Kaxxa għall-​Mistoqsija

◼ Għala hemm bżonn l-​għaqal meta niġu biex nużaw kollegament bit-​telefon għal-​laqgħat tal-​kongregazzjoni?

Ħafna kongregazzjonijiet ikollhom individwi li kultant ma jkunux jistgħu jattendu l-​laqgħat tal-​kongregazzjoni fis-​Sala tas-​Saltna minħabba mard jew ċirkustanzi oħrajn li ma jistgħux jiġu evitati. Għalhekk, saru arranġamenti biex dawn l-​uħud ikunu jistgħu jisimgħu l-​laqgħa mid-​dar permezz taʼ kollegament bit-​telefon. Hemm bżonn l-​għaqal u l-​organizzar bir-​reqqa biex l-​aħwa responsabbli jkunu ċerti li dan il-​provvediment taʼ mħabba jintuża minn dawk li tassew għandhom bżonnu. Għalhekk, l-​anzjani li jieħdu ħsieb arranġament bħal dan għandhom jorganizzaw l-​użu tiegħu u jiċċekkjawh ħalli jaraw li “jsir kollox bid-​deċenza u bl-​ordni.”—1 Kor. 14:40.

L-anzjani se jaraw li tingħata prijorità lil pubblikaturi fil-​kongregazzjoni li għandhom mard kroniku jew xi tip ieħor taʼ nuqqas taʼ saħħa jew li minħabba xi raġunijiet oħrajn ma jistgħux joħorġu mid-​dar. Pubblikatur li jkun temporanjament marid jew diżabilitat, jew student tal-​Bibbja progressiv li ma jistax joħroġ mid-​dar, jistaʼ bl-​istess mod jibbenefika minn dan il-​provvediment u jiġi magħdud mal-​attendenza. Meta ma jkunx hemm biżżejjed linji telefoniċi biex jintlaħaq kull min tassew għandu bżonn l-​arranġament, forsi jistgħu jsiru arranġamenti oħrajn bħal li jiġi provdut rekording tal-​laqgħa.

M’għandniex xi ngħidu, xejn ma jistaʼ jitqabbel mal-​ġid li niksbu meta nkunu preżenti fil-​laqgħat tagħna. Meta nissieħbu fis-​Sala maʼ ħutna, aħna “ninkuraġġixxu lil xulxin” u l-​ġodda jiġu megħjunin jifhmu aħjar kemm hu importanti li jattendu. Meta nkunu preżenti fil-​laqgħat tagħna, niksbu iktar ġid mit-​turijiet li jkun hemm, l-​anzjani jkunu jistgħu jgħinuna personalment, u aħna nesperjenzaw personalment l-​imħabba li tqawwi l-​qalb tal-​fratellanza tagħna. Kemm huma minnhom is-​sentimenti taʼ waħda oħt anzjana li, wara li xi ħadd għannaqha hi u ħierġa mis-​Sala tas-​Saltna, qalet: “Din ma tistgħux tagħtuhieli minn fuq it-​telefon!”—Rum. 1:11, 12.

Bħal Anna li “qatt ma kienet tonqos mit-​tempju,” illum, ħafna wħud imdaħħlin fiż-​żmien ikunu preżenti regolarment għal-​laqgħat Kristjani sakemm jippermettulhom saħħithom u ċ-​ċirkustanzi tagħhom. (Lq. 2:36, 37) Waqt li jużaw il-​kollegament bit-​telefon meta jkun hemm bżonn, huma ma jħarsux lejn dan l-​arranġament bħala alternattiva konvenjenti biex ma jattendux il-​laqgħat fis-​Sala tas-​Saltna. Biex nimitaw l-​eżempju mill-​aqwa tagħhom, jalla nkomplu nitgħaxxqu f’li nagħmlu sforz biex inkunu preżenti personalment għal-​laqgħat tagħna hekk kif inqimu lill-​Alla l-​kbir tagħna, Ġeħova.—Salm 95:1-3, 6; 122:1.