Il-​Ħarsa tal-​Bibbja

F’PAJJIŻ taʼ l-​Asja, folla qed tiċċelebra festa li tonora lill-​ispirti. Il-​festa tilħaq il-​quċċata tagħha meta żewġ nisa jintgħażlu għal ċerimonja li fiha jiġu maħkumin mill-​ispirti. Għajnejhom jibdew jinqalbu, u mbagħad in-​nisa jibdew jirtogħdu minn fuq s’isfel bħallikieku ħadu xokk bl-​elettriku.

Fi Puerto Rico, wieħed li jikkomunika maʼ l-​ispirti (santero) jipprova jikkuntattja spirtu li jissejjaħ Changó, l-​alla tar-​ragħad. Dak li jikkomunika maʼ l-​ispirti jiddeskrivi xi viżjonijiet, u kulmin ikun fil-​kamra jibda jirtogħod bħallikieku kien maħkum mid-​demonji.

Huwa komuni f’ħafna pajjiżi li n-​nies jinvolvu ruħhom fl-​okkult. It-​twemmin fl-​affarijiet sopranaturali qed isir iktar popolari, u n-​nies qed jinġibdu dejjem iktar lejh. Il-​kotba, il-​logħob, il-​programmi televiżivi, u l-​films li fihom id-​demonji, is-​sħarijiet, u l-​fenomeni sopranaturali saru iktar komuni minn qatt qabel.

Madankollu, il-​Bibbja tgħallem li l-​involviment fi kwalunkwe ħaġa konnessa maʼ l-​okkult fil-​fatt huwa spiritiżmu. L-​ispiritiżmu m’huwiex divertiment innoċenti jew bla ħsara. Ma tkunx sempliċement qed tesplora dak li ma tafx. Dan hu kuntatt mad-​demonji, anġli mill-​agħar li rribellaw kontra Alla.—Rivelazzjoni 12:9, 12.

Fir-realtà, l-​ispiritiżmu jagħmel għad-​demonji dak li l-​lixka tagħmel għas-​sajjieda. Is-​sajjied juża diversi lixki biex jaqbad tipi differenti taʼ ħut. B’mod simili, l-​ispirti mill-​agħar jużaw forom differenti taʼ spiritiżmu biex jinfluwenzaw lil kull tip taʼ nies. Il-​mexxej tad-​demonji jissemma bħala “l-​alla taʼ din is-​sistema” mill-​agħar. Hu jirnexxilu jagħmi l-​imħuħ taʼ dawk li ma jemmnux biex ma jarawx il-​verità tal-​Kelma t’Alla u l-​iskop tiegħu.—2 Korintin 4:4.

Għal Xiex Iwassal l-​Ispiritiżmu

Il-​mira tal-​ħlejjaq spirti mill-​agħar hi sempliċement din: Huma jridu jaljenawna u jqarrqu bina ħalli ma niżviluppawx relazzjoni persunali mal-​Ħallieq tagħna. Huma jinfluwenzaw lin-​nies, kemm jekk ikunu jafu u kemm jekk le, biex ma jobdux il-​ħtiġijiet sewwa t’Alla. Għalhekk, l-​ispiritiżmu jwassal għad-​diżapprovazzjoni divina, in-​nuqqas taʼ tama, u maż-​żmien għall-​qerda.—Rivelazzjoni 21:8.

Luis, minn Puerto Rico, jgħid: “Il-​familja tiegħi kienet involuta fl-​ispiritiżmu minn meta kont tifel. Dan kien parti mir-​reliġjon tal-​familja tagħna u minn ħajjitna. Jien kont naħseb li l-​abbiltà tiegħi biex inbassar il-​futur u naqra l-​karti tat-​tarot kienet naturali. Spiss kont naqtaʼ n-​numri tal-​lotterija u ngħin lill-​oħrajn jirbħu l-​flus. Dawn l-​hekk imsejħin doni ma kienu xejn iktar ħlief aljenazzjonijiet li żammewni milli nikseb għarfien Bibliku u milli nibni relazzjoni m’Alla.”—Ġwanni 17:3.

Ħafna jħossu li min jinvolvi ruħu fid-​dinja taʼ l-​ispiritiżmu ma jiġrilux ħsara, anzi jibbenefika. Xi nies iħossu li ċerti spirti huma dħulin jew isostnu li l-​prattiċi spiritistiċi jistgħu jagħtuhom fehma, għana, jew ferħ akbar. Imma l-​verità hi eżatt bil-​kontra. “Dejjem ikun hemm il-​konsegwenzi,” jgħid Luis.

