Ferħ Globali

“ĦARES! Il-​qaddejja tiegħi stess se jgħajtu bil-​ferħ minħabba fil-​qagħda tajba tal-​qalb.” (Isaija 65:14) Hekk qal Jehovah permezz tal-​profeta tiegħu Isaija, u xi twettieq tal-​għaġeb il-​kliem tiegħu qed ikollu fost ix-​Xhieda taʼ Jehovah! Minfejn jiġi l-​ferħ taʼ qalb tagħhom? Mill-​qima magħquda tagħhom lil Alla Jehovah. Hu “Alla l-​ferħan,” u dawk li jqimuh huma “ferħanin f’Jehovah.” (1 Timotew 1:11; Żakkarija 10:7) Din id-​devozzjoni ferriħija tgħaqqadhom f’ġens wieħed hekk kif flimkien huma jippridkaw l-​aħbar tajba tas-​Saltna u jgħollu għajta globali taʼ tifħir lil Alla tagħhom.—Rivelazzjoni 7:9, 10.

“Ferh Li Ħadd Ma Jistaʼ Jeħoduli”

Tabilħaqq, li jippubblikaw l-​isem u s-​Saltna t’Alla huwa sors taʼ ferħ kostanti għax-​Xhieda taʼ Jehovah. (Mark 13:10) Huma jwieġbu għall-​kliem tas-​salmista: “Ftaħar fl-​isem qaddis tiegħu. Ħalli l-​qalb taʼ dawk li qed ifittxu lil Jehovah tifraħ.”—Salm 105:3.

Spiss, huma jegħlbu ostakli biex jagħmlu dan. Fi Spanja, Isidro ddedika lilu nnifsu lil Jehovah, u hu ried li jitkellem maʼ oħrajn Dwaru. Imma hu jsuq trakk u ma tantx għandu ħin liberu, billi jagħmel vjaġġi twal bil-​lejl u jorqod matul il-​jum. Isidro ried jagħti xiehda lil sewwieqa oħra tat-​trakk, imma kif setaʼ jagħmlu dan?

Hu ffittja fit-​trakk tiegħu radju CB (citizens band) li setaʼ juża biex jitkellem mas-​sewwieqa l-​oħra. Hu malajr skopra frekwenza li ma tantx tintuża, 13, u ddeċieda li japprofitta ruħu minnha. Naturalment, meta hu ssuġġerixxa għall-​ewwel darba lil sewwieqa oħra biex jitkellmu dwar il-​Bibbja minn fuq ir-​radju CB, ir-​rispons kien negattiv mhux ħażin. Imma xi wħud semgħu. Il-​kelma nxterdet, u iktar u iktar minn dawk is-​sewwieqa Spanjoli bdew jiftħu r-​radju fuq frekwenza 13. Dan l-​aħħar, Isidro sar jaf li tal-​inqas wieħed mis-​sewwieqa qed jieħu l-​passi biex ikompli miexi ’l quddiem fl-​istudju tiegħu tal-​Bibbja.

Fl-Italja wieħed raġel semaʼ dwar ix-​Xhieda taʼ Jehovah permezz taʼ konversazzjoni li kellu fuq xarabank. Martu ltaqgħet magħhom permezz taʼ ħabiba. It-​tnejn li huma studjaw il-​Bibbja u kienu ħerqanin li jaqsmu maʼ oħrajn dak li kienu tgħallmu. Tant kienu ħerqanin li r-​raġel irrifjuta promozzjoni fid-​ditta tiegħu u l-​mara telqet minn impjieg b’salarju tajjeb biex ikunu jistgħu jqattgħu iktar ħin igħidu lil oħrajn l-​aħbar tajba tas-​Saltna. Sewa xi ħaġa dan? Iva. Ir-​raġel igħid: “Mindu sirna nafu l-​verità, marti u jien kellna l-​ferħ taʼ li ngħinu 20 persuna jaslu għal għarfien eżatt tal-​għan t’Alla. Meta jasal fil-​għaxija, u jien niġi lura d-​dar wara ġurnata fis-​servizz taʼ Jehovah, jien inħossni għajjien, huwa veru. Imma nkun ferħan, u niżżi ħajr lil Jehovah talli tani ferħ li ħadd ma jistaʼ jeħoduli.”

“Sal-​Iktar Parti ’l Bogħod tal-​Art”

Dawk li qegħdin fil-​ġens ferrieħi t’Alla juru żelu simili huma fejn huma, saħansitra fl-​“iktar parti ’l bogħod tal-​art.” (Atti 1:8) Ftit postijiet huma iktar ’il bogħod mit-​Tramuntana taʼ Greenland. Iżda, saħansitra hemmhekk, 200 mil ’il fuq miċ-​Ċirku Artiku, hemm il-​kongregazzjoni żgħira taʼ Ilulissat, magħmula minn 19-il individwu. Huma jippridkaw l-​istess aħbar tajba bħal dik il-​koppja Taljana, u ħadu gost ħafna s-​sena l-​oħra meta raw sebaʼ abitanti taʼ Greenland jiġu mgħammdin b’simbolu tad-​dedikazzjoni tagħhom lejn Jehovah.

