Nagħtu Merħba lid-Dinja Ġdida taʼ Libertà t’Alla
“[Alla] se jimsaħ kull demgħa minn għajnejhom, u l-mewt ma tkunx iżjed, u la l-għali u la l-biki u lanqas l-uġigħ ma jkunu iżjed.”−RIVELAZZJONI 21:4.
1, 2. Min biss jistaʼ jġib libertà vera, u x’nistgħu nitgħallmu mill-Bibbja Dwaru?
L-ISTORJA tad-dinja tat prova tal-verita taʼ dak li qal il-profeta Ġeremija: “Għall-bniedem tal-art il-mogħdija tiegħu ma tappartjenix lilu. Ma jappartjenix lill-bniedem li miexi saħansitra li jidderieġi l-pass tiegħu.” Min biss jistaʼ kif jixraq jidderieġi l-pass tal-bniedem? Ġeremija ssokta jgħid: “Ikkorreġini, O Jehovah.” (Ġeremija 10:23, 24) Iva, Jehovah biss jistaʼ jġib libertà vera mill-problemi li jgħakksu lill-familja umana.
2 Il-Bibbja fiha ħafna eżempji tal-abbiltà taʼ Jehovah f’li jġib libertà lil dawk li jaqduh. “L-affarijiet kollha li nkitbu qabel inkitbu għat-tagħlim tagħna, biex permezz tas-sabar tagħna u permezz tal-faraġ mill-Iskrittura nistgħu jkollna t-tama.” (Rumani 15:4) Il-gudiżzji taʼ Jehovah kontra l-qima falza kienu wkoll miktubin, u dawn jaqdu bħala “twissija lilna li fuqna waslu t-tmimijiet tas-sistemi taʼ affarijiet.”—1 Korintin 10:11.
Jillibera Lill-Poplu Tiegħu
3. Jehovah kif wera l-abbiltà tiegħu li jeħles lin-nies tiegħu fl-Eġittu?
3 Eżempju wieħed tal-abbiltà t’Alla f’li jesegwixxi ġudiżzju kontra l-qima falza u f’li jeħles lil dawk li jagħmlu r-rieda tiegħu seħħ meta l-poplu tiegħu tal-qedem kienu fil-jasar fl-Eġittu. Eżodu 2:23-25 igħid: “[I]l-għajta tagħhom għall-għajnuna baqgħet tielaʼ ’l fuq lejn il-veru Alla minħabba fil-jasar. Maż-żmien Alla semaʼ t-tinwiħ tagħhom.” F’turija meraviljuża tas-superjorità tiegħu fuq l-allat foloz tal-Eġittu, Alla li Jistaʼ Kollox ġab għaxar kastigi fuq dak il-ġens. Kull kastig kien imfassal biex jumilja lil xi alla tal-Eġittu, billi juri li huma kienu foloz u ma setgħux igħinu lill-Eġizzjani li kienu jqimuhom. B’hekk Alla llibera lill-poplu tiegħu u qered lil Farawni u lill-armati tiegħu fil-Baħar l-Aħmar.—Eżodu, kapitli 7 sa 14.
4. Għala ma kinetx inġustizzja għal Alla li jesegwixxi l-ġudizzji tiegħu kontra l-Kangħaniti?
4 Meta Alla ġab lil Iżrael f’Kangħan, l-abitanti tiegħu li kienu jqimu lid-demonji ġew meqrudin u l-art ingħatat lill-poplu t’Alla. Bħala s-Sovran Universali, Jehovah għandu d-dritt li jesegwixxi l-ġudizzji tiegħu fuq reliġjonijiet degradanti. (Ġenesi 15:16) U rigward ir-reliġjon Kangħanita, il-Bible Handbook taʼ Halley igħid: “Il-qima taʼ . . . allat Kangħaniti kienet tikkonsisti f’orġji mill-iktar stravaganti; it-tempji tagħhom kienu ċentri taʼ viżzju. . . . Il-Kangħaniti qiemu b’kondotta laxka immorali, bħala rit reliġjuz, fil-preżenza tal-allat tagħhom; u mbagħad, billi joqtlu lil uliedhom li jitwieldu l-ewwel, bħala sagrifiċċju lil dawn l-istess allat. Jidher li, fil-biċċa l-kbira, l-art taʼ Kangħan kienet saret tip taʼ Sodom u Gomorra fuq skala nazzjonali.” Hu jżid: ”Kellha ċivilizzazzjoni bħal din b’daqshekk ħmieġ mistmerr u kefrija xi dritt li tibqaʼ teżisti?...L-arkeoloġisti li jħaffru fir-rovini taʼ bliet Kangħaniti jistagħgbu kif Alla ma qeridhomx qabel ma qeridhom.”
