Il-Jum taʼ Ġeħova Jinsab fil-Qrib
1 Il-Kristjani jixxennqu għall-jum li ġej taʼ Ġeħova, li permezz tiegħu se tinqered din is-sistema preżenti u se jwassal għal dinja ġdida mimlija ġustizzja. (2 Pt. 3:12, 13) Ladarba ma nafux eżatt meta se jiġi dak il-jum, irridu nibqgħu għassa u ngħinu lil oħrajn jagħmlu l-istess. (Eżek. 33:7-9; Mt. 24:42-44) Jekk nimmeditaw fuq il-Kelma profetika t’Alla se nsaħħu l-konvinzjoni tagħna li “l-Jum il-kbir tal-Mulej fil-qrib!”—Sof. 1:14.
2 Il-Ħakmiet tal-Qawwiet Dinjin: Bħalma hemm imniżżel f’Rivelazzjoni 17:9-11, l-appostlu Ġwanni jsemmi “sebaʼ slaten,” li jirrappreżentaw is-sebaʼ qawwiet dinjin li ħakmu wara xulxin. Ġwanni jirreferi wkoll għat-“tmien wieħed,” li jirrappreżenta l-Ġnus Magħquda. Għandna nistennew li naraw iktar qawwiet dinjin fix-xena dinjija? Le, għax il-profezija tgħid li t-tmien sultan ‘sejjer għall-qerda,’ u wara dan ma jissemma ebda sultan li se jaħkem fuq l-art. Ma tgħinikx din il-profezija tara fejn aħna fil-medda taż-żminijiet?
3 Danjel 2:31-45 jgħinna nifhmu l-jum li riesaq taʼ Ġeħova. F’dik il-profezija, l-istatwa kbira li Nabukodonosor ra fil-ħolma tiegħu tirrappreżenta l-qawwiet dinjin li ħakmu wara xulxin. Dawn il-qawwiet kollha diġà dehru. Illum il-ġurnata aħna fejn ninsabu fl-istorja? Ninsabu fil-perijodu li hu ssimbolizzat mis-saqajn taʼ l-istatwa. Il-profezija tiddeskrivi b’mod ħaj dak li se jiġri dalwaqt. Il-ħakma umana se tinqered għalkollox u se tagħmel il-wisaʼ għal “saltna li ma tinqered qatt.” Tistaʼ tinnota kif dan juri li l-jum taʼ Ġeħova hu fil-qrib?
4 Iktar Evidenza: Aħna qed naraw iktar evidenza li l-jum taʼ Ġeħova hu fil-qrib. Qed naraw it-twettiq taʼ dak li l-appostlu Pawlu bassar dwar il-karatteristiċi tan-nies “fl-aħħar jiem.” (2 Tim. 3:1-5) U aħna qed nieħdu sehem f’xiehda globali li trid tingħata qabel jiġi t-tmiem. (Mt. 24:14) Jalla l-ministeru pubbliku tagħna jkompli jirrifletti l-urġenza taʼ l-aħbar taʼ l-anġlu: “Ibżgħu minn Alla u agħtuh glorja, għax waslet is-siegħa biex jagħmel il-ġudizzju.”—Riv. 14:6, 7.