Tgħallem mill-​Kelma t’Alla

Dan l-​artiklu jqajjem mistoqsijiet li forsi ġieli ħsibt dwarhom u juri fejn tistaʼ ssib it-​tweġibiet fil-​Bibbja tiegħek. Ix-​Xhieda taʼ Ġeħova jieħdu pjaċir jiddiskutu dawn it-​tweġibiet miegħek.

1. Alla għaliex ta isem lilu nnifsu?

Bla dubju, int tieħu pjaċir li jsejħulek bl-​isem persunali tiegħek minflok b’titlu, bħal pereżempju “raġel,” “sur,” “sinjura,” jew “mara.” Isem jgħin biex jiddistingwik bħala individwu. Alla jissejjaħ b’titli bħal “Mulej Sovran,” “Alla li Jistaʼ Kollox,” u “Ħallieq Grandjuż.” (Ġenesi 15:2; 17:1; Ekkleżjasti 12:1) Barra minn hekk, hu ta isem lilu nnifsu biex jgħinna nibnu relazzjoni personali miegħu. Bil-​Malti, l-​isem persunali t’Alla hu Ġeħova.—Aqra Isaija 42:8.

Għalkemm ħafna tradutturi tal-​Bibbja neħħew isem Alla u floku daħħlu termini bħal “Alla” u “Mulej,” dan l-​isem jinsab kważi 7,000 darba fil-​manuskritti Ebrajċi tal-​qedem tal-​Bibbja. B’mod ċar, Alla jrid li ismu jkun magħruf.—Aqra Isaija 12:4.

2. Għala huwa vitali li tkun taf l-​isem t’Alla?

Li tkun taf l-​isem t’Alla jfisser iktar milli sempliċement tkun taf kif tgħidu. Li tkun taf lil Alla b’ismu jfisser li jkollok relazzjoni mill-​qrib miegħu. L-​isem Ġeħova jfisser “Hu Jġiegħel li Jsir.” Din hija ċertezza li Alla se jsir dak li jkun hemm bżonn sabiex iwettaq l-​iskop tiegħu. Għalhekk, li tkun taf isem Alla jimplika li temmen li Alla jżomm il-​wegħdi tiegħu. (Salm 9:10) Il-​fidi tan-​nies li jafu u li jużaw l-​isem t’Alla tqanqalhom jafdaw fih u jpoġġu lilu l-​ewwel f’ħajjithom. Alla Ġeħova se jipproteġi lil nies bħal dawn.—Aqra Salm 91:14.

3. Alla għala jrid li ismu jkun magħruf?

Alla jrid li n-​nies ikunu jafuh b’ismu għax huwa taʼ ġid għalihom. Dan jippermettilhom isiru l-​ħbieb t’Alla, bit-​tama li jgħixu għal dejjem. Mhux taʼ b’xejn li Ġeħova jridna nagħmlu ismu magħruf!—Aqra Ġwanni 17:3; Rumani 10:13, 14.

Ġesù għamel isem Alla magħruf billi għallem lin-​nies dwar il-​modi, il-​liġijiet, u l-​wegħdi t’Alla. Illum, is-​segwaċi taʼ Ġesù jkomplu x-​xogħol taʼ li jagħmlu isem Alla magħruf mal-​ġnus kollha. Huma jagħmlu dan f’unità bħala “poplu għal ismu [isem Alla].”—Aqra Atti 15:14; Ġwanni 17:26.

4. Alla kif se jigglorifika lil ismu?

Alla Ġeħova jrid jigglorifika lil ismu għax dan ġie mżeblaħ. Pereżempju, xi nies jgħidu li l-​ħajja ma ġietx maħluqa minnu u li aħna m’għandniex bżonn nobduh. Oħrajn jgħidu li ma jimpurtahx minna u li hu responsabbli għat-​tbatija. Nies bħal dawn jitfgħu dawl ikrah fuq isem Alla. Imma mhux se jagħmlu hekk għal dejjem. Alla se jieħu azzjoni kontra dawk li jġibu diżunur fuq ismu.—Aqra Salm 83:17, 18.

Ġeħova se jigglorifika lil ismu meta Saltnatu ġġib fi tmiemhom il-​ħakmiet umani kollha u terġaʼ ġġib il-​paċi u s-​sigurtà fuq l-​umanità. (Danjel 2:44) Dalwaqt, kulħadd se jkollu jkun jaf li Ġeħova huwa l-​Alla l-​veru.—Aqra Eżekjel 36:23; Mattew 6:9.

X’għandek tagħmel? Ersaq qrib lejn Alla billi tistudja l-​Kelma tiegħu u tassoċja maʼ nies li jħobbuh. Meta Ġeħova jigglorifika lil ismu, hu se jiftakar fil-​qaddejja leali tiegħu.—Malakija 3:16.

Għal iktar informazzjoni, ara kapitlu 1 taʼ dan il-​ktieb, Il-​Bibbja X’Tgħallem Verament? pubblikat mix-​Xhieda taʼ Ġeħova.

[Stampa f’paġna 16]

Isem Alla f’manuskritt Ebrajk tal-​qedem