5. Li Alla ħeles lill-poplu tiegħu tal-qedem kif iservi bħala mudell għal żmienna?
5 Dan ir-rakkont dwar li Alla aġixxa kontra l-qima falza, billi ħeles lill-poplu tal-patt tiegħu, u pprovdielhom art imwiegħda jservi bħala mudell taʼ affarijiet li jridu jiġu. Jipponta lejn il-futur immedjat meta Alla se jgħaffeg lir-reliġjonijiet foloz taʼ did-dinja u lil dawk li jappoġġjawhom u se jdaħħal lill-qaddejja tiegħu taż-żmien modern f’dinja ġdida taʼ tjieba.—Rivelazzjoni 7:9, 10, 13, 14; 2 Pietru 3:10-13.
Libertà Vera fid-Dinja Ġdida t’Alla
6. X’inhuma xi ftit mil-libertajiet meraviljużi li Alla se jipprovdi fid-dinja ġdida?
6 Fid-dinja l-ġdida, Alla se jbierek lill-poplu tiegħu bl-aspetti meraviljużi kollha tal-libertà li hu ppjana għall-familja umana. Se jkun hemm libertà mill-oppressjoni li ssir minn elementi politiċi, ekonomiċi, u reliġjużi foloz. Se jkun hemm libertà mid-dnub u l-mewt, billi n-nies ikollhom il-prospett li jgħixu għal dejjem fuq l-art. “It-twajbin infushom se jkollhom pussess tal-art, u se jgħammru għal dejjem fuqha.”—Salm 37:29; Mattew 5:5.
7, 8. X’se jiġi mġarrab f’li niksbu mill-ġdid saħħa perfetta fid-dinja ġdida?
7 Ftit wara li dik id-dinja ġdida tkun bdiet, l-abitanti tagħha se jiġu restawrati b’mod mirakoluż għal saħħa perfetta. Ġob 33:25 igħid: “Ħalli l-laħam tiegħu jsir iktar frisk milli fiż-żgħożija; ħallih imur lura lejn il-jiem tal-ħeġġa taʼ żgħożitu.” Isaija 35:5, 6 iwiegħed: “F’dak iż-żmien għajnejn il-għomja se jinfetħu, u l-istess widnejn tat-torox se jkunu mhux misdudin. F’dak iż-żmien iz-zopp se jixxabbat sewwa sew bħalma jagħmel iċ-ċerv, u lsien il-mutu se jgħajjat bil-ferħ.
8 Dawk minnkom b’mard fiżiku minħabba xjuhija jew nuqqas taʼ saħħa, immaġinaw lilkom infuskom fid-dinja l-ġdida tqumu kull fil-għodu b’saħħitkom u mimlijin vitalità. It-tikmix tagħkom inbidel f’ġilda lixxa u b’saħħitha—m’hemmx bżonn iżjed taʼ kremi tal-ġilda. Il-għajnejn tagħkom neqsin mill-vista jew għamjin ġew restawrati għal vista perfetta—m’hemmx bżonn iżjed taʼ nuċċalijiet. Smigħ perfett ġie restawrat—armu dawk l-istrumenti għassmigħ. Dirgħajn u riġlejn immankati issa huma qawwijin u sħaħ—eħilsu minn dawk il-bsaten, krozzi, u siġġijiet bir-roti. M’hemmx iżjed mard—armu dawk il-mediċini kollha. B’hekk, Isaija 33:24 ibassar: “Ebda resident ma se jgħid: ‘Jien marid.” Hu jistqarr ukoll: “Għall-eżaltar u t-tferrieħ se jaslu, u n-niket u t-tnegħid iridu jaħarbu lil hinn.”−Isaija 35:10.