Raġel żagħżugħ jismu Chad beda jesperjenza dehriet tal-​biżaʼ u t-​turment taʼ li jiġi mqajjem kulmeta jorqod. “Id-​demonji bdew ikidduni u jittorturawni kull lejl,” jgħid hu. Kif nistgħu niġu protetti kontra attakki bħal dawn?

Kif Niksbu Protezzjoni

Għandna bżonn nevitaw kull ħaġa konnessa maʼ l-​ispiritiżmu biex nipproteġu lilna nfusna. (Galatin 5:19-21) Għalhekk, Alla Ġeħova jidderieġi lill-​qaddejja tiegħu biex jevitaw il-​prattiċi li ġejjin: “M’għandux jinstab fik xi ħadd li . . . jeħber, min jipprattika l-​maġija jew xi ħadd li jfittex sinjali li bihom jaqra l-​futur jew saħħâr, jew min jagħmel xi magħmul fuq ħaddieħor jew xi ħadd li jikkonsulta maʼ medjum taʼ l-​ispirti jew min xogħlu hu li jbassar il-​ġrajjiet jew xi ħadd li jistħarreġ dwar il-​mejtin. Għax kulmin jagħmel dawn l-​affarijiet ikun xi ħaġa mistkerrha għal Ġeħova.”—Dewteronomju 18:10-12.

Fi qbil maʼ dan il-​kliem, ħafna ħadu passi biex jipproteġu lilhom infushom billi rmew kwalunkwe ktieb jew oġġett ieħor konness maʼ l-​ispiritiżmu. Ken, li ħeles mill-​ispiritiżmu, jgħid, “Iċċekkjajt l-​affarijiet kollha tiegħi u qridt kulma ħassejt li kien ħażin.”—Ara Atti 19:19, 20.

L-akbar protezzjoni hi li tiżviluppa relazzjoni persunali maʼ l-​Alla l-​veru, Ġeħova. Innota x’għandna nagħmlu skond Ġakbu 4:7, 8: “Għalhekk, issottomettu ruħkom lejn Alla; imma opponu lix-​Xitan, u hu jaħrab minnkom. Ersqu qrib lejn Alla, u hu jersaq qrib lejkom. Naddfu idejkom, midinbin, u saffu qlubkom, intom l-​indeċiżi.”

Alla Ġeħova jgħallem u jipproteġi lil dawk li huma qrib tiegħu. Huma ‘jafuhom il-​pjanijiet taʼ Satana’ u ma jiġux imqarrqin minn dehriet foloz. (2 Korintin 2:11; 11:14) Ukoll, Ġeħova jistaʼ kollox. Meta dak li jkun isejjaħ lil Ġeħova bil-​fidi, hu jeħilsu mill-​attakki taʼ l-​ispirti mill-​agħar. Chad, li ġie kwotat qabel, qal, “Dawn waqfu minħabba li kont naf minn liema sors kienu ġejjin l-​attakki u għax sejjaħt lil Alla Ġeħova biex jipproteġini mill-​influwenza tagħhom.”—Salm 91:1, 2.

Jidher ċar li wħud taʼ qalb onestà jistgħu jithennew minħabba l-​protezzjoni t’Alla issa u minħabba li jirrealizzaw li dalwaqt id-​demonji u kulmin hu influwenzat minnhom se jinqered. Immaġina l-​ferħ u l-​paċi li se jkunu mifruxin fuq l-​art meta l-​umanità tkun meħlusa mill-​effetti taʼ l-​ispiritiżmu!—Isaija 11:9; Rivelazzjoni 22:15.

QATT ĦSIBT DWAR DAN?

◼ Liema prattiċi spiritistiċi għandhom jevitaw il-​Kristjani? —Dewteronomju 18:10-12; Rivelazzjoni 21:8.

◼ Min jinkuraġġixxi l-​ispiritiżmu?—2 Korintin 2:11; 11:14; Rivelazzjoni 12:9, 12.

◼ Kif nistgħu nipproteġu lilna nfusna mill-​ispirti mill-​agħar?—Ġakbu 4:7, 8.

[Stampa f’paġna 14]

Fir-​realtà, l-​ispiritiżmu jagħmel għad-​demonji dak li l-​lixka tagħmel għas-​sajjieda