Ħafna eluf taʼ mili ’l bogħod minn Greenland, fuq il-​gżira sub-tropikali taʼ Mauritius fl-​Oċejan Indjan, Anjinee għandha l-​istess ferħ. L-​affarijiet kienu għall-​ewwel diffiċli għal Anjinee. Fil-​Mauritius, li tattendi l-​laqgħat Kristjani u li tippriedka pubblikament dwar Alla m’humiex meqjusin bħala attivitajiet xierqa għal tfajla mhux miżżewġa taʼ oriġini Indjana Indu. Imma Anjinee pperseverat. Issa, disaʼ snin wara li bdiet il-​korsa Kristjana tagħha, xi ftit mill-​qraba tagħha qegħdin ukoll jistudjaw il-​Bibbja.

F’konnessjoni maʼ Anjinee għandu wkoll jissemma Emilio, fuq in-​naħa l-​oħra tad-​dinja fil-​Honduras. Emilio semaʼ lil xi ħaddiema sħabu jiddiskutu l-​Bibbja waqt ix-​xogħol u talab li jiġi inkluż. Hu ma kienx jaf jaqra imma ħa pjaċir jismaʼ meta nqraw xi skritturi tal-​Bibbja. Hekk kif il-​verità Kristjana ppenetrat f’qalbu Emilio telaq l-​istil taʼ ħajja immorali tiegħu u waqaf mix-​xorb żejjed. Ix-​Xhieda taʼ Jehovah għallmuh jaqra u jikteb, u issa huwa ministru fil-​ġens ferrieħi t’Alla.

Eluf taʼ mili lejn il-​Majjistral taʼ Honduras, omm Eskimiża fl-​Alaska tgħallmet l-​istess verità Kristjana. Din is-​sinjura għexet f’raħal iżolat ferm, u l-​uniku kuntatt tagħha max-​Xhieda taʼ Jehovah kien permezz tal-​posta. Mela hi studjat bil-​posta, staqsiet il-​mistoqsijiet tagħha bil-​posta, u qiegħda issa taqsam b’mod żeluż dak li taf mal-​ġirien tagħha. Eżempji bħal dawn jistgħu jiġu mmoltiplikati kważi indefinittivament. Madwar il-​globu kollu, uħud taʼ qalb ġwejda qed jiġu biex ‘jaqdu lil Jehovah bil-​ferħ.’—Salm 100:2.

“Għandkom l-​Imħabba Bejnietkom”

Ħaġa waħda li tiġbed lil dawn kollha hija l-​imħabba li teżisti fil-​ġens ferrieħi t’Alla. Qal Ġesù: “B’dan kulħadd se jkun jaf li intom dixxipli tiegħi, jekk għandkom l-​imħabba bejnietkom.” (Ġwann 13:36) L-​imħabba Kristjana tidher fil-​ħajjiet minn jum għal jum taʼ dawn il-​Kristjani ġenwini, u speċjalment fi żminijiet taʼ diżastru.

F’pajjiż wieħed Afrikan fejn l-​attività tax-​Xhieda taʼ Jehovah hi, sfortunatament, ipprojbita, kien hemm nixfa kbira. Għaxart elef nies mietu, u qtajja sħaħ taʼ baqar għebu. Ix-​Xhieda kif baqgħu ħajjin? Billi kielu l-​għeruq taʼ xi pjanti u sajru frott qares magħruf bħala avocado! Imma t-​tbatija tagħhom ġiet imtaffija b’mod drammatiku meta, bil-​għajnuna t’Alla, Xhieda f’pajjiżi oħra bla mistenni kisbu l-​permess biex jibagħtu 25 tunnellata taʼ provisti taʼ serħan. Tabilħaqq, minkejja l-​projbizzjoni, dawn il-​provisti ngħataw skorta militari biex tiġi żgurata l-​wasla tagħhom qawwijin u sħaħ!

Verament, dawk ix-​Xhieda Afrikani ferħu ħafna meta rċevew din il-​prova tal-​imħabba taʼ ħuthom għalihom hekk kif ġarrbu t-​twettieq tal-​kliem taʼ Isaija: “Ħares! Id Jehovah ma saritx qasira wisq li ma tistax issalva, lanqas ma widintu saret tqila wisq li ma tistax tismaʼ.”—Isaija 59:1.

Poplu taʼ Paċi

Uħud taʼ qalb ġwejda jinġibdu wkoll lejn il-​ġens ferrieħi t’Alla għaliex il-​membri tiegħu abbandunaw il-​modi taʼ gwerra taʼ din id-​dinja u ‘ħadmu sjufhom f’sikek tal-​moħriet.’ (Isaija 2:4) F’El Salvador, id-​dar taʼ raġel li qabel kien fil-​militar kienet mimlija tfakkiriet tal-​karriera militari tiegħu. Imma meta beda jistudja l-​Bibbja max-​Xhieda taʼ Jehovah, hu żviluppa interessi taʼ paċi. Eventwalment hu naddaf daru minn dak kollu li kellu x’jaqsam mal-​gwerra u b’mod żeluż ħa sehem fix-​xogħol tal-​ippridkar.