9. Il-gwerra kif se tinġieb fi tmiem għal dejjem?
9 Qatt iżjed ma se jiġi xi ħadd issagrifikat lill-gwerra. “[Alla] qiegħed iġiegħel li l-gwerer jieqfu sa tarf l-art. Il-qaws hu jaqsam fi tnejn u tassew ikisser il-lanza f’biċċiet; il-vaguni jaħraqhom fin-nar.” (Salm 46:9) Armamenti tal-gwerra qatt iżjed ma se jiġu permessi mill-Mexxej tas-Saltna t’Alla, Kristu Ġesù, li Isaija 9:6 isejjaħlu l-“Prinċep tal-Paċi.” Vers 7 iżid: “Għall-abbundanza tal-ħakma taʼ prinċep u għall-paċi ma se jkun hemm ebda tmiem.”
10, 11. Il-paċi totali x’se tkun tfisser għall-art?
10 X’barka se tkun għall-umanità, u għal din l-art, li jkunu ħielsa mill-armamenti tal-gwerra! Ara, fiż-żmien preżenti, armamenti wżati fi gwerar taʼ qabel għadhom jeqirdu lin-nies. F’pajjiż wieħed, Franza, iktar minn 600 esperti tat-tneħħija tal-bombi nqatlu mill-1945 ’il hawn waqt li kienu jneħħu l-isplussivi mħollijin minn gwerer taʼ qabel. Il-kap tal-aġenzija tat-tneħħija tal-bombi taʼ dak il-pajjiż qal: “Għadna nsibu balal tal-kanuni attivi mill-Gwerra Franza-Prussja tal-1870. Hemm għadajjar mimlijin bi grenades tossiċi mill-Ewwel Gwerra Dinjija. Kull tant, xi bidwi bil-mutur tal-ħrit igħaddi minn fuq xi bomba moħbija għal kontra t-tankijiet mit-Tieni Gwerra Dinjija u puff, daqshekk għamel. Dawn l-affarijiet qegħdin kullimkien.” Sentejn ilu The New York Times ikkummentat: “Fil-45 sena mit-tmiem tat-Tieni Gwerra Dinjija, [gruppi tat-tneħħija tal-bombi] neħħew mill-ħamrija [Franċiża] 16-il miljun balla tal-artillerija, 490,000 bomba u 600,000 mina taʼ taħt l-ilma.... Miljuni taʼ biċċiet taʼ rabaʼ għadhom imdawrin biċ-ċnut, b’armamenti mgħaddsin ’l isfel sal-irkobba taʼ bniedem u mdawrin b’kartelluni li jwissu: ‘Tmissx. Joqtol!”ˈ
11 Kemm se tkun differenti d-dinja ġdida! Kulħadd se jkollu djar xierqa, ikel abbundanti, u x-xogħol premjanti u taʼ paċi taʼ li jbiddel l-art kollha f’ġenna. (Salm 72:16; Isaija 25:6; 65:17-25) Qatt iżjed in-nies, u l-art, ma se jiġu bbombardjati minn miljuni taʼ mezzi splussivi. Dinja ġdida bħal din hi dak li Ġesù kellu f’moħħu meta qal lil wieħed li wera fidi fih: “Int se tkun miegħi fil-Ġenna.”−Luqa 23:43.
Edukazzjoni Globali għall-Ħajja
12, 13. Ġesù u Isaija liema xogħol edukattiv globali bassru għal żmienna?
12 Meta wieħed jitgħallem dwar id-dinja ġdida t’Alla, jitgħallem ukoll li fi żmienna, Jehovah ipproduċa kongregazzjoni dinjija organizzata għall-qima vera. Din se tkun il-qalba tad-dinja l-ġdida, u Alla qed jużaha issa biex tistruwixxi lil oħrajn dwar il-għanijiet tiegħu. Din l-organizzazzjoni Kristjana qiegħda twettaq xogħol edukattiv globali taʼ natura u daqs li bħalu qatt ma deher qabel. Ġesù bassar li dan kellu jsir. Hu qal: “Din l-aħbar tajba tas-saltna se tkun ippridkata fl-art abitata kollha għal xiehda lill-ġnus kollha; u mbagħad se jiġi t-tmiem.”−Mattew 24:14.
