Zacarías
6 Tasaá nda̱niʼi tukui̱ nu̱úi̱ ta xi̱nii̱ u̱vi̱ carreta tú va̱xi ma̱ʼñú u̱vi̱ yuku̱, ta yuku̱ yóʼo xi̱kuuña ña̱ cobre. 2 Kuáyi̱ tí kúáʼa kúú tí káñuu* carreta tú nu̱ú, ta kuáyi̱ tí ndáá kúú tí káñuu carreta tú u̱vi̱. 3 Kuáyi̱ tí yaa kúú tí káñuu carreta tú u̱ni̱, ta kuáyi̱ tí pinto xíʼin kuáyi̱ tí kúúmií ku̱a̱ʼá nu̱ú color kúú tí káñuu carreta tú ku̱mí.
4 Ta ni̱nda̱ka̱tu̱ʼíi̱n ta̱ ángel ta̱ káʼa̱n xíʼi̱n: “¿Ndáana kúú na̱yóʼo táta?”.
5 Ta ta̱ ángel nda̱kuiinra yuʼíi̱: “Na̱yóʼo kúú ku̱mí na̱ ángel* na̱ íyo chí ndiví, na̱ ni̱xa̱ʼa̱n nu̱ú ta̱ xáʼndachíñu nu̱ú iníísaá ñuʼú ta ke̱ena ku̱a̱ʼa̱nna kachíñuna. 6 Carreta tú káñuu kuáyi̱ tí ndáá ku̱a̱ʼa̱nnú chí nu̱ú ñuʼú ña̱ íyo chí norte; kuáyi̱ tí yaa xíkáka yáʼarí ku̱a̱ʼa̱nrí chí nu̱ú ndíkaa̱ mar, ta kuáyi̱ tí pinto ku̱a̱ʼa̱nrí chí nu̱ú ñuʼú ña̱ íyo chí sur. 7 Ta kuáyi̱ tí kúúmií ku̱a̱ʼá nu̱ú color xa̱a̱ kúni̱nírí keerí ku̱ʼu̱nrí iníí nu̱ú ñuʼú”. Tasaá ni̱ka̱ʼa̱nra: “Ku̱a̱ʼa̱nndó nu̱ú iníísaá ñuʼú”. Ta nda̱kiʼinrí ku̱a̱ʼa̱nrí nu̱ú iníísaá ñuʼú.
8 Tasaá ka̱nara yi̱ʼi̱ ta ni̱ka̱ʼa̱nra xíʼi̱n: “Koto, xa̱ʼa̱ ña̱ ku̱a̱ʼa̱nna chí nu̱ú ñuʼú ña̱ íyo chí norte, náʼa̱ña ña̱ va̱ása sáa̱níka Jehová xíʼin ñuʼú kán”.*
9 Ta tuku ni̱ka̱ʼa̱n Jehová xíʼi̱n. Ña̱yóʼo ni̱ka̱ʼa̱nra xíʼi̱n: 10 “Ndakiʼin ña̱ʼa ña̱ ki̱xaa̱ xíʼin ta̱ Heldái, ta̱ Tobiya xíʼin ta̱ Jedayá, ña̱ chi̱ndaʼá na̱ ñuu na̱ ndóo chí ñuu Babilonia; ta ki̱vi̱ kán xíniñúʼu ki̱ʼviún veʼe ta̱ Josías se̱ʼe ta̱ Sofonías xíʼin na̱ ta̱a yóʼo, na̱ ke̱e chí ñuu Babilonia. 11 Xíniñúʼu kiʼún plata xíʼin oro ta ixava̱ʼún iin corona ta chinúúnña xi̱ní ta̱ Josué se̱ʼe ta̱ Jehozadac, ta̱ kúú su̱tu̱ káʼnu. 12 Ta ka̱ʼún xíʼinra:
”‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: “Yóʼo íyo ta̱ ta̱a ta̱ íyo nda̱a̱ táki̱ʼva íyo iin yitu̱n loʼo tú sa̱kán ndúta̱. Nda̱a̱ chí nu̱ú íyora kuaʼnura ta ta̱yóʼo kúú ta̱ ixava̱ʼa templo Jehová. 13 Ta̱yóʼo kúú ta̱ ixava̱ʼa templo Jehová, ta ta̱yóʼo kúú ta̱ ndukáʼnu. Koora nu̱ú trono ta kaʼndachíñura, ta ni xa̱a̱ íyora nu̱ú trono saátu xa̱a̱ra koora su̱tu̱ ta va̱ʼaní keʼéra u̱vi̱ saá chiñu yóʼo. 14 Ta corona yóʼo kindo̱oña chí templo Jehová ña̱ va̱ʼa ndakaʼánna xa̱ʼa̱ ta̱ Hélem, ta̱ Tobiya, ta̱ Jedayá xíʼin ta̱ Hen se̱ʼe ta̱ Sofonías. 15 Ta nda̱a̱ na̱ ndóo xíká kixi kachíñu ña̱ va̱ʼa kuva̱ʼa templo Jehová”. Ta ndóʼó kunda̱a̱-inindó ña̱ mií Jehová ta̱ xáʼndachíñu nu̱ú na̱ ángel kúú ta̱ chi̱ndaʼá yi̱ʼi̱ nu̱úndó. Ta ña̱yóʼo xi̱nuvaña tá ná kuniso̱ʼondó ña̱ káʼa̱n Jehová Ndióxi̱ndó’”.