Awantu wa kwe Yehova wakakwavwana. (2 Kor. 8:4) Lelo nanti ciwe wo-o, mpindi zimwi pakalondekwa ukusipa pakuti wacite wo-o. Ku cakulolelako, nga cakuti kumwi kwacitika inkondo, wa eluda awa kweyoyo incende wakamanya ukuti awanawitu na wankazi wakulondekwa ukuwawomelezya, ukuwatunjilila nu kusinincizya ukuti wali ni vyakuwavwa ukuwa na wuciwuza uwuwome ne Yehova nu kuwa nu wumi. Ulukundo aluno lukalenga wa eluda wawika na mawumi yawo muwusanso pakutivye wavwe awanawitu na wankazi. Nga kwacitika amasanso, cacindama nkaninye ukuwa nicivwila pakuti tuwe swe walemenkane. Mwakwivwila vino awa ku musambo wakuminena. (Heb. 13:17) Wa eluda wazipizile wapitulukamo lyonsinye muvyakukonka pakuyipekanizizya kumasanso na vino wangacita nga cakuti uwusanso wacitika. (1 Kor. 14:​33, 40) Mwawa awasipe swinya awacenjele. (Imilu. 22:3) Mwakwelenganyapo sana pano mutani mucite cimwi. Swinya mutacita ivintu vino vingamiletelela. Mwakweyamila pe Yehova. Fwandi angamyavwa ukucinjilila awina Klistu wawuyo ukwasowa ni ntazi iyili yonsinye. w24.07 4 ¶8; 5 ¶11

Imfumu Devedi wamanyile e Yehova swinya wamusuwizile. Wapefile kwe Yehova ukuti amwavwe pano awalwani wamulwisyanga pano palinji ni Mfumu Sauli. Pano Yehova wasusile ipepo lyakwe nu kumupususya, walanzile ukuti: “Imfumu e Leza amumi!” (Amalu. 18:46) Uzye wasuzile mwinye pakulanda wo-o? Ibuku limwi likalanda ukuti walanjizyanga vino wasuwizile e Yehova ukuti “we Leza wawumi wino akakwavwa awawomvi wakwe.” Fwandi vino vyamuciticilanga avino vyalenzile amanye ukuti e Yehova walolanga vino wapitangamo swinya wavwambisyanga ukumwavwa. Conye acino calenzile atwalilile ukuwombela Yehova nu kumusecelesya. (Amalu. 18:​28, 29, 49) Ukusinincizya ukuti e Yehova we Leza wa wumi, kungalenga twawombesya mu mulimo wakwe. Swinya kungalenga tuwe na maka ya kusipicizya intazi nu kuvwambisya ukutwalilila ukuwombesya mu mulimo wakwe. Cinji acakuti, tuliwavwambisya ukutwalilila ukuwa iviwuza vyakwe. w24.06 20-21 ¶3-4

Avyani vino tungasambililako ku mazwi yano umutumwa Paulo walembezile awina Tesalonika? Nga cakuti twivwa vimwi vino vyapusana na vino twasambilila nanti amalyasi yamwi yano yakuloleka ngati aya cisinka, tuzipizile ukuwomvya ukwiluka. Kaali mu wuteko wa Soviet Union, awalwani witu walembezile awanawitu e kalata yino yalolekanga ngati yifumile ku ma ofesi makulu aya Nte zya kwe Yehova. Mwe yo-o e kalata wawomelezizye awanawitu wamwi ukuti wapange akaliwumba akakuwayicitila ivintu. Yo-o e kalata yalolekanga ngati molimonye yifumile ku ma ofesi makulu. Lelo awanawitu watakoncelezile wo-o uwufi. Amuno waweni ukuti vino vyalinji mwe yo-o e kalata vyapusine na vino wasambilizile. Pe yo-o impindi awalwani witu wakawomvya e intaneti pakutuvulunganya na pakuti waleke tupawunkane. Fwandi ukucila ukuti ‘muvulungane,’ muzipizile ukuyicinjilila ukupitila mukulola nga cakuti vino mwivwa nanti ukuwazya vilingine ni visinka vino mwasambilila.—2 Tes. 2:2; 1 Yoh. 4:1. w24.07 12 ¶14-15