Immaġina r-Rakkonti tal-Bibbja

Il-Bibbja fiha ħafna rakkonti li ġraw u li jistgħu jgħallmuna ħafna affarijiet importanti. Jekk nipprovaw nimmaġinaw dawn ir-rakkonti, se nifhmu aħjar dak li naqraw u nibbenefikaw minnu. Dawn huma xi ideat li tistaʼ tagħmel li jgħinuk timmaġina dak li tkun qed taqra.

• Aqra b’leħen għoli. Li taqra b’leħen għoli jistaʼ jgħinek timmaġina iktar x’kien qed jiġri. Meta taqraw il-Bibbja bħala familja, jistaʼ jgħinkom timmaġinaw x’kien qed jiġri jekk kull persuna taqra karattru differenti.

• Poġġi lilek innifsek fir-rakkont. Ipprova ifhem x’kienu qed jaħsbu u jħossu l-karattri fir-rakkont. Pereżempju saqsi lilek innifsek: ‘Il-persuna għala tkellmet u aġixxiet b’dak il-mod? Kieku jien kont f’dik is-sitwazzjoni x’kont naħseb u kif kont inħossni?’

• Pinġi. Li tpinġi dak li tkun qed taqra jistaʼ jgħinek timmaġina u tiftakar l-istorja iktar, anki jekk ma tafx tpinġi ħafna.