Ibbenefikajna mill-​Konvenzjonijiet “Il-​Mod taʼ Ħajja t’Alla”

¹ Ix-​xahar l-​ieħor, konna qed nippjanaw biex nattendu l-​Konvenzjoni Distrettwali għall-​1998 “Il-​Mod taʼ Ħajja t’Alla.” Issa saret memorja pjaċevoli f’pajjiżna. Aħna gawdejnieh bis-​sħiħ l-​ikel spiritwali għani li rċevejna f’din il-​laqgħa taʼ l-​għaġeb.

² L-​aspett internazzjonali tal-​konvenzjonijiet taʼ din is-​sena kien tassew eċċitanti. Sew jekk kien hemm missjunarji u delegati oħrajn minn pajjiżi barranin fejn attendejna aħna u sew jekk le, ilkoll kemm aħna smajna esperjenzi mill-​aħjar il-​Ġimgħa wara nofsinhar fil-​parti intitolata “Is-​Servizz fl-​Għalqa Missjunarja.” Kuljum kien hemm “Rapporti dwar il-​Progress tax-​Xogħol tal-​Ħsad” minn madwar id-​dinja li kienu inkuraġġanti ferm.

³ Ħarġiet Ġodda Meraviljużi: L-​aħħar taħdita tal-​Ġimgħa kienet dwar mistoqsija li numru bla għadd taʼ nies li ma jafux il-​verità ilhom jistaqsu: “Hemm Ħajja wara l-​Mewt?” Dik it-​taħdita wisq interessanti kkonkludiet bil-​ħarġa taʼ browxer ġdid, X’Jiġrilna meta Mmutu? S’issa bla dubju qrajnieh u nistgħu naraw kemm se jkun taʼ siwi biex ngħinu lin-​nies jaraw il-​verità dwar il-​kundizzjoni tal-​mejtin u f’li jfarraġ bit-​tama taʼ l-​irxoxt lil uħud li tilfu lil xi ħadd fil-​mewt.

⁴ Il-​programm tas-​Sibt wara nofsinhar spiċċa bit-​taħdita “Il-​Ħallieq​—Il-​Personalità Tiegħu u Triqatu.” Din wasslitna loġikament għall-​konklużjoni li bilfors li jeżisti Ħallieq. Biex jgħinna ngħinu lil ħaddieħor japprezzah dan il-​fatt, ħareġ il-​ktieb Is There a Creator Who Cares About You? (Hemm Ħallieq li Jimpurtah Minnek?) Għalkemm għad m’għandniex dan il-​ktieb bil-​Malti, aħna ċerti li taqblu li dan se jżidilna l-​fidi tagħna stess f’Jehovah u l-​apprezzament tagħna għall-​personalità tiegħu u għal triqatu. Il-​ktieb huwa ddisinjat speċjalment għal dawk li, għalkemm għandhom edukazzjoni għolja fi kwistjonijiet sekulari, għandu mnejn ma jemmnux f’Alla.

⁵ Riżoluzzjoni mill-​Fond taʼ Qalbna: L-​aħħar taħdita tal-​konvenzjoni enfasizzat il-​bżonn għalina lkoll li “Nibqgħu Mexjin fit-​Triq taʼ Jehovah.” Kemm kien xieraq li niddikjaraw bil-​miftuħ ir-​riżoluzzjoni dwar id-​determinazzjoni individwali tagħna li dejjem inżommu maʼ, navanzaw, u nippromwovu s-​superjorità tal-​mod taʼ ħajja t’Alla! (Is. 30:21) Kemm inbnejna spiritwalment billi attendejna l-​Konvenzjoni “Il-​Mod taʼ Ħajja t’Alla”!