Meta forzi taʼ kontra l-​gvern ħadu l-​kontroll tar-​raħal tiegħu, hu ttieħed priġunier—b’mod evidenti xi ħadd kien kixfu bħala li qabel kien raġel militari. Hu spjega, madankollu, li ma kienx għadu suldat imma wieħed mix-​Xhieda taʼ Jehovah. Il-​gwerilli akkużawh li kellu l-​armi fid-​dar tiegħu, imma tfitxija rrivelat li ma kienx hemm. Il-​wieħed li kien inkarigat mill-​gwerilli mbagħad staqsa lill-​ġirien dwaru. Kumment tipiku kien: “Hu sempliċement tielaʼ u nieżel fit-​triq jippriedka dwar il-​Bibbja jum wara jum.” Ir-​raġel ġie meħlus. Bla dubju, iż-​żelu tiegħu serva biex isalvalu ħajtu.

Rapport minn pajjiż Afrikan jitkellem dwar żewġ suldati li studjaw il-​Bibbja max-​Xhieda taʼ Jehovah. Wieħed kien jaqdi fl-​armata tal-​gvern, l-​ieħor iġġieled favur ir-​ribelli. Eventwalment it-​tnejn iddeċidew li ‘jaħdmu sjufhom f’sikek tal-​moħriet’ u rriżenjaw mill-​militar. Meta huma marru għal-​laqgħat Kristjani għall-​ewwel darba, is-​suldat taʼ kontra l-​gvern staqsa lill-​ieħor: “Xi trid int hawnhekk?” Hu wieġeb: “U int, xi trid int hawnhekk?” “Imbagħad,” jikkonkludi r-​rapport, “billi ħaddnu lil xulxin, qabżilhom id-​dmugħ taʼ ferħ għaliex setgħu joqogħdu flimkien fil-​paċi.” Dawn iż-​żewġ irġiel militari taʼ qabel bla dubju talbu lil Alla: “Eħlisni mill-​ħtija tad-​demm, O Alla dak Alla tas-​salvazzjoni tiegħi, biex ilsieni jistaʼ bil-​ferħ igħid dwar it-​tjieba tiegħek.”—Salm 51:14.

“Int Rajt it-​Tbatija Tiegħi”

“Jien se nkun ferħan u nithenna fil-​qalb tajba bl-​imħabba tiegħek, għaliex int rajt it-​tbatija tiegħi; int kont taf bin-​niket taʼ ruħi.” (Salm 31:7) Hekk talab is-​salmista, u ħafna llum jifirħu għaliex il-​Kelma t’Alla tgħinhom ilaħħqu mat-​tbatijiet tagħhom. Fi Franza waħda mix-​Xhieda taʼ Jehovah tikkonduċi studju maʼ mara li tbati mill-​iskizzofrenja. Din il-​mara kienet taħt kura psikjatrika għal xi żmien, imma din ma kinetx għenet. Il-​ġimgħa taʼ wara li bdiet l-​istudju tagħha, il-​psikjatra staqsa: “Tifhem int tassew dak li din il-​mara qed tispjegalek mill-​Bibbja?” Mela l-​ġimgħa taʼ wara, ix-​Xhud marret fl-​uffiċċju tiegħu u studjat il-​Bibbja mas-​sinjura fil-​preżenza tiegħu.

Wara l-​istudju, il-​psikjatra qal lix-​Xhud: “Matul is-​snin jien ħadt interess fir-​reliġjonijiet tal-​pazjenti tiegħi, imma innotajt li ebda appoġġ veru ma kien offrut minn kwalunkwe reliġjon. Fil-​każ tiegħek, iżda, l-​affarijiet huma differenti. Sinjura P— tiġi darbtejn fil-​ġimgħa għal konsulta, u hi tħallasni għal dan. Iżda, bit-​tagħlim u l-​parir tajjeb tal-​Bibbja tiegħek, int qed tagħmel xogħol aħjar bla ħlas. Hi qed tagħmel progress tajjeb. Ibqaʼ sejra hekk, u jien nassigurak dwar il-​kooperazzjoni sħiħa tiegħi jekk qatt tiġi bżonnha.”

Il-Bibbja tgħid: “Henjin huma n-​nies li jafu bil-​għajjat taʼ ferħ. O Jehovah, fid-​dawl taʼ wiċċek huma jibqgħu mexjin. F’ismek huma qegħdin bil-​ferħ il-​jum kollu.” (Salm 89:15, 16) Kulħadd mix-​Xhieda taʼ Jehovah jaf li dan is-​salm huwa veru. Minn fommhom għajta globali taʼ ferħ tielaʼ ’l fuq għat-​tifħir taʼ Jehovah. Iktar u iktar nies qed jiġru ’l barra minn ġol-​ġnus biex ifaħħru lil Alla flimkien magħhom. Għala ma tassoċjax magħhom u ġġarrab dak il-​ferħ għalik innifsek?