Ittra Mingħand il-Ġemgħa li Tiggverna
Għeżież Ħutna:
KEMM nieħdu gost niktbulkom! Infaħħrukom għas-sagrifiċċju persunali u għall-imħabba li qed tkomplu turu. Se taraw mill-paġni tal-Yearbook taʼ din is-sena li sar ħafna ġid matul l-aħħar sena taʼ servizz. Għal darb’oħra, qattajna iktar minn biljun siegħa fix-xogħol taʼ l-ippridkar u t-tagħlim, inħeġġu lin-nies direttament biex jersqu qrib taʼ Jehovah. M’aħniex onorati li qed naħdmu bi sħab maʼ dak Alla glorjuż, Missierna tas-sema?—1 Kor. 3:9.
Hekk kif inħarsu lejn ix-xogħol li hemm quddiemna, ninsabu fiduċjużi li intom se tkomplu timitaw iż-żelu u l-fidi tal-qaddejja t’Alla, bħalma hu spjegat fil-Bibbja. Per eżempju, l-appostlu Pawlu kien ħerqan li jkun effettiv kemm jistaʼ jkun ħalli javanza l-interessi tas-Saltna. Jidher ċar li kien waqt l-aħħar sena tiegħu f’Efesu li kiteb l-ewwel ittra lill-kongregazzjoni Kristjana f’Korintu. Hu kiteb dwar il-pjanijiet immedjati tiegħu: “Nieqaf Efesu sa Għid il-Ħamsin. Hemm bieb kbir miftuħ għalija, fejn nistaʼ naħdem sewwa, għad li hemm ħafna kontra tiegħi.”—1 Kor. 16:8, 9.
Pawlu kien ippjana li jivvjaġġa lejn il-Maċedonja u Korintu. Madankollu, hu għaraf li kellu opportunità biex jagħmel xogħol siewi billi jibqaʼ f’Efesu għal xi żmien. Pawlu kien flessibbli; ra sitwazzjoni favorevoli li fiha setaʼ javanza l-interessi tas-Saltna preċiż minfejn kien, u allura rranġa l-iskeda tiegħu sabiex ikun jistaʼ jagħmel dan. Infetaħlu bieb kbir li jwassal għall-attività, u Pawlu kien ħerqan biex jieħu vantaġġ mill-opportunità li jidħol minnu.
Dan kien jirrikjedi ħafna xogħol—kemm li jippriedka l-aħbar tajba kif ukoll li jinkuraġġixxi lill-kongregazzjoni t’Efesu. Iktar tard, lill-irġiel ixjeħ tal-kongregazzjoni f’dik il-belt, Pawlu qalilhom: “Qatt ma bżajt nurikom dak li hu taʼ fejda għalikom u ngħallimkom kemm fil-beraħ u kemm fid-djar, u nwissi lil-Lhud u lill-Griegi li għandhom jindmu u jduru lejn Alla u jemmnu fil-Mulej tagħna Ġesù.”—Atti 20:20, 21.
Bl-istess mod, ħafna minnkom l-aħwa tant għeżież ħadtu vantaġġ mill-opportunitajiet li nfetħu quddiemkom. Bħala medja, matul l-aħħar sena taʼ servizz, 798,938 minn ħutna rnexxielhom jirranġaw iċ-ċirkustanzi tagħhom sabiex jieħdu sehem f’xi forma taʼ ministeru bħala pijunieri. Xi wħud minnkom ivvjaġġajtu sa truf l-art sabiex taqdu bħala missjunarji. Qed ixxerrdu l-aħbar tajba u tibnu l-kongregazzjonijiet b’mod żeluż. Oħrajn minnkom tgħallimtu lingwa oħra sabiex tkunu tistgħu tgħinu lin-nies taʼ lingwa barranija li jgħixu fil-qrib. U jerġaʼ oħrajn irranġaw iċ-ċirkustanzi tagħhom biex jaħdmu f’territorju li m’huwiex assenjat jew biex jaqdu fejn il-bżonn huwa akbar. Xi wħud saħansitra sabu li nfetħilhom bieb kbir t’attività fl-iskola, fuq ix-xogħol, jew f’sitwazzjonijiet oħrajn fejn setgħet tingħata xiehda effettiva, bħal per eżempju bit-telefon. Esperjenzi madwar id-dinja jixhdu li n-nies t’Alla, kbar u żgħar, qed ifittxu bil-ħerqa u jsibu opportunitajiet biex jagħtu l-għarfien tal-verità lin-nies taʼ kullimkien.