13 Isaija wkoll tkellem dwar dan ix-xogħol edukattiv globali: “[I]rid iseħħ fil-parti finali tal-jiem [fi żmienna] li l-muntanja tad-dar taʼ Jehovah [il-qima vera u eżaltata tiegħu] se tiġi stabbilita fis-sod . . . u lejha l-ġnus kollha jridu jiġru bħal xmara. U ħafna popli ċertament se
jmorru u jgħidu: ‘Ejjew u ħalli nitilgħu lejn il-muntanja taʼ Jehovah, . . . u ħu se jistruwina dwar il-mogħdijiet tiegħu, u aħna se nimxu fil-passaġġi tiegħu.”ˈ—Isaija 2:2, 3.
14. Kif nistgħu nidentifikaw lin-nies t’Alla llum?
14 Għaldaqstant, ix-xogħol globali taʼ xiehda dwar is-Saltna t’Alla huwa evidenza qawwija li aħna ninsabu viċin it-tmiem taʼ din is-sistema mill-agħar u li l-libertà vera hija fil-qrib. Dawk l-uħud li qegħdin iżuru lin-nies bil-messaġġ mimli tama dwar id-dinja ġdida t’Alla huma deskritti f’Atti 15:14 bħala ‘poplu għal isem Alla.’ Min iġorr isem Jehovah u jagħti x-xiehda globali dwar Jehovah u s-Saltna tiegħu? L-evidenza storika tas-seklu 20 twieġeb: ix-Xhieda taʼ Jehovah biss. Illum il-għadd tagħhom hu iktar minn erbaʼ miljuni ftiktar minn 66,000 kongregazzjoni madwar id-dinja kollha.—Isaija 43:10-12; Atti 2:21.
15. Rigward il-kwistjonijiet politiċi, kif nistgħu nidentifikaw lill-veri qaddejja t’Alla?
15 Evidenza oħra li x-Xhieda taʼ Jehovah qegħdin iwettqu l-profeziji dwar ix-xogħol taʼ ppridkar tas-Saltna tinsab f’Isaija 2:4: “Huma se jkollhom jaħdmu sjufhom f’sikek tal-moħriet u l-lanez tagħhom f’imqassijiet taż-żabra. Ġens mħux se jerfaʼ sejf kontra ġens, lanqas ma se jitgħallmu l-gwerra iktar.” Mela dawk li qegħdin jagħmlu xogħol globali taʼ ppridkar dwar it-tmexxija tas-Saltna t’Alla ma jridux ”jitgħallmu l-gwerra iktar.” Ġesù qal li huma ma jridu jkunu “ebda parti mid-dinja.” (Ġwann 17:16) Dan ifisser li huma jridu jkunu newtrali fi kwistjonijiet politiċi, billi ma jzommu ma l-ebda naħa fil-kontroversji u l-gwerar tal-ġnus. Min huma dawk li ma huma ebda parti mid-dinja u ma jitgħallmux gwerra iktar? Għal darb’oħra, l-evidenza storika tas-seklu 20 tixhed: ix-Xhieda taʼ Jehovah biss.
16. Kemm se jkun bir-reqqa x-xogħol edukattiv globali t’Alla?
16 Ix-xogħol edukattiv globali tax-Xhieda taʼ Jehovah se jkompli saħansitra wara li Alla jġib fi tmiem lil din id-dinja preżenti mill-agħar. Isaija 54:13 jistqarr: “[U]liedek subien kollha se jkunu persuni mgħallmin minn Jehovah.” Tant se jsir bir-reqqa dan it-tagħlim li Isaija 11:9 ibassar: “L-art ċertament li se tkun mimlija bil-għarfien taʼ Jehovah bħalma l-ilmijiet qegħdin jiksu lill-istess baħar.” Tagħlim kontinwu se jkun meħtieġ mhux biss għal dawk li jsalvaw fit-tmiem taʼ din id-dinja qadima u għat-tfal li forsi jitwieldu fid-dinja l-ġdida imma wkoll għall-biljuni li jiġu lura għall-ħajja fl-irxoxt. Eventwalment, kull persuna li tgħix fuq l-art se tiġi mgħallma biex teżerċita r-rieda ħielsa tagħha kif jixraq fil-limiti tal-liġijiet t’Alla. Ir-riżultat? “[I]l-ġwejdin infushom se jkollhom pussess tal-art, u huma tabilħaqq se jsibu l-għaxqa bnina tagħhom fl-abbundanza taʼ paċi.”−Salm 37:11.
