L-​Isfida taʼ l-​Umiltà

GĦAL ħafna nies jistaʼ jidher li l-​umiltà m’hijiex taʼ benefiċċju fid-​dinja taʼ llum. Dawk li jirnexxilhom imexxu lil oħrajn u li jidhru li jagħmlu l-​iktar suċċess huma dawk li akkost taʼ kollox jipprovaw dejjem ikunu aħjar minn ħaddieħor, il-​kburin, u dawk li jinsistu li tgħaddi tagħhom. Ħafna min-​nies jgħiru għat-​tip taʼ ħajja li jgħixu s-​sinjuri u n-​nies famużi, u mhux għat-​tip taʼ ħajja li jgħixu n-​nies umli u ġwejdin. Normalment dawk li jirnexxu jieħdu pjaċir jiftaħru li waslu għal dan is-​suċċess bil-​ħila tagħhom stess. Minflok ma jkunu umli, bi kburija jieħdu l-​kredtu kollu huma għas-​suċċess tagħhom.

Riċerkatur Kanadiż tkellem dwar “l-​iżvilupp t’attitudni egoistika u kburija” f’pajjiżu. Oħrajn iħossu li qed ngħixu f’soċjetà fejn il-​fatt li wieħed jieħu pjaċir jitqies bħala iktar importanti milli wieħed jgħix b’mod responsabbli u jinnotaw li llum in-​nies huma iktar u iktar konċernati dwarhom infushom. F’dinja bħal din, għandu mnejn li l-​umiltà ma tidhirx li hija kwalità taʼ min jixtieqha.

M’għandniex xi ngħidu, ħafna jaqblu li l-​umiltà hija kwalità tajba f’oħrajn, ladarba huwa faċli li tingwalaha maʼ nies li jkunu umli. Madankollu, f’din id-​dinja kompetittiva, xi wħud jibżgħu li jekk personalment jaġixxu b’umiltà, huma se jidhru dgħajfin quddiem oħrajn.

Il-Kelma t’Alla, il-​Bibbja, bassret li fi żmienna n-​nies se jkunu “minfuħin bihom infushom, suppervi.” (2 Timotju 3:​1, 2) Ma taqbilx int li din il-​profezija qed titwettaq? Tistaʼ tara l-​valur taʼ li tkun umli? Jew taħseb li xi ħadd umli jistaʼ jidher li huwa dgħajjef, faċli biex tipprofitta ruħek minnu?

Il-fatt huwa li l-​Bibbja tagħti raġunijiet tajbin għala għandek tapprezza u tikkultiva l-​umiltà. Din tipprovdi ħarsa bilanċjata u pożittiva lejn din il-​kwalità u turi li l-​umiltà vera hija evidenza taʼ saħħa, mhux taʼ dgħjufija. L-​artiklu li jmiss se jispjega għala.

[Stampa f’paġna 3]

Kif għandna nħossuna dwar dak li nwettqu?