Tú almendro tú kama xáa

Ki̱ʼva 30 nu̱ú yitu̱n káʼa̱n Biblia xa̱ʼa̱, iin túyóʼo kúú tú almendro ta siʼna túyóʼo xáa yita ndaʼa̱ tá xa̱a̱ yáʼa tiempo ña̱ vi̱xin. Chí ñuu Israel tá xa̱a̱ ku̱nu̱mí ndiʼi yo̱o̱ enero, liviní xáa yita color yaa ndaʼa̱nú á ña̱ color rosa. Ki̱vi̱ túyóʼo tu̱ʼun hebreo kúni̱ kachiña, tú kama ndáko̱o, ki̱ʼva ña̱ íyo túyóʼo, ¿á kítáʼanña xíʼin ki̱ʼva ña̱ íyo ta̱ i̱xava̱ʼanú?

Tu̱ʼun ña̱ ni̱ka̱ʼyi̱ ña̱ va̱xi nu̱ú Jeremías 7:25 káʼa̱nña Jehová ya̱chi̱ xi̱ndako̱ora ña̱ va̱ʼa chindaʼára na̱ profeta ña̱ va̱ʼa ku̱ʼu̱nna nu̱ú na̱ ñuura ndiʼi ki̱vi̱. La Atalaya 15 tí marzo ku̱i̱ya̱ 2011 káʼa̱nña ña̱yóʼo: “Nda̱a̱ táki̱ʼva kéʼé tú almendro kama xáa yitanú, ki̱ʼva saá íyo Ndióxi̱ chi xa̱a̱ ya̱chi̱ka xi̱kaʼa̱nra xíʼin na̱ judío ndáaña kundoʼona xa̱ʼa̱ ña̱ va̱ása níxiinna kuniso̱ʼona ña̱ xi̱kaʼa̱nra xíʼinna, ta va̱ása ndakindee̱ra chi koo tu̱ʼvara nda̱a̱ ná xi̱nu ña̱ ni̱ka̱ʼa̱nra koo” (Jer. 1:11,12).

Biblia chítáʼanña yita yaa ña̱ kána ndaʼa̱ tú almendro xíʼin vi̱xi ña̱ kána xi̱ní na̱ xa̱a̱ chée (Ecl. 12:5). Ta saátu tá i̱xava̱ʼana tabernáculo, i̱xava̱ʼana copa ña̱ ni̱xi̱yo nda̱a̱ táki̱ʼva íyo yita ña̱ kána ndaʼa̱ tú almentro ña̱ xi̱ndóso ndaʼa̱ ña̱ candelabro, ke̱ʼéna ña̱yóʼo xa̱ʼa̱ ña̱ liviní íyo yita tú yóʼo (Éx. 37:17-20).