Kunu żguri li Jehovah jara l-isforzi tagħkom u verament japprezzahom. Il-Bibbja tgħid: “Għax Alla m’hux se jkun hekk inġust li jinsa dak li intom għamiltu u l-imħabba li wrejtu lejn ismu.” (Lhud 6:10) Ibqgħu attenti għal opportunitajiet li jħallukom tavanzaw il-qima pura. Xi wħud minnkom għandkom mnejn tistgħu żżidu fil-ministeru tagħkom. Ilkoll kemm aħna nistgħu nistinkaw biex nagħmlu l-ministeru tagħna iktar effettiv.
L-inkarigu tagħna taʼ l-ippridkar ma nwettquhx mingħajr oppożizzjoni. Ftakru li wara li Pawlu tkellem dwar bieb kbir t’attività li kien infetaħlu, hu kiteb: “Hemm ħafna kontra tiegħi.” Għal Pawlu, dawk li kienu kontrih kienu kemm Lhud kif ukoll Ġentili, uħud li attakkawh fil-beraħ u oħrajn li kkonfoffaw kontrih minn taħt.—Atti 19:24-28; 20:18, 19.
Aħna niffaċċjaw sitwazzjoni simili llum. Hekk kif qegħdin noqorbu lejn il-qerda taʼ din is-sistema ħażina, nistennew li l-oppożizzjoni tiżdied. Satana huwa mimli “b’korla kbira,” u din il-korla hija mmirata b’mod speċjali kontra dawk li jaqdu ’l Alla. (Apk. 12:12) Tinsew qatt li Satana huwa “l-Prinċep tad-dinja.” Ġesù qal lid-dixxipli tiegħu: “Kieku intom kontu tad-dinja, id-dinja kienet tħobbkom bħalma tħobb dak li hu tagħha; iżda billi m’intomx tad-dinja, għax jien ħriġtkom mid-dinja, id-dinja tobgħodkom.”—Ġw. 14:30; 15:19.
Aħna determinati li ma nħallu lil ħadd idgħajjef il-fidi tagħna f’Alla jew jagħmilna inqas attivi fix-xogħol taʼ l-ippridkar. Nafu li se jibqaʼ jkun hemm min jattakkana jew jippjana xi ħaġa kontrina. Madankollu, aħna nibqgħu għaddejjin bl-aħbar tajba tas-Saltna minkejja d-diffikultajiet, fiduċjużi li Ġesù se jeqred lil Satana u lill-ġemgħat tiegħu meta Jehovah jgħid li wasal il-waqt. Dawk li jopponu ma sikktuhx lil Pawlu u lanqas m’huma se jsikktu lill-qaddejja taʼ Jehovah illum. Minkejja l-korla tax-Xitan u l-mibegħda tad-dinja, l-ispirtu taʼ Jehovah qed jaħdem b’qawwa fost il-poplu Tiegħu. Kemm fraħna meta sirna nafu li l-ammont taʼ dawk li qed jipproklamaw l-aħbar tajba laħaq il-quċċata ġdida taʼ 6,304,645!
Fit-talb tagħna nitolbu li tkomplu tieħdu vantaġġ mill-opportunitajiet biex tavanzaw l-interessi tas-Saltna meraviljuża taʼ Jehovah. Ibqgħu ċerti li bl-imħabba kollha naħsbu fikom individwalment hekk kif ninsabu weqfin “spalla maʼ spalla” fis-servizz taʼ dak Alla l-Iktar Għoli, Jehovah.—Sof. 3:9, NW.
Ħutkom,
Il-Ġemgħa li Tiggverna tax-Xhieda taʼ Jehovah