndikó-inira, na̱samara ña̱ kéʼéra ta va̱ʼaní ni̱xa̱a̱ra ka̱chíñura nu̱ú Ndióxi̱. Ta̱ Pablo nda̱ndikóní-inira xa̱ʼa̱ ña̱ i̱xandi̱va̱ʼara xíʼin na̱ cristiano, soo chi̱kaa̱ra ndee̱ ña̱ kǒo ndakaʼánkara xa̱ʼa̱ ña̱ xi̱keʼéra. Xa̱ʼa̱ ña̱ ku̱ndáʼvi-ini Jehová xi̱nirara chi̱kaa̱níra ndee̱ natúʼunra xíʼin na̱ yiví xa̱ʼa̱ Ndióxi̱ ta xi̱kandíxara ña̱ ndakiʼinra ña̱ va̱ʼa, ña̱ kutakura ndiʼi tiempo (Filipenses 3:13, 14).

Texto ña̱ káʼa̱n xa̱ʼa̱ na̱ kíʼvi ku̱a̱chi ta íxakáʼnu-ini Ndióxi̱ xa̱ʼa̱na

Jeremías 31:34: “Yi̱ʼi̱ koo káʼnu-inii̱ xa̱ʼa̱ ña̱ va̱ása va̱ʼa kéʼéna ta kǒo ndakaʼánkai̱ xa̱ʼa̱ ku̱a̱china”.

Ña̱ kúni̱ kachiña: Tá íxakáʼnu-ini Ndióxi̱ xa̱ʼa̱ ku̱a̱chiyó kǒo ndákaʼánkara xa̱ʼa̱ña.