¿Ndáa ki̱ʼva náʼa̱ ta̱ Ndi̱va̱ʼa?

Ña̱ káʼa̱n Biblia xa̱ʼa̱ ña̱yóʼo

Va̱ása kívi kuniyó ta̱ Ndi̱va̱ʼa chi iin espíritu kúúra (Efesios 6:11, 12).

Siaʼa sánana na̱ yiví ta̱ Ndi̱va̱ʼa; níʼira iin ka̱a ña̱ xi̱ín nu̱ú ta náʼa̱ra nda̱a̱ táki̱ʼva náʼa̱ iin ti̱xúʼú ta íyo ndiki̱ra xíʼin si̱ʼma̱ra.

Ku̱a̱ʼání yichi̱ sánanana ta̱ Ndi̱va̱ʼa nda̱a̱ táki̱ʼva íyo iin ta̱a ta̱ náʼa̱ nda̱a̱ táki̱ʼva náʼa̱ iin ti̱xúʼú, íyo ndiki̱ra, si̱ʼma̱ra ta níʼira iin ka̱a ña̱ xi̱ín nu̱ú. Xa̱a̱ yáʼaka mil ku̱i̱ya̱ sa̱nánana ta̱ Ndi̱va̱ʼa, ta sana na̱ sa̱nánara xi̱kuu na̱ pintor na̱ xi̱ndoo tiempo saá. Sana sa̱nánanara nda̱a̱ táki̱ʼva xi̱ndakanixi̱ní na̱ yiví xa̱ʼa̱ra tiempo saá.

¿Ndáa ki̱ʼva náʼa̱ ta̱ Ndi̱va̱ʼa káchi Biblia?

Tá káʼa̱n Biblia xa̱ʼa̱ ta̱ Ndi̱va̱ʼa, chítáʼanña ta̱yóʼo xíʼin ku̱a̱ʼá nu̱ú ña̱ʼa tasaá kunda̱a̱-iniyó ndáa ki̱ʼva íyora ta su̱ví ndáa ki̱ʼva náʼa̱ra. Ña̱yóʼo kúú sava ejemplo:

Iin ángel ta̱ va̱ʼa. Na̱ yiví túvina ña̱ táxira ña̱ʼa ña̱ va̱ʼa ndaʼa̱na ta xa̱ʼa̱ ña̱yóʼo ndíku̱nna ña̱ sánáʼa̱ra nu̱úka ña̱ kandíxana ña̱ sánáʼa̱ Ndióxi̱ (2 Corintios 11:14).
Ndikaʼa tí ndúkue̱ʼe̱ní. Íxandi̱va̱ʼara xíʼin na̱ ñuu Ndióxi̱ (1 Pedro 5:8).
Tí dragón. Saáchi sáyi̱ʼvíra na̱ yiví, ndakúníra ta ku̱a̱ʼánína sáxo̱ʼvi̱ra (Apocalipsis 12:9).

Versículo ña̱ va̱xi nu̱ú Biblia ña̱ káʼa̱n xa̱ʼa̱ ta̱ Ndi̱va̱ʼa

2 Corintios 11:14: “Ta̱ Ndi̱va̱ʼa ndásara miíra nda̱a̱ táki̱ʼva íyo iin ángel ta̱ va̱ʼa”.

Ña̱ kúni̱ kachiña: Ta̱ Ndi̱va̱ʼa sándaʼvira na̱ yiví ña̱ ná ndakanixi̱nína xa̱ʼa̱ra ña̱ kúúra ta̱ va̱ʼa, tasaá kivi kundiku̱nna ña̱ sánáʼa̱ra nu̱úka ña̱ kundiku̱nna ña̱ sánáʼa̱ Ndióxi̱.
Efesios 6:11: “Kuniñúʼundó ndiʼi ña̱ táxi Ndióxi̱ ndaʼa̱ndó ña̱ va̱ʼa kanitáʼanndó, saá kuchiñundó ya̱ʼandó nu̱ú ndiʼi ña̱ʼa ña̱ xíniñúʼu ta̱ Ndi̱va̱ʼa ña̱ kúni̱ra sandáʼvira ndóʼó”.

Ña̱ kúni̱ kachiña: Ta̱ Ndi̱va̱ʼa íxandi̱va̱ʼara xíʼin na̱ yiví tasaá ixaso̱ʼona nu̱ú Ndióxi̱.
Santiago 4:7: “Kandíxaníndó Ndióxi̱ soo kǒo keʼéndó ña̱ kúni̱ ta̱ Ndi̱va̱ʼa, tasaá kuxíkára nu̱úndó”.

Ña̱ kúni̱ kachiña: Va̱ása kuchiñuví ta̱ Ndi̱va̱ʼa xíʼinyó tá ná kandíxayó ña̱ káʼa̱n Ndióxi̱.
1 Pedro 5:8: “Ta̱ Ndi̱va̱ʼa sáa̱ní-inira xínira ndóʼó, ta nda̱a̱ táki̱ʼva kéʼé tí ndikaʼa tí ndúkue̱ʼe̱ní ta ndúkúrí ña̱ʼa ña̱ kaxírí saá kéʼéra, ta káva̱ndura xíkara nu̱ú íyondó”.

Ña̱ kúni̱ kachiña: Ta̱ Ndi̱va̱ʼa sáa̱ní-inira xínira na̱ kándíxa Ndióxi̱ ta kéʼéra nda̱a̱ ndáaka ña̱ʼa ña̱ va̱ʼa sakúxíkárana nu̱ú Ndióxi̱.