Libertajiet Kbar Saħansitra Issa
17. Mosè x’qalilhom biex jagħmlu lin-nies tal-qedem t’Alla?
17 Meta l-Iżraeliti tal-qedem kienu fuq il-għatba tal-Art Imwiegħda, Mosè kellimhom u qal: “Jien għallimtkom regolamenti u deċiżjonijiet ġudizzjarji, sewwa sew bħalma Jehovah Alla tiegħi kkmandani, għalikom biex tagħmlu hekk f’nofs l-art li tagħha intom se tieħdu pussess. U intom tridu żzommuhom u tagħmluhom, għaliex dan hu għerf min-naħa tagħkom u fehma min-naħa tagħkom quddiem għajnejn il-popli li se jisimgħu dwar dawn ir-regolamenti kollha, u huma ċertament li se jgħidu, ‘Dan il-ġens kbir huwa bla dubju poplu għaref u li jifhem.’ Għax liema ġens kbir hemm li għandu allat qrib tiegħu l-mod kif Jehovah Alla tagħna hu fis-sejħat kollha tagħna li nagħmlulu?”−Dewteronomju 4:5-7.
18. Liema libertajiet kbar jiġu saħansitra issa għand dawk li qegħdin jaqdu lil Alla?
18 Illum il-miljuni li jqimu lil Jehovah ukoll jinsabu fuq il-għatba taʼ art imwiegħda—id-dinja l-ġdida. Peress li huma jobdu l-liġijiet t’Alla, għandhom lilu qrib tagħhom u jispikkaw mill-popli l-oħrajn kollha. Diġa Alla ħelishom minn ideat reliġjużi foloz, mir-razziżmu, mill-użu illegali tad-drogi, min-nazzjonaliżmu, mill-gwerer, u mill-epidemija dinjija taʼ mard traxmess sesswalment. Barra minn dan, hu għaqqadhom fi fratellanza internazzjonali li ma titkissirx taʼ mħabba. (Ġwann 13:35) M’humiex inkwetati dwar il-futur imma “jgħajtu bil-ferħ minħabba l-kundizzjoni tajba tal-qalb.” (Isaija 65:14) X’libertajiet kbar igawdu saħansitra minn issa billi jaqdu lil Alla bħala Hakkiem!—Atti 5:29, 32; 2 Korintin 4:7; 1 Ġwann 5:3.
Jilliberaw lil Oħrajn Minn Twemmin Falz
19, 20. In-nies kif inhuma meħlusin permezz tat-tagħlim tal-Bibbja dwar il-kundizzjoni tal-mejtin?
19 Ħafna li lilhom ix-Xhieda taʼ Jehovah jippridkawlhom ukoll qegħdin jibdew isibu dawn il-libertàjiet. Per eżempju, f’pajjiżi fejn il-qima tal-antenati tiġi pprattikata ix-Xhieda taʼ Jehovah qegħdin jagħmlu magħruf lil oħrajn li l-mejtin m’humiex ħajjin x’imkien u ma jistgħu jagħmlu ebda ħsara lill-ħajjin. Ix-Xhieda jirreferu għal Ekkleżjasti 9:5, li jistqarr li “l-ħajjin huma konxji li se jmutu; imma nkwantu għall-mejtin, m’huma konxji taʼ xejn affattu.” Huma jirreferu wkoll għal Salm 146:4, li jgħid li meta bniedem imut “hu jerġaʼ lura lejn artu; f’dak il-jum ħsibijietu jgħibu.” Mela l-Bibbja turi li m’hemm ebda spirtu bħal fatat jew ruħ immortali biex twettaq fejqan jew biex tbeżżaʼ lill-ħajjin. M’hemmx bżonn, għalhekk, li taħli flus maqlugħin bit-tbatija biex tixtri sserviżzi taʼ sħaħar jew qassisin.
20 Għarfien eżatt tal-Bibbja bħal dan jillibera lin-nies mit-tagħlim falz tan-nar tal-infern u l-purgatorju. Meta n-nies jitgħallmu l-verità tal-Bibbja li l-mejtin m’huma konxji taʼ xejn affattu, bħal li kieku qegħdin f’raqda fonda, huma ma jinkwetawx iżjed dwar x’ġara mill-maħbubin tagħhom li mietu. Minflok, huma jħarsu ’l quddiem lejn iż-żmien meraviljuż li tkellem dwaru l-appostlu Pawlu meta qal: “Se jkun hemm irxoxt kemm tat-twajbin u kemm taʼ dawk li m’humiex twajbin.”−Atti 24:15.
21. Min bla dubju se jkun inkluż fost dawk irxoxtati, u x’se tkun x’aktarx ir-reazzjoni tagħhom?
21 Fl-irxoxt il-mejtin se jiġu lura għall-ħajja fuq art meħlusa għal dejjem mill-mewt li writna minn Adam. Bla dubju dawk irxoxtati se jinkludu tfal issagrifikati lil allat Kangħaniti, bħalma hu Molek, irġiel żgħażagħ issagrifikati lil allat tal-Azteki, u miljuni bla għadd issagrifikati lill-alla tal-gwerra. Kemm se jkunu mistagħġbin u ferħanin dawk li darba kienu vittmi taʼ twemmin falz! Uħud irxoxtati bħal dawn jistgħu mbagħad jiddikjaraw bil-ferħ: “Fejn huma l-ingiegeż tiegħek, o Mewt? Fejn hi l-qerda tiegħek, O Xeol?”−Ħosea 13:14.
Fittex lil Jehovah
22. Jekk irridu ngħixu fid-dinja ġdida t’Alla x’għandna bżonn inżommu f’moħħna?
22 Trid int tgħix fid-dinja ġdida taʼ tjieba t’Alla, fejn se jkun hemm libertà vera? Jekk iva, allura daħħal f’qalbek il-kelmiet fit-2 Kronaki 15:2: “Jehovah qiegħed magħkom sakemm turu li qegħdin miegħu; u jekk tfittxuh, hu se jħalli lilu nnifsu jinstab minnkom, imma jekk titilquh ħu se jitlaqkom.” U żomm f’moħħok li l-isforzi sinċieri tiegħek biex titgħallem dwar Alla u biex togħgbu m’humiex se jiġu njorati. Ebrej 11:6 igħid li Alla hu “dak li jħallas lil dawk li qed ifittxuh bil-ħeġġa.” U Rumani 10:11 igħid: “Ebda wieħed li jserraħ il-fidi tiegħu fuqu ma se joħrog diżappuntat.”
23. Għala għandna nagħtu merħba lid-dinja ġdida taʼ libertà t’Alla?
23 Preċiż fuq ix-xefaq hemm id-dinja ġdida tal-libertà vera t’Alla. Hemmhekk “il-ħolqien innifsu wkoll se jinħeles mill-jasar għall-korruzzjoni u jkollu l-libertà glorjuża tat-tfal t’Alla.” U “[Alla] se jimsaħ kull demgħa minn għajnejhom, u l-mewt ma tkunx iżjed, u la l-għali u la l-biki u lanqas l-ugigħ ma jkunu iżjed.” (Rumani 8:21; Rivelazzjoni 21:4) Imbagħad il-qaddejja kollha taʼ Jehovah se jgħollu rjushom ’il fuq u bil-ferħ jagħtu merħba lid-dinja ġdida taʼ libertà t’Alla billi jesklamaw, ‘Grazzi, Jehovah, għal-libertà vera sa fl-aħħar!’
Kif Twieġeb Int?
◻ Jehovah kif wera l-abbiltà tiegħu li jeħles lill-poplu tiegħu?
◻ Liema libertajiet meraviljużi se jkun hemm fid-dinja ġdida t’Alla?
◻ Jehovah kif qiegħed igħallem lin-nies għall-ħajja?
◻ X’inhuma xi libertajiet lin-nies t’Alla jgawdu saħansitra issa billi jaqdu lil Jehovah?
[Stampa f’paġna 9]
Jehovah wera s-superiorità tiegħu fuq l-allat foloz tal-Eġittu, billi ħeles lill-adoraturi tiegħu
[Stampi f’paġni 10, 11]
Illum, il-qaddejja veri t’Alla huma identifikati billi jwettqu x-xogħol edukattiv globali tiegħu u billi jġorru